Ekeliziasiti 7

1

2

3

4

5

6

7

8

9

10

11

12

¹Na pozapoza leana si hola nia sa lumu humaṉa lea, meke na rane mate si leana hola nia sa rane podo.

²Leana si pude la pa vetu haqohaqoana hola nia si pude la inevaṉa pa keke vetu, ura na mate si na dudutana tadi doduru tie; arini pu korapa toa si pada pude kopu nia si hie pa bulodia.

³Talotaṉa si leana hola nia sa hegere, sina na isumata kuliusuna si leana koasa bulo.

⁴Sa bulona sa tie giligilana si la koasa haqohaqoana, ba sa bulona sa tie pekipeki si hatai sari na tiṉitoṉa qetuqetu.

⁵Leana si be avosia sa ginegese tanisa tie gilae hola nia si be avosi sari kinera tadi na tie pekipeki.

⁶Gua sa pidaladi rina rerequtu huda rakihi pa kauru raro, sa hegerena sa tie pekipeki. Hie tugo si loketoṉa laena.

⁷Sa hiniko poata si boka pekipeki nia sa tie gilae, meke sa tabara golomo poata si ṉovalia sa bulo.

⁸Sa vina betona sa ginugua si leana hola nia sa pinodalaena, meke sa aqa va ṉoṉo si leana hola nia sa vinahesi pule.

⁹Lopu tuturei ta ṉaziri pa maqomaqomu, ura sa binugoro si koa ekona mo pa bulona sa tie pekipeki.

¹⁰Mu lopu zama, “Vea ke pukerane si leana hola nia sapu kamahire?” Na lopu na ninanasa gilae sapu asa.

¹¹Ginilagilana lohina, si na tiṉitoṉa leana, guana tinago meke vagi nia lineana arini pu dogoria sa rimata.

¹²Ginilagilana lohina si guana vetu, gua tugo sa poata si guana vetu, ba sapu leana nia sa ginilagilana si hie: sa ginilagilana si kopu nia sa tinoa tanisa tie pu tagona.

¹³Mu vilitia gua sapu tavetia sa Tamasa: Esei boka va toṉotia sapu ele va koqi ia Sa?

¹⁴Pana leadi sari na totoso, si mu qetu; ba pana kaleadi sari na totoso, si balabala ia si hie: E Tamasa tu si tavete betoi sari karua. Gua ke sa tie si lopu boka tumae nia nasa si kote ta evaṉa pa kenuna sa.

¹⁵Koasa qua tinoa sapu loke laena hie si dogoro betoi rau sari karua ginugua hire: sa tie toṉoto sapu mate pa nana tinoṉoto, meke sa tie kaleana sapu toa va gelenae pa nana kinaleana.

¹⁶Ke lopu koa va toṉotoṉotae sisigiti, babe va gilagilae va hola; vea ke kote ṉovala pule nigo tu?

¹⁷Lopu va hola ia sa mua hahanana kaleana, meke lopu va pekipekie; vea ke kote mate tu sipu lopu ele kamo mua totoso?

¹⁸Leana si pude tuqe vagia si keke meke lopu va taloa ia sapu vina rua. Sina sa tie pu pamaṉa nia sa Tamasa si kote va seu koari karua beto.

¹⁹Sa ginilagilana lohina si va ṉiṉira ia si asa pu gilae hola ni sari ka manege puta tie tuturaṉa pa keke popoa.

²⁰Lopu keke tie toṉoto pa popoa pepeso si tavete va toṉoto meke loke nana sinea.

²¹Mu lopu va taliṉa la i sari doduru zinama pu zama ni rina tie, na kote avoso hola ia goi sa mua nabulu pana leve nigo sa;

²²ura gilania mua pa bulomu sapu soku totoso si leve ni goi sari kaiqa.

²³Doduru hire si podeki rau pa ginilagilana, meke zama si arau, “Na ṉiṉirana sa qua hiniva pude gilagilana,” ba hie si hola sisigiti, lopu boka ia rau.

²⁴Be vea guguana sa ginilagilana lohina, ba seu hola si asa meke lopu boka ta vagi; esei boka dogoria?

²⁵Ke va sotoa rau sa qua binalabala pude tumae nia, pude vilitia meke hata va hitekia sa ginilagilana lohina meke sari ginugua tanisa meke pude tumae nia sa dinuviduvili tanisa kinaleana meke sa pinupuhu tanisa pinekipeki.

²⁶Ba sapu variva sigiti, hola nia sa minate si sa barikaleqe sekesekeina, sapu sa bulona si na sipata meke sari limana si guana seni. Sa tie pu va qetua sa Tamasa si boka govete nia si asa, ba sari tie seadi si kote saputu vagi sa.

²⁷“Dotu,” gua si rau, sa tie va tumatumae, “Hie si dogoro vagia rau totoso varigara ni rau sari doduru ginugua:

²⁸Sipu korapa hatahata si rau meke lopu vagia keketoṉa, si dogoria rau si keke tie toṉoto koari ka keke tina, ba lopu keke barikaleqe si toṉotona koarini!

²⁹Hie mo si dogoria rau: Taveti Tamasa sari na tie pude toṉoto ba sari na tie si la hata va soku dia ginugua.”