Eburu 3

1

2

3

4

5

6

7

8

9

10

11

12

13

¹Na kui, n ngaxakerenyi sɛniyɛnxie, wo tan naxee xilixi ariyanna ma, wo xaxili xa ti Isa ra, Ala xa xɛɛra nun a xa sɛrɛxɛdubɛ kuntigi, won danxaniyaxi naxan ma.

²A tinxin nɛ Ala bɛ, naxan nu bara a ti na wali ra, alɔ Annabi Munsa fan a rabaxi ki naxɛ Ala xa banxi kui.

³Isa xa binyɛ dangi Munsa gbe ra, alɔ banxiti xa binyɛ dangixi a xa banxi ra ki naxɛ.

⁴Banxi birin tixi mixi nde nan saabui ra, kɔnɔ Ala nan duniɲa birin daaxi.

⁵Annabi Munsa findixi konyi dugutɛgɛ nan na Ala xa banxi kui, alako a xa seedeɲɔxɔya ba masenyi xa fe ra naxan fama tide.

⁶Kɔnɔ Ala xa Mixi Sugandixi findixi Ala xa Di dugutɛgɛ nan na, naxan Ala xa banxi yamarima. Won tan fan findixi na banxi nan na, xa won lama Isa ra, xa won won xaxili tima a ra, na nan findixi won ma matɔxɔɛ ra.

⁷Na na a ra, wo xa wo ɲɛngi sa Ala Xaxili Sɛniyɛnxi xa masenyi xɔn ma. A sɛbɛxi, «Xa wo bara a xui ramɛ to,

⁸wo naxa wo kobe raso a ra, alɔ wo a rabaxi ki naxɛ gbengberenyi ma. Na tɛmui a nu wo matofe nɛ, kɔnɔ wo naxa a matandi.

⁹Mɛnni wo benbae bara kata e xa n mato. E naxa n ma wali to ɲɛ tongo naani bun ma.

¹⁰Na kui, n naxa xɔnɔ na waxati mixie ma. N naxa a fala, ‹E bɔɲɛ makuya n na tɛmui birin, e mu n ma sɛriyɛ kolon.›

¹¹Na na a ra n naxa n kali xɔnɛ kui, ‹E mu soma n ma malabui kui feo!›»

¹²N ngaxakerenyie, wo xa mɛɛni wo yɛtɛ ma a fanyi ra alako wo bɔɲɛ naxa lu ɲaaxuɲa nun danxaniyatareɲa kui, wo fa gbilen Ala fɔxɔ ra, Ala naxan na na.

¹³Lɔxɔ yo lɔxɔ wo xa wo bore ralimaniya. Wo xa gbilen na ma lɔxɔɛ birin alako yunubi naxa fa wo nɔ, wo bɔɲɛ fa balan Ala mabiri.

¹⁴Xa won sa won xaxili tima Ala xa Mixi Sugandixi ra alɔ won a fɔlɔxi ki naxɛ, lanyi bara lu won nun Isa tagi.

¹⁵A sɛbɛxi Kitaabui kui, «Xa wo bara a xui ramɛ to, wo naxa wo kobe raso a ra, alɔ wo a rabaxi ki naxɛ wo to a matandi.»

¹⁶Nde Ala matandi, e to gɛ a xui ramɛde? Mixie xa mu a ra naxee mini Misira bɔxi ra Annabi Munsa saabui ra?

¹⁷Ala xɔnɔ nɛ ndee ma ɲɛ tongo naani bun ma? Mixie xa mu a ra naxee yunubi rabaxi, e fa sɔntɔ gbengberenyi ma?

¹⁸Ala a kali nde bɛ a e mu soma a xa malabui yire? Mixie xa mu a ra naxee a matandixi?

¹⁹Na kui, won bara a fahaamu a e xa danxaniyatareɲa nan a niya e mu so.