1Kwa javyo umwe, wanduzangu watakatifu, wenzangu titiwe mbinguni, akuyerini Insa. Iye ndi walii na nlongozi wetu nkulu wa dini yatiri kwereza‑yi.
2Kamba Musa vyaákiwa mwaminifu na kazi yake nnyumba ya Mwenyezimungu, na Insa ákiwa mwaminifu ka Mwenyezimungu mwenyé kuntondola.
3Musa kasifiwa, fala Insa kawoniwa kuwa ndi wakujúzi kusifiwa pakulu zaida ya iye, kamba njengi wa nyumba vyaasifiwa pakulu koliko nyumba yawenye.
4Kamana kila nyumba ítengeziwa na munu, ila atengéza vinu piya Mwenyezimungu.
5Musa ákiwa ntumisi mwaminifu nnyumba ya Mwenyezimungu piya, kalavya ushahidi wa vire víkija kwereziwa mbere.
6Fala Insa Almasihi mwaminifu kamba mwana, amiri wa nyumba‑yo. Na nyumba‑yo ndufwe, ikíwa tizídi koloka mpaka mwinsho, na hakika na kwamini nkati ya tamaa yatirindira.
7Kwa javyo, kamba vyaamba Roho Takatifu javi: “Rero, mukisikira shauti ya Mwenyezimungu,
8myoyo yenu musitaye ugumu, kamba wababu zenu pawâbishane nami, suku yawâniyerere nlanga.
9Emo wababu zenu wâniyerera waniwone canikisaka kutenda, ingawa wâwona vyaniwasaidiye muda wa myaka arubaini.
10Ndimana níkimiwa na noco kizazi‑co, nikisowera javi: ‘Daima wankukosa mmyoyo mwawo, wakatala kufulata njira zangu.’
11Kamba vyanílapire paníkimiwe, nikamba: ‘Awaja kwingira mahala pangu papumuzi.’ ”
12Wanduzangu, more-more asilawirire munu nkati yenu wakuwa na moyo mbaya wakutowa kwamini, wakulongoza kukatala kunfulata Nlungu hai.
13Kwasa javyo, zidini kurimbisana myoyo kila suku sambi nopa pamwitiwe‑pa, ipate asilawirire nkati yenu munu wakutaiwa moyo ngumu, wakuteseka na dambi.
14Kamana kwamini kwetu katiwere nawo tangu mwanzo, tikizidi koloka mpaka mwinsho, tilawirira kuwa wenziwe Almasihi nkati ya kazi yake.
15Ndi kamba vyayambiwe: “Rero, mukisikira shauti ya Mwenyezimungu, myoyo yenu musitaye ugumu, kamba wababu zenu pawâbishane nami.”
16Epa wasikire shauti ya Mwenyezimungu wakibishana naye ndi wepi? Kusema kweli, sipiya walongoziwe na Musa kulawa Miswiri?
17Na ware Mwenyezimungu waakimiyane nawo muda wa myaka arubaini ndi wepi? Siware wakorire dambi, wakifwira nlanga nomo?
18Na paalapire kuwa “awaja kwingira mahala pangu papumuzi”, waakiwamba ndi wepi? Siware watupire kauli zake?
19Basi, tereriwa kuwa awakidirire kwingira kwa sababu ya kutowa kutumaini.
