Leemiso Maxaafaa 18:1-20

¹SHaahettanau koyiya asi ba amuwaa kaallees; lo77o era ubbaakka phalqqees.

²Eeyyai ba qofaa qonccissanaagaa xalaalaa dosiyoogaappe attin, hara asappe era ekkanau dosenna.

³Iitatettai yiyo wode, karee, kaushshinne yeelli a kaallidi yi bayoosona.

⁴Asaa doonaappe kiyiya haasayai ciimmaa haattaa mala; aadhdhida eratettaa pulttoikka goggiya haattaa mala.

⁵Mooranchchaa maaddidi, xilluwaa pirddaa geellayiyoogee lo77o gidenna.

⁶Eeyya asi ba haasayan ooshshaa denttees; a doonaappe kiyiya qaalai a warissees.

⁷Eeyya asi, haasayiiddi bana qohees; a haasayai gite gididi, a oiqqees.

⁸Zigirssanchchaa qaalai mal77o qumaa mala; ufaissiiddi duge ganjjiyaa gakkees.

⁹Ba oottiyo oosuwan azalliya asi bashshiya urappe ainne dummatenna.

¹⁰GODAA sunttai mino gimbbe mala; xillo asi yaa woxxidi saro attana.

¹¹SHin dure asatussi eta duretettai yuushoi gimbbettido katamaa mala; eta qofan eta duretettai mino dirssaadan eta naagiyaabaa milatees.

¹²Asi kunddanaappe kase a wozanai otorettees; bonchchettiyoogaappekka ba huuphiyaa ziqqi oottiyoogee sinttatees.

¹³Siyennan de7iiddi zaariyoogee, hegee he uraayyo eeyyatettanne yeella.

¹⁴Asa ayyaani harggiyaa danddayanaadan maaddees; shin ayyaani meqerettiichchikko, a ooni danddayanee?

¹⁵Akeekanchcha asati tamaaranau keehi koyoosona; aadhdhida eri de7iyoobaakka ezggoosona.

¹⁶Immiyoobi immiyaagau ogiyaa dooyees; gita asaarakka erissees.

¹⁷Kasetidi daannan mootiya uri baarigaarai yiidi a oichchana gakkanaashin, ubbatonkka he urai xillo milatees.

¹⁸Saamaa yeggiyoogee palamaa teqqees; naa77u wolqqaama baarigaaratakka shaakkees.

¹⁹Naaqettida ishaara giiganaagee gimbbettida katamaa omooddanaagaappekka aadhdhi waayissees; penggiyaa gorddiyo birata hiraquwaadan, palamai dabbota shaakkees.

²⁰Ba doonan haasayidobaappe asi ba ganjjiyaa kunttees: ba inxxarssaappe kiyidaban kallees.