Leemiso Maxaafaa 6:4-22

⁴Hagaa oottennan de7aidda xiskkoppa; shemppuwaakka shemppoppa.

⁵SHankkaappe genessiyaa kessa ekkiyoogaadan, gitiyaappe kafiyaa attiyoogaadan, ne huuphiyaa ashsha.

⁶Inttenoo azallatoo, qaacotukko biite; biidi etappe tamaarite. Yaatidi aadhdhida eranchcha gidite.

⁷Qaacota ootissanau azaziyaabi, halaqi woikko eta haariyaabi baawa;

⁸shin banttau maanabaa bone minjjoosona; kattaa cakkiyo wodekka banttau koshshiya kattaa shiishshoosona.

⁹Nenoo azallau, neeni aude gakkanaashin xiskkuutee? Ne xiskkuwaappekka aude dendduutee?

¹⁰Neeni qassikka guuttaa zin77aasa; guuttaa xiskkaasa; kushiyaa shiishsha ekkada, guuttaa shemppaasa.

¹¹Yaatiyo wode hiyyeesatettai panggaadan, pacai ola miishshaa oiqqida asadan, ne bolli yaana.

¹²Iita asinne hanttaara asi, yuuyi yuuyidi wordduwaa odees;

¹³i ba aifiyan qim77otees; ba tohuwan bessees; ba biradhdhiyan malaatees.

¹⁴A uluwan geellatettai de7ees; i iitabaa qoppees; ubbatookka i ooshshaa medhdhees.

¹⁵Hegaa gaasuwan bashshai akeekennan a bolli yaana; i hassayennan meqqana; meqqidikka paxenna.

¹⁶GODAI ixxiyo usuppun yohoti de7oosona; i shenetiyo yohoti ubba laappuna:

¹⁷karidi xeelliya aifiyaa, worddotiya inxxarssaa, ashkke asata woriya kushiyaa,

¹⁸iitabaa maqqiya wozanaa, iitabaakko eesotidi woxxiya tohuwaa,

¹⁹wordduwaa bolli wordduwaa gujji gujjidi odiya worddo markkaa, ishatu giddon ooshshaa medhdhiya asa.

²⁰Ta na7au, ne aawaa azazuwaa pola; ne aayyiyaa nena tamaarissidoogaakka aggoppa;

²¹eta ubbatoo ne wozanan oiqqa; ne qooriyankka qachcha.

²²Neeni hemettiyo wode, eti nena kaalettana; neeni zin77iyo wode, eti nena naagana; neeni beegottiyo wodekka, eti nena zorana.