Leemiso Maxaafaa 21:1-25

¹Kawuwaa wozanai GODAA kushiyaana; i a wozanaa goggiya haattaa zaariyoogaadan, ba koyidosaa zaarees.

²Asi oottiyoobai ubbai aawussi likke milatees; shin GODAI a wozanaa qofaa paaccees.

³Yarshshuwaa yarshshiyoogaappekka aattidi, xillobaanne suurebaa oottiyoogaa GODAI dosees.

⁴Iitati otorettiyoogaaninne ayyiyoogan erettoosona; hegeekka nagara.

⁵Mino oosanchchaa halchchoi dureyees; shin eesotiya ubbai hiyyeesana.

⁶Worddotidi dagayido aqoi penttuwaa suuluwaadan xayees; hegaa koyiyaageeti haiquwaa koyoosona.

⁷Iitati suurebaa oottanau ixxiyo gishshau, eta makkala oosoi eta ekkidi bees.

⁸Mooranchchati geella ogiyan hemettoosona; shin geeshshati suurebaa oottoosona.

⁹Ooyettiya machcheera issi keettan de7iyoogaappe he keettaa shakkuwan de7iyoogee keha.

¹⁰Iitati iitabaa oottanau amottoosona; bantta shoorotussi qarettokkona.

¹¹Qilliicciyaagee qaxxayettido wode, wozani paccido urai aadhdhida eraa tamaarees; qassi wozannaama urai tamaaridi, eraa demmees.

¹²Xillo Xoossai iitatu son oosettiyaabaa ubbaa be7ees; eta aatti yeggidi xaissees.

¹³Hiyyeesaa waasuwaa siyanaappe giidi, ba haittaa tucciya uri, ikka waassana; waassin alliyaabai xayana.

¹⁴Geeman immiyo imoi hanqquwaa doshissees. Afala giddoora immido mattaayee suulo hanqquwaa irxxissees.

¹⁵Suure pirddai pirddettido wode, hegee xilluwaassi ufaissa; shin iitaa oottiyaageetussi dagama.

¹⁶Akeeka ogiyaappe haddirida uraa haiqoi naagees.

¹⁷Aaro injjiyan de7ana giya urai manqqees; woine eessanne zaite dosiya asi duretenna.

¹⁸Issi issiton Xoossaasata ashshanau iita asati qaxxayettoosona; ammanettenna asatikka suure asatu gishshaa qaxxayettoosona.

¹⁹Ooyettiyanne yiillotiya machcheera de7anaappe bazzon de7iyoogee keha.

²⁰Wozannaama uraa son mal77o qumainne oissai minjjettees; shin eeyya asi bau de7iyaabaa ubbaa mirggees.

²¹Xillotettaanne aggenna siiquwaa koyiya uraa baree aduqqees; qassi he urai xillotettaanne bonchchuwaa demmees.

²²Wozannaama asi wolqqaama olanchchati de7iyo katamaa olidi oiqqees; oiqqidi eti ammanettido mino qatuwaakka laalees.

²³Ba doonaanne ba inxxarssaa naagiya asi bana metuwaappe naagees.

²⁴Otorettiyanne ayyiya asi qilliicciyaagaa geetettees; i otoranchcha gidido gishshau, asau qoppenna.

²⁵Azallaa amoi worees; aissi giikko, i oottanau koyenna.