1Iei mine ämi pwii kana souläng mi pwal kö me ren Kot, oupwe fokun ekieki usun Jesus, ewe Soukünö me Souasor mi Lap sia pwärätä usun.
2I a allükülük ngeni Kot, ewe mi filätä an epwe föri ei angang, usun chök Moses a allükülük lon an angang lon imwen Kot.
3Eman mwän mi aüetä eu imw a angei iteüöch lap seni ewe imw. Ina usun Jesus a fokun fich ngeni an epwe angei iteüöch lap seni Moses.
4Ewer, iteiten imw aramas ra aüetä, nge Kot ewe mi aüetä mettoch meinisin.
5Moses a allükülük lon wisen eman chon angang lon unusen imwen Kot, a kapas usun ekewe mettoch Kot epwe apasa lon ekewe fansoun repwe feito.
6Nge Kraist a allükülük lon wisen eman nau o nemeni imwen Kot. Iwe, kich imwen Kot are sia likitü lon ach tipepwora me ach apilükülük lon met sia apilükülük ngeni.
7Iwe, iei usun met ewe Ngünmifel a apasa, “Ikenai are oua rong mwelien Kot,
8ousap apöchöküla lelukemi usun ämi kewe lewo, lupwen ar pöchökül le ü ngeni Kot, usun met ra föri lon ewe rän lon fanüapö, lupwen ra sotuni Kot.
9Kot a apasa: Ikenan ra sotuniei, inamwo ika ra küna mine üa föri lon ekewe ükükün faik ier.
10Iei mine üa song ngeni ekei aramas o üa üra, ‘Ir eu mwichen aramas mi tokola leluker, resap fokun mochen aleasochisi ai kewe allük.’
11Iwe, lon ai song üa pwon fän akapel ngeniir: ‘Resap fokun tolong lon ewe fanü ia üpwe asösöör ie!’”
12Ämi pwii kana mi lükü Jesus, oupwe afälikemi pwe esap wor eman leimi epwe eäni eu leluk mi ngau o lükümang, pwe epwe tokola seni ewe Kot mi manau.
13Nge oupwe fokun alilisfengen lefilemi iteiten rän lon ei ükükün fansoun mi iteni “Ikenai”, pwe esap wor eman epwe tup lon tipis o tipepöchökül lon letipan.
14Pun oukich meinisin sia chiechien Kraist are sia kamwöchünük tori lesopolan won ewe apilüköch sia eäni seni me lepoputän.
15Iei usun met a mak lon ekewe Toropwe mi Pin, “Ikenai are oua rong mwelien Kot, ousap apöchöküla lelukemi usun ämi kewe lewo, lupwen ra pöchökül le ü ngeni Kot.”
16Iö ekewe aramas mi rong mwelien Kot o pöchökül le ü ngeni? Ir chokewe meinisin Moses a emweniirewu seni Isip.
17Nge iö Kot a song ngeni lon ükükün faik ier? Ir chokewe mi tipis o mätiu lon ewe fanüapö.
18Ngeni iö Kot a pwon fän akapel pwe resap fokun tolong lon ewe fanü ia repwe asösö ie? Sap ir chokewe mi aleasolap?
19Iei usun sia silei pwe resap tongeni tolong lon ewe fanü pokiten ar lükülükümang.
