Text copied!
CopyCompare
Paipel - Än Salomon Afalafal

Än Salomon Afalafal 7

Help us?
Click on verse(s) to share them!
1Iteüöchün eman a mürina seni lö mi aüchea, nge ränin än eman mäla a aüchea seni ränin an uputiu.
2A mürina pwe eman epwe eti eu mwichen letipeta lap seni an epwe eti eu kametip. Pun chokewe mi manau repwe chechemeni pwe mäla sopolan aramas meinisin.
3Iwe, letipeta a mürina seni takir, pun än eman letipeta a tongeni awili letipan.
4Ekiekin eman mi mirit a nom ren ekewe chon letipeta, nge ekiekin eman mi umwes a chök nom ren ekewe chon meseik.
5A mürina ngeni eman mwän an epwe aüselinga kapasen fön me ren eman mi mirit, lap seni an epwe aüselinga än eman chon umwes köl.
6Pun än chon umwes takir a wewe ngeni tärechopuchopun iräfölüföl lon ekkein fän kama. Pwal ei pön chök.
7Are eman mi mirit a atupu eman, a föri föförün chon umwes, nge are eman a angei lifangen amichimich, a angauala lelukan.
8A mürina lesopolan mettoch meinisin lap seni lepopun. Nge eman chon tipemosonoson a mürina seni eman chon tipetekia.
9Kosap songokai, pun song a nom lon letipen chon umwes.
10Kosap ais, “Pwota ewe fansoun lom a mürina seni fansoun ikenai?” Pun eman mi eäni ei sokun kapas ais esap mirit.
11Mirit a mürina usun wöüch me ren samach, a pwal eu feiöch fän iten chokewe mi nom won fanüfan.
12Iwe, mirit a alisi aramas usun chök moni a pwal alisi aramas. Nge iei feiöchün silelap pwe eman mi mirit a tümwünü püsin manauan.
13Iwe, kopwe ekieki usun mine Kot a föri. Iö a tongeni awena mine Kot a apwora?
14Lon fansoun om feiöch kopwe pwapwa, nge lon fansoun om osupwang kopwe ekieki: Kot a tinato feiöch me osupwang. Iei mine eman aramas esap tongeni silei mine epwe fis lon fansoun mwan.
15Lon ränin manauei mi pön üa küna ekei ruu sokun lapalap: Eman aramas mi pwüng a chök mäfeiengau, nge a föri mine a pwüng. Nge eman aramas mi pwüngingau a manauatam, nge a föri mine a pwüngingau.
16Üa mefi pwe ese nien lomot om kopwe achomonga om föförün pwüng ika alapala om tipachem. Pwota ka mochen püsin afeiengauok?
17Üa pwal mefi pwe esap öchituk om kopwe achomonga om föföringau ika alapala om föförün umwes. Pwota kopwe mäla, nge esamwo tori om fansoun?
18Iwe, a mürina pwe kopwe amwöchü ewe eu, nge kosap pöütala pwal ewe eu. Pun eman mi niueiti Kot esap achomonga an föför mi pwüng ika an föför mi ngau.

19Tipachem ellet a fokun tümwünü eman mi mirit lap seni engol samol ra tümwünü eu telinimw.
20Ellet, esap fokun wor eman chon pwüng won fanüfan a chök föri mine a pwüng fansoun meinisin, nge esap wor an tipis.
21Kosap rongorong ngeni meinisin mine aramas ra apasa, pun a tongeni fis pwe kopwe rong än noum chon angang alalangauok.
22Pun ka püsin silei pwe ka fen pwal alälängaua aramas fän chomong.
23Ekei mettoch meinisin üa sotuni ren ai mirit. Üa fokun achocho ngeni ai üpwe tipachem, nge üsap tori.
24Ifa usun än eman epwe tongeni küttafesifesi tipachem? A fokun, fokun alolol, pwe esap wor eman a tongeni tori.
25Iwe, üa achocho ngeni ai üpwe silei o küttafichi mirit me masouen mettoch, üa pwal achocho ngeni ai üpwe silei ngauen umwes me feiengauan.
26Iwe, üa küna pwe eman fefin mi atuputup a afeiengau seni mäla. Letipan a usun chök eu sär ika uk, nge pöün ra wewe ngeni selimächä mwän ra föfö ren. Eman mwän mi chen me ren Kot a tongeni sü seni neminewe, nge eman chon tipis epwe tup ren.
27Iwe, ewe chon afalafal a apasa, “Nengeni, iei ükükün mine üa küna, lupwen üa achufengeni eu me eu kei mettoch, pwe üpwe silei unusan.
28Üa chüen kükütta, nge üsamwo küna. Üa küna eman chök mwän mi mirit lein engeröü aramas, nge üsap küna eman fefin mi mirit leir.
29Iei chök mine üa wesewesen küna: Kot a föri aramas pwe repwe wenechar, nge aramas ra püsin ekiekietä föför mi rikirik.”