Hebrew vene 3

1

2

3

4

5

6

7

8

9

10

11

12

13

¹Mina dada, usika ourena kikifa, kaere Sei yaku unasa raka niyo, nifeidena amiye ma Sei ma amiye utari naivo amiye tora, kaere di roka bi Iesu Keriso, mokei mona refa. Uni mokena vari gira ina rofu aena niogau reyafa.

²Iesu bi omaro amiye rofu vegu rama reyo, Moses ka Sei di yava vene tauri naivo regi vegu rama regamo kana.

³Adina yava akudo amiye emagui rei tora redo, idu yava iniye bi de. Mina ida yokoi makari, Moses bi Iesu kana de, ina bi rama emagui rei tora redo.

⁴Adina amiye yokoi yokoi yaku yava neinei akudedi—idu beika baika noibanu akuyo amiye bi Sei.

⁵Kamini naivo reyo amiye kana, Sei di yava tauri Moses yaku moimai regi vegu rama reyo, ye makai gabi beika baika rofu ago nigedi, mina fafau niokugamo.

⁶Idu Keriso bi mida kana, Sei di yava fafau ini moimai regi vegu rama redo. Ma ori de dudu, uni mokena buni ma uni uka mokena nivasena rena moi gira rigifa vonisi, ye una bi ini yava.

⁷Mina dada Vima kikifa niyo kana: “Ini goroka gua neidegedi vonisi,

⁸Ebene reyo medari gagani autu sanari, ina vene yaku ruda reyadi kana yi uka meko moi gira ga ribifa.

⁹Mironari yi aufakai na ebene reyadi, mina mo lagani 40 ri gokai vegu na yaku reyaka bi veyadi.

¹⁰Mina dada mina tutubena vene rofu gubuyo resi niyaka, ‘Ina vene toga toga ini uka mekori kokofu resi nai vegu ida diba de nidedi.’

¹¹Nai gubuyo resi yomakai nitore reyaka: ‘Nai asa moina sana bi dui de regedi!’”

¹²Usika ourena, vei mona refo, uka no mokena vari gira de aena yi ideri amego baebu, ye ameibobigo Sei gutuna yarena rofu ya ourefeidego dada.

¹³Idu ari neineiri ya kaya ya kaya egira rebifa, “Gua” vo nidedi ituari, ye vegu no di ofa ago yaku ya yokoi di uka moi gira ga riyaine dada.

¹⁴Adina una yaku siko ori de dudu, mokena buni metonari moi gira rigifa vonisi, ye una bi Keriso sa moimai regifa.

¹⁵Yomakai niyo kana: “Ini goroka gua neidegedi vonisi, ruda reyadiri kana yi uka meko moi gira ga ribifa.”

¹⁶Adina ago neidesi ruda reyadi vene bi kaere? Rama bi kaere Moses yaku ina vene tau vakoi ourefeideyo ma Egypt gagani fereyadi.

¹⁷Ye kaere rofu lagani 40 fuofuori gubuyo reyo? Mina bi amiye kaere vegu no resi gagani autu sanari keto resi muyeyadi.

¹⁸Ma mina vene kaere rofu nitore reyo bi ini asa moina sana dui de regedi bi kaere? Bi mina de neideyadi vene.

¹⁹Mokena vari gira de aeyadi dada, gaganiri dui de reyadi ma mina vesifa.