Leemiso Maxaafaa 1:7-29

⁷Aadhdhida eratettaassi doomettai GODAASSI yayyiyoogaa; shin eeyyati aadhdhida eratettaanne seeraa karoosona.

⁸Ta na7au, ne aawaa zoriyaa ezgga; ne aayyiyaa tamaarissiyoogaakka karoppa.

⁹Hegee ne huuphiyau bonchcho kallachcha; ne qooriyaukka gozdda gidana.

¹⁰Ta na7au, nena nagaranchchati balettikko, eeno gooppa.

¹¹Eti nena, “Nunaara hindda; asa woranau zuggidi naagoos; gaasoi xayikkonne xillota woranau qosetti uttoos;

¹²Si7oolee mittiyoogaadan, nuunikka eta paxa de7ishin mittoos; nuuni eta ciimma ollan oliyo asatudan oottana.

¹³Nuuni al77o miishsha ubbaa demmana; demmidi nu keettaa omooduwan kunttana;

¹⁴nunaara zuppeta; demmidobaakka issippe shaakkana” yaagana.

¹⁵Ta na7au, etaara ogiyaa hemettoppa; ne tohuwaa eta loossuwaa yettoppa.

¹⁶Aissi giikko, eti iitabaa oottanau woxxoosona; asaa suuttaa gussanau jaamoosona.

¹⁷Kafoi xeellishin, a oiqqanau gitiyaa yeggiyoogee ainne maaddenna.

¹⁸SHin eti bantta suuttaa gussanau zuggoosona; bantta shemppuwaa woranau qosetti uttoosona.

¹⁹Geniyan go77aa demmiya ubbatu wurssettai hegaa mala; he aawu shemppuwaa ekkees.

²⁰Aadhdhida eratettiyaa ogiyan xeesausu; dere gutaran ba qaalaa xoqqu oottada alaahausu.

²¹Aadhdhida eratettiyaa asai shiiqiyo sohuwan eqqada xeesausu; katamaa geliyo penggiyan eqqada, hagaadan yaagada biddausu;

²²“Inttenoo, akeekai paccidoogeetoo, intte akeekaa pacaa aude gakkanaashin dosuuteetii? Qilliicciyaageetoo, qilliicciyoogan aude gakkanaashin ufaittuuteetii? Eeyyatoo, eratettaa aude gakkanaassi ixxuuteetii?

²³Ta seeran simmite; be7ite; taani ta eraa intte bolli gussana; ta qaalaakka inttena tamaarissana.

²⁴Taani xeesido wode, intte koyennan ixxideta; taani kushiyaa yeddinkka, ooninne akeekibeenna.

²⁵Ta zore ubbaa karideta; ta seeraakka ekkibeekketa.

²⁶Hegaa gishshau, inttena metoi gakkiyo wode, taani intte bolli miiccana; intte dagaman kokkoriyo wode, taani inttena qilliiccana.

²⁷Dagamai uushuwaadan intte bolli yiyo wode, metoi gotiyaadan intte bolli yiyo wode, tuggainne waayee intte bolli gakkiyo wode, taani inttena qilliiccana.

²⁸“He wode eti tana xeesana; shin taani koyikke; eti tana minttidi koyana; shin demmokkona.

²⁹Aissi giikko, eti eratettaa ixxidosona; GODAASSI yayyiyoogaa dooribookkona.