Kàdduy Waare 7

1

2

3

4

5

6

7

8

9

10

11

12

¹Jëw bu rafet a gën diw gu xeeñ, bésub dee a gën bésub juddu.

²Dem dëj a gën wàlli bernde, mooy muju képp. Kuy dund, sóoraale ko.

³Naqar a gën xaxaloo; aw tiis ñëkkal kanam, rafetal xol.

⁴Ku xelu, xalaat kërug dëj; ku dofe, xalaat kërug puukare.

⁵Déglu ku xelu di la àrtu moo gën déglu dof bu lay woy.

⁶Ab dof day textexi ni dég yuy retete taal bu cin tege. Loolu it di cóolóoli neen.

⁷Foqarñi kay day dofloo boroom xel, te ab ger da lay gëlëmal.

⁸Fa mbir mujjee gën fa mu doore, te muñ a gën réy-réylu.

⁹Bul gaawa mer; mer, xolub dof la samp këram.

¹⁰Bul ne lu tax démb dàq tey, loolu, laaj ko du xel.

¹¹Xel mu rafet daa neex ni ndono, njariñ la ci kuy dund.

¹²Xel mu rafet kiiraay la, xaalis kiiraay la; njariñu xam-xam mooy xelu, mucc.

¹³Xoolal ci li Yàlla def: Ana ku mana jubbanti lu mu dëngal?

¹⁴Su neexee, bànneexul; su mettee, xoolal ne lu ci ne, Yàllaa ko def ngir jaam bi umple gannaawam.

¹⁵Lu ne laa gis ci sama dund gu gàtt gii! Nit a ngii jub, teewu koo sànkook njubam; nit bon, ànd ak mbonam, gudd fan.

¹⁶Bul jub ba mu ëpp, bul wóolu sam xel ba mu ëpp, lu ko moy nga yàqule.

¹⁷Bu la mbon jiital, te bul dofe. Jàppool lii, te baña wacc lee, mooy li gën, lu ko moy nga dee te sa àpp jotul. Ku ragal Yàlla kat sàmm yooyu yaar.

¹⁹Xel mu rafet day dooleel boroom, ba mu man fukki kàngam cib dëkk.

²⁰Amul moos ku jub ci kaw suuf, kuy def lu baax te du bàkkaar.

²¹Te it du lépp lu ñu wax, ngay bàyyi xel. Kon doo dégg surga bu la ŋàññ,

²²ndax xam nga xéll ne yaw it ŋàññe nga ay yooni yoon.

²³Loolu lépp maa ko natte xel mu rafet, te naan: «Naa xelu,» ndeke mbir ma sore na ma.

²⁴Li wara am daa loq, te xóota xóot; ana ku ko mana daj?

²⁵Ma walbatiku, di jéema xam, di wut, di càmbar, di sàkkum piri, ngir xam li bon cig ndof, ak li dofe, cig ndof.

²⁶Ma seetlu lenn lu gëna naqari dee: muy ndaw su la fiir. Kooku cofeelam mbaal la, yoxo ya dib jéng. Ku Yàlla gërëm a koy rëcc, bàkkaarkat bi lay jàpp.

²⁷Waarekat ba nee: Xoolal li ma gis, benn-bennal ko, ngir gis lu mu firi.

²⁸Ma seeta seet, gisuma. Genn góor laa ràññee ci junniy góor, ràññeewuma kenn ci jigéen ñi ñépp.

²⁹Lenn daal laa ràññee: Yàlla daa sàkk nit, jubal ko, nit di wuta sél fu ne.