Kawandila 7

1

2

3

4

5

6

7

8

9

10

11

12

¹Xili fanyi fan dangi labundɛ fanyi ra. I faxa lɔxɔɛ fan dangi i bari lɔxɔɛ ra.

²Sofe kaaɲɛ banxi fisa sofe xulun banxi bɛ, barima faxɛ ragirixi adama birin bɛ. A lanma mixi baloxi xa ratu na ma.

³Sunnunyi fisa yele bɛ, barima mixi bɔɲɛ fanyi sɔtɔma nɛ sunnunyi kui.

⁴Xaxilima a ɲɔxɔ rasigama nɛ faxɛ ma, xaxilitare tan na yelefe nan tui.

⁵Xaxilima xa xurui fisa xaxilitare xa matɔxɔɛ bɛ.

⁶Xaxilitare xa yele luxi nɛ alɔ bolee naxee mabulama tunde bun ma. Fe fufafu nan na ki.

⁷Kɔbiri tinxintare a niyama nɛ xaxilima xa findi xaxilitare ra, ye dɔxɔɛ a bɔɲɛ mafindima nɛ.

⁸Fe raɲɔnyi fisa a fɔlɛ bɛ. Mixi sabarixi fisa yɛtɛ igboe bɛ.

⁹I bɔɲɛ naxa gbata tede, barima xaxilitaree bɔɲɛ nan tema.

¹⁰I naxa lu a fala ra, «Singe dangi yakɔsi ra.» Xaxilimaya wɔyɛnyi mu na na ra.

¹¹Xaxilimaya luxi nɛ alɔ kɛ, a munafanyi na duniɲa mixi birin bɛ.

¹²Xaxilimaya findixi mixi xa kantari nan na, kɔbiri fan findixi mixi xa kantari nan na, kɔnɔ xaxilimaya nan fisa, barima a xaxilima rakisima.

¹³Ala xa wali mato. A naxan madalin, nde nɔma na matinxinde?

¹⁴I xa sɛɛwa hɛɛri tɛmui. Tɔɔrɛ tɛmui na a li, i xa ratu a ma, a Ala nan na firinyi birin daaxi. Na kui adamadi mu nɔma a xa tina kolonde.

¹⁵N ma simaya fufafu kui, n a toxi nɛ tinxintɔɛ nde faxa simaya dunke kui hali a to tinxinxi, tinxintare nde bu duniɲa hali a to mu tinxin.

¹⁶I naxa i yɛtɛ findi tinxintɔɛ ra, i naxa i yɛtɛ findi lɔnnila ra, xa na mu a ra i i yɛtɛ kanama nɛ.

¹⁷I naxa findi tinxintare ra, xa na mu a ra i faxama nɛ beenu i xa waxati xa a li.

¹⁸A lanma i xa i ɲɔxɔ sa na marasi firinyi xɔn ma. Ala xa yaragaaxui xa fe sɔɔnɛyama nɛ na birin kui.

¹⁹Xaxilima xa xaxilimaya a sɛnbɛ gboma nɛ dangi taa mangɛ fu ra.

²⁰Tinxintɔɛ mu na yi duniɲa ma, naxan fe fanyi tun nabama, a mu yunubi yo raba.

²¹I naxa i tuli mati mixi xa wɔyɛnyi birin na, xa na mu a ra i fama i xa konyi xui mɛde a i dankama,

²²alɔ i tan yati bara a raba sanya wuyaxi mixie ra.

²³N na birin igbɛxi nɛ xaxilimaya ra. N naxa a fala, «N xa findi xaxilima ra,» kɔnɔ n mu nɔ.

²⁴Xaxilimaya tan tilin, a makuya won na, nde nɔma a fahaamude?

²⁵Na kui n naxa kata na kolonde, n xa so xaxilimaya kui, n xa fahaamui sɔtɔ, n xa a kolon tinxintareya findixi xaxilitareɲa nan na, xaxilitareɲa fan findixi daxuɲa nan na.

²⁶N bara fe nde to naxan xɔnɔ dangi faxɛ ra. Ginɛ na a ra naxan findixi yɛlɛ ra, naxan bɔɲɛ findixi gantanyi ra, naxan bɛlɛxɛe luxi alɔ luuti balanxi. Mixi naxan nafan Ala ma, a kelima nɛ na ginɛ xun ma, kɔnɔ na ginɛ yunubitɔɛ nan masɔtɔma.

²⁷N tan kawandila yi nan to n ma fe matoxi birin kui:

²⁸N naxa xɛmɛ tinxinxi keren to xɛmɛ wulu ya ma, n naxa a fen han, kɔnɔ n mu ginɛ yo to ɲama ya ma naxan tinxin.

²⁹N yi nan gbansan to kɔrɛ: Ala adamadie daaxi nɛ e tinxinxi, kɔnɔ e tan naxa e yɛtɛ madaxu.