Karamɔxɔna 7

1

2

3

4

5

6

7

8

9

10

11

12

¹Xili kanyaan fisa latikɔnɔn kɛndɛn xa, muxun faxa lɔxɔn dangu a bari lɔxɔn na.

²A fisa i siga ɲandeni benun i xa siga sɛwa bande dondeni, bayo sayaan muxune birin yɛɛ ra, niiramane birin lan e yi xaxili sɔtɔ na ma.

³Sɔxɔlɛn fisa gelen xa, bayo yɛtagin na yifɔrɔ, na muxun xaxinla maliyɛ nɛn.

⁴Fekolonne bɔɲɛn darixi ɲanden nan na, koni xaxilitarene bɔɲɛn darixi ɲaxaɲaxa yiren nan na.

⁵A fisa muxun yi fekolonna maxadin namɛ, benun a xa xaxilitarene sigin namɛ.

⁶Bayo xaxilitarene gele xuiin luxi nɛn alo ɲanla budo xuiin tɛɛni tunden bun. Fe fuun nan na fan na.

⁷Fekolonna na ɲaxankatan ti, na a findima xaxilitaren nan na, dimi yi seene na rasuxu mayifuni, na muxun bɔɲɛn natantanma nɛn.

⁸Feen naɲanna dangu a fɔlɔn na. A fisa muxun yi sabari benun a xa waso ayi.

⁹I nama mafura xɔlɛ, bayo bɔɲɛ gbeen xaxilitarene nin.

¹⁰I nama a fala, i naxa, “Nanfera waxati danguxine fisa iki xa?” Bayo na maxɔdinna mi kelixi fekolonna xan yi.

¹¹Fekolonna nun kɛɛn tɔnɔn birin lan, bayo a muxune malima dunuɲa yi.

¹²I na lu fekolonni, na i ratangama nɛn alo gbeti kanyana, i na fe kolon, na fekolonna i luma nɛn i nii ra.

¹³Alaa wanla mato: A na naxan yidɔxɔ, nde nɔɛ a ratinxinɲɛ?

¹⁴I xa sɛwa waxati faɲini, i yi i miri tɔrɔ waxatini, bayo Ala nan e firinna birin daxi. Nanara, adamadiin mi nɔɛ sese yɛɛ toɛ fe famatɔne fe yi.

¹⁵N bata feen birin to n ma dunuɲa yi gidi fufafuni. Tinxin muxuna ndee halagima e tinxinyani, ɲaxudena ndee yi siimaya xunkuyen sɔtɔ e ɲaxuyani.

¹⁶I nama i ya tinxinyaan nadangu ayi, i nama i yɛtɛ findi fekolon gbeen na. Nanfera i yɛtɛ rahalagima?

¹⁷I nama ɲaxuyaan nadangu ayi, i nama findi xaxilitaren na. Nanfera i faxɛ benun i ya waxatin xa a li?

¹⁸A lan i yi kedenna suxu hali i mi boden beɲin, bayo naxan na gaxu Ala yɛɛ ra na feen birin yiminima nɛn.

¹⁹Fekolonna xaxilimaan sɛnbɛ soma nɛn dangu yamana kan fu ra taani.

²⁰Tinxin muxu yo mi dunuɲa yi naxan fe faɲin ligama a mi yulubi liga.

²¹I nama i tuli mati falan birin na, alogo i nama i ya walikɛɛn xuiin mɛ, a i rayelefuma.

²²Bayo i a kolon i bɔɲɛni, i tan yɛtɛɛn bata muxune rayelefu sanɲa ma wuyaxi.

²³N bata na feene birin fɛsɛfɛsɛ fekolonna xɔn, n yi a fala, n naxa, “N fekolonna sɔtɔma nɛn,” koni a mɔn makuya n na.

²⁴Sese a ra, a makuya pon! A tilin mumɛ! Nde nɔɛ a toɛ?

²⁵Nayi, n bata kata fekolonna famu feen nun a fɛsɛfɛsɛ feen nun a fen feen na e nun feene bunna, alogo n xa a famu a xaxilitareyaan nan ɲaxuyaan na, fa fala daxuyaan mi fan.

²⁶N bata a kolon a ɲaxanla naxan luxi alo luti ratixina, naxan bɔɲɛ findixi yalaan na, naxan yiine luxi alo yɔlɔnxɔnna, na xɔlɔ dangu sayaan na! Muxun naxan Ala kɛnɛnxi, na tangama nɛn a ma, koni yulubi kanna a suxuma nɛn a ra.

²⁷N tan, karamɔxɔna, n na ito nan toxi, n to feene fɛsɛfɛsɛxi keden keden yɛɛn ma, alogo n xa feene bunna yɛɛ to.

²⁸N mɔn feene yɛ fenma, koni n munma a yɛɛ to singen. N xɛmɛ kɛndɛ kedenna nan toxi xɛmɛ wuli keden yɛ, koni n mi ɲaxalan kɛndɛ keden peen toxi ɲaxanle yɛ.

²⁹Koni, n na ito nan to: Ala adamadiine da nɛn, e fan, koni e tan bata kɔtɛ wuyaxi fen.