1Li joꞌoxuc li coꞌol quichꞌojtic ta mucꞌ li Jesuse, coꞌol tuqꞌuibtasbilutic xa yuꞌun li Diose, coꞌol albil jcꞌoplaltic chijyicꞌutic batel ta vinajel. Jaꞌ yuꞌun aꞌibeic lec smelol cꞌu sba li Jesús ti jchꞌunojtic ti itaque talel yuꞌun li Diose, yuꞌun tal yalbutic ti cꞌu sba chijcole, schiꞌuc ti iꞌoch ta banquilal pale cuꞌuntique.
2Li Jesuse staoj o yav yoꞌon ta stojol li buchꞌu iꞌacꞌbat yabtele, jaꞌ li Diose, jech chac cꞌu chaꞌal staoj o yav yoꞌon ta stojol Dios eꞌuc li Moisés li iꞌacꞌbat sventain yuꞌun Dios scotol li jtotic jmeꞌtic ta voꞌone li coꞌol tꞌujbilic yuꞌun li Diose.
3Pero li Jesuse jaꞌ ta xꞌichꞌe ta mucꞌ; jaꞌ mu xꞌichꞌe ta mucꞌ li Moisese. Jech chac cꞌu chaꞌal jaꞌ ichꞌbil ta mucꞌ li jvaꞌanejnae; yan li nae muc bu ichꞌbil ta mucꞌ.
4Yuꞌun li jupꞌej nae persa oy buchꞌu tsvaꞌan ti jech tsmeltsaj oe. Jaꞌ noꞌox jech li cꞌustic oye, jaꞌ yabtel scotol li Diose.
5Li Moisese staoj o yav yoꞌon isventain li jtotic jmeꞌtic ta voꞌone li coꞌol tꞌujbilic yuꞌun li Diose. Li cꞌu sba yabtele jaꞌ svinajeb ti ta xtal ti mero banquilal cuꞌuntique, jaꞌ li Cristoe. Yuꞌun li Moisese yajtunel Dios noꞌox.
6Yan li Cristoe jaꞌ Snichꞌon li Diose. Jaꞌ yuꞌun staoj o yav yoꞌon ta sventainbe li yan snichꞌnab li Stote. Li yan snichꞌnab li Stote, jaꞌ li joꞌotique, mi staoj o yav coꞌontic ta stojol cꞌalal to ta slajeb cꞌacꞌale, schiꞌuc mi xijmuybajutic noꞌox ta jmalatic chtal yicꞌutic.
7Yuꞌun jaꞌ echꞌem tsots yabtel iyichꞌ li Snichꞌon li Diose, jaꞌ yuꞌun mu me xapasic pimil jech chac cꞌu chaꞌal tsꞌibabil ta scꞌop Dios ti la spasic li jtotic jmeꞌtic ta voꞌonee. Yuꞌun me jaꞌ tsjules ta ajolic li Chꞌul Espíritue ti cꞌu sba tsꞌibabil ta voꞌonee. Jech tsꞌibabil: Mi la avaꞌiic la scꞌoponoxuc li Dios li avie, mu me xapasic pimil jech chac cꞌu chaꞌal la spasic pimil te ta taqui jamaltic li jtotic jmeꞌtic ta voꞌone li cꞌalal iqꞌuelbat yoꞌonic yuꞌun li Diose. Yuꞌun muc bu schꞌunic li cꞌusi iꞌalbatique.
9Acꞌo mi iyilic chaꞌvinic jabil li cꞌusi ispas li Dios ta stojolique, ep ta velta istoy sbaic ta stojol.
10Jaꞌ yuꞌun li Diose iꞌilin ta stojolic ta scoj ti jech ispasique. Jech iyal: “Yuꞌun jech o yoꞌonic ti mu scꞌan schꞌunic li cꞌusi ta xcalbeique. Mu scꞌan xtalic li yoꞌ bu lequil be cuꞌune.
11Jaꞌ yuꞌun chiꞌilin yuꞌunic. Ta xcal ti ta jꞌechꞌel mu xa bu ch‐ochic ti bu caloj ti jaꞌ te ta xcux yoꞌonique”, xi li Diose, xi tsꞌibabil.
12Li joꞌoxuc li coꞌol quichꞌojtic ta mucꞌ li Jesuse, qꞌuelo me abaic. Mu me chopluc avoꞌonic eꞌuc ti chavictaic o li batsꞌi cuxul Diose ta scoj ti mu xachꞌunic ti jaꞌ chascoltaique.
13Jaꞌ yuꞌun scꞌan ti scotol cꞌacꞌal chatsatsubtasbe aba avoꞌonic ti cꞌalal oy to cꞌuxubinele, yuꞌun naca me jaꞌ chꞌayanic o ta scoj ti chaloꞌloatic to yuꞌun li cꞌustic chopole.
14Yuꞌun mi staoj o yav coꞌontic jchꞌunojtic o cꞌalal ta slajeb cꞌacꞌale jech chac cꞌu chaꞌal lic jchꞌuntique, jaꞌ yuꞌun coꞌol chijcuxiutic o sbatel osil jchiꞌuctic li Cristoe.
15Jaꞌ yuꞌun tsjules ta ajolic li Chꞌul Espíritue: Mi la avaꞌiic la scꞌoponoxuc li Dios li avie, mu me xapasic pimil jech chac cꞌu chaꞌal la spasic pimil ta voꞌone li jtotic jmeꞌtic ti muc bu schꞌunic li cꞌusi iꞌalbatic yuꞌun li Diose, xi onoꞌox tsꞌibabil.
16¿Buchꞌutic scꞌoplalic ti jech muc bu schꞌunic li cꞌusi iꞌalbatic yuꞌun li Diose? Jaꞌ scꞌoplalic scotol li jtotic jmeꞌtic ta voꞌone li iloqꞌuesatic talel ta jtunel ta Egipto yuꞌun li Moisese.
17¿Buchꞌutic scꞌoplalic ti iꞌilintaatic yuꞌun li Dios chaꞌvinic jabile? Jaꞌ li jtotic jmeꞌtic ta voꞌone li chopol li cꞌusi ispasique jaꞌ yuꞌun te ichamic ta taqui jamaltic.
18¿Buchꞌutic scꞌoplalic ti iꞌalbatic yuꞌun Dios ti ta jꞌechꞌel mu xa bu ch‐ochic ti bu yaloj ti ta xcux yoꞌonique? Jaꞌ li jtotic jmeꞌtique yuꞌun muc bu schꞌunic ti chcoltaatic yuꞌun li Diose.
19Jaꞌ yuꞌun chquiltic ti jaꞌ ta scoj ti muc bu schꞌunic ti mu xa bu ch‐ochic ti bu scꞌoplal albil chcux yoꞌonique.
