Thuituen 7

1

2

3

4

5

6

7

8

9

10

11

12

¹A ming te tah situi then lakah ah then tih dueknah hnin he a cun khohnin lakah then.

²Nguekcoinah im la caeh te buhkoknah im la caeh lakah then. He tah hlang boeih kah a bawtnah coeng tih aka hing loh a lungbuei ah dueh saeh.

³Konoinah he nueihbu lakah then. Maelhmai thaenah long ni lungbuei a voelphoeng sak.

⁴Aka cueih kah lungbuei tah nguekcoinah im ah dae aka ang kah lungbuei tah kohoenah im ah om.

⁵Aka cueih kah tluungnah hnatun he tah aka ang laa aka hnatun hlang lakah then.

⁶Am lae kah hling ol bangla aka ang kah nueihbu khaw om. Te dongah he khaw a honghi ni.

⁷Hnaemtaeknah loh hlangcueih a yan sak tih kutdoe loh lungbuei a poo sak.

⁸Ol bawtnah he a tongnah lakah then. Aka ueh kah mueihla he aka oek kah mueihla lakah then.

⁹Huesak hamla na mueihla neh let sak boeh. Konoinah he aka ang kah rhang dongah ni a kol.

¹⁰“Balae tih hnukbuet kah a tue aka om te tahae kah lakah a then la a om?” ti boeh. Te bang te cueihnah neh na dawt moenih.

¹¹Cueihnah tah rho la then tih khomik aka hmu ham khaw hoeikhang.

¹²Cueihnah hlipkhup ah om he tangka hlipkhup kah om banghui ni. Tedae mingnah he tah rhoeikhangnah la om tih cueihnah long tah a kungmah te a hing sak.

¹³Pathen kah bibi te hmu lah. Amah loh a khun sak te dueng hamla aka noeng te unim?

¹⁴A then tue vaengah tah a then la om. Tedae a yoethae tue vaengkah khaw hmu. He khaw dumlai dongah Pathen loh voeivang ah a khueh. Te daengah ni hlang loh a hnukah te pakhat khaw hmu pawt eh.

¹⁵Kamah kah a honghi tue vaengah a cungkuem te ka hmuh. Amah kah duengnah dongah aka paltham hlang dueng om tih a boethae neh aka nguel halang khaw om.

¹⁶Aka dueng koek la om boel lamtah hoeikhangnah aih ham khaw cueih boeh. Balae tih namah na phae uh?

¹⁷Muep poehlip boel lamtah lunghmang la om boeh. Balae tih namah tue pawt vaengah na duek eh?

¹⁸He he na tuuk vaengah na kut te ke lamloh na hlah pawt ham then. Pathen aka rhih ham tah a cungkuem te a noeng.

¹⁹Cueihnah long tah aka cueih te khopuei kah aka om boei parha lakah khaw a tanglue sak.

²⁰Diklai hman ah hnothen a saii tih aka tholh pawh hlang dueng a om moenih.

²¹Ol a thui uh boeih te khaw na lungbuei paek boeh. Te pawt koinih na sal loh namah n'tap te na ya ve.

²²Namah loh hlang tloe na tap te na lungbuei loh a voei a yet khaw a ming.

²³He boeih he cueihnah neh ka noemcai tih, “Ka cueih eh,” ka ti dae kai lamloh lakhla laklo.

²⁴Te tla a om te khaw hla coeng tih a dung lakah dung coeng. Te te aka hmu te unim?

²⁵Kamah neh ka lungbuei khaw, uepnah koikah halangnah neh anglatnah, lunghmangnah te ming ham neh yaam hamla, cueihnah neh poeknah tlap hamla ka maelh.

²⁶A lungbuei te tluum neh soh la a tung tih a kut dongah pinyennah aka khueh huta he dueknah lakah khahing la ka hmuh. Pathen mikhmuh ah aka then tah anih aeng lamloh loeih suidae aka tholh tah anih loh a tuuk ni.

²⁷So lah he, thuituenkung loh a thui bangla poeknah hmuh hamla pakhat soah pakhat ka phoel.

²⁸Te te ka hinglu loh a tlap pueng dae ka hmuh moenih. Thawngkhat khuiah tongpa pakhat ka hmuh dae te boeih lakli ah huta ka hmuh moenih.

²⁹He bueng mah so lah. Pathen loh hlang he a thuem la a saii coeng dae amih loh phuengnah muep a tlap uh te ka hmuh.