Heburune 3

1

2

3

4

5

6

7

8

9

10

11

12

13

¹Nanara, ngaxakeden muxu rasariɲanxine, Ala bata ɛ tan naxanye xili, ɛ xaxili lu Yesu a fe xɔn, Alaa Xɛraan nun Saraxarali Kuntigi Singena, en naxan ma fe falama yamani.

²Muxu tɔgɔndiyaxin nan yi a ra Ala xa, naxan a sugandixi alo Musa yi kii naxan yi Alaa banxin birin yi.

³Banxi tiina xunna kenla gbo dangu banxin yɛtɛɛn na. Nanara, Yesu a xunna kenla gbo Musaa xunna kenla xa.

⁴Awa, muxune nan banxine tima, koni Ala nan seen birin daxi.

⁵Musa tan tɔgɔndiya nɛn wali kɛdeni Ala xa a banxin mumɛni, a sereyaan ba lan na feene ma Ala yi fama naxanye ligadeni.

⁶Koni Alaa Muxu Sugandixin tan luxi na alo Alaa Dii Xɛmɛn naxan a banxin xun na. En findixi a banxin nan na, xa en na en wɛkilɛ, en yi en ma yigin namara en naxan matɔxɔma.

⁷Nayi, alo Alaa Nii Sariɲanxina a falaxi kii naxan yi, a naxa, “Xa ɛ Ala fala xuiin mɛ to,

⁸ɛ nama ɛ bɔɲɛni xɔdɔxɔ alo ɛ yi murutɛxi Ala ma waxatin naxan yi, ɛ yi matoon xun ti Ala ra tonbonni.

⁹Ɛ benbane n bunba nɛn mɛnni, e yi n matandi, hali e to n kɛwanle birin to ɲɛɛ tonge naanin.

¹⁰Nayi, n xɔlɔ nɛn na waxatin muxune ma, n naxa, ‘E bɔɲɛn makuya n na waxatin birin, e mi n ma kiraan xɔn.’

¹¹N yi n kɔlɔ n ma xɔlɔni, n naxa, ‘E mi soɛ n ma matabudeni mumɛ!’ ”

¹²Ngaxakedenne, ɛ a liga ɛ yeren ma, bɔɲɛ ɲaxin nun dɛnkɛlɛyatareyaan nama lu ɛ sese yi naxan a ligɛ ɛ xɛtɛ habadan Ala fɔxɔ ra.

¹³Koni ɛ bode ralimaniya lɔxɔ yo lɔxɔ, fanni en mɔn na waxatini Kitabun naxan ma fa fala “To” alogo ɛ tan nde nama tantan yulubin xɔn, ɛ tengbesenɲɛ ayi.

¹⁴Amasɔtɔ en bata findi Alaa Muxu Sugandixin gbeene ra, xa en lu en ma tɔgɔndiyaan singeni, han a raɲanna.

¹⁵Kitabun naxa, “Xa ɛ Ala fala xuiin mɛ to, ɛ nama ɛ bɔɲɛni xɔdɔxɔ alo ɛ yi murutɛxi Ala ma waxatin naxan yi.”

¹⁶Awa, ndee yi ne ra, naxanye Alaa falan mɛ, e murutɛ a xili ma? Ne findixi muxune nan na Musa naxanye ramini Misiran yamanani.

¹⁷Ala xɔlɔ ndee ma ɲɛɛ tonge naanin? Naxanye yulubin liga, e faxa tonbonni.

¹⁸Ala a kɔlɔ ndee a fe ra, a e mi soɛ a matabu yireni? Naxanye tondi a falan suxɛ, a yi falan tima ne nan ma fe yi.

¹⁹En bata a to nayi, fa fala e mi yi nɔɛ soɛ matabudeni lan e dɛnkɛlɛyatareyaan ma.