Leemiso Maxaafaa 15:14-33

¹⁴Akeekiya wozanai de7iyo asi eratettaa koyees; shin eeyyati bantta eeyyatettan ufaittoosona.

¹⁵Hiyyeesatu de7oi ubba gallassikka baaxe. SHin ufaittiya asati ubbatonkka bantta de7uwaa aloosona.

¹⁶Ooshshai de7iyo gita aquwaappe GODAA yashshatettai de7iyo guuttabai keha.

¹⁷Ooshshai de7iyoosan modhdho ashuwaa maanaappe siiqoi de7iyoosan santtaa miyoogee keha.

¹⁸Hanqqettiya asi ooshshaa kessees; shin hanqqettanau eesotenna asi ooshshaa irxxissees.

¹⁹Azalla uraassi metoi a oge ubban aguntta dirssa mala; shin suure uraa ogee badaasa.

²⁰Eranchcha na7ai ba aawaa ufaissees; shin eeyya na7ai ba aayyiyo karees.

²¹Wozani bainna asi ba eeyatettan ufaittees; shin wozannaama asi likkebaa oottees.

²²Zoretai xayikko, halchchidobai halettees; daro zoriyaageeti de7iyoosan halchchidobai polettees.

²³Oishettidobaassi likke zaaruwaa zaariyoogee he uraa ufaissees; haasayaa likke wodiyan haasayiyoogee aiba lo77obee!

²⁴Aadhdhida eranchchai bollau kaalettiya de7uwaa ogiyan hemetteesippe attin, duge duufuwau wottiya ogiyan hemettenna.

²⁵GODAI otoranchchatu keettaa qolana; shin am77ee aquwaa naagees.

²⁶GODAI iitatu qofaa shenetees; shin geeshsha qaalai a ufaissees.

²⁷Wordduwan woriyaa demmanau jaamiya asi ba so asaa bolli metuwaa ehees; shin mattaayiyaa ixxiya asi paxa de7ana.

²⁸Xillo asi haasayanaappe kasetidi qoppees; shin iitatu inxxarssai palabaa pulttees.

²⁹GODAI iitatuppe haakkees; shin xillotu woosaa siyees.

³⁰Pashkkidi xeelliyo xeelai wozanaa ufaissees; mishiraachcho odoikka bollaa pattees.

³¹De7uwaa immiya zoriyaa siyiya asi aadhdhida eranchchatuura issippe de7ana.

³²Seeraa ixxiya asi bana qohees; shin seeraa ekkiya asi akeekaa demmees.

³³GODAASSI yayyiyoogee asa aadhdhida eratettaa tamaarissees; bonchchettana koyida asi koiro bana kaushshanau koshshees.