1Walewalehiu waiwoiyawami, taumi po tau Yaubada e ototugeta yada binei. Yesu ona inugohiyahiyaweya, po ona kawamoineya babana tauna ata witumagana tu wituwetuwegena po gasi ata tu witalaguyaba banei dumana,
2po a bagibagi Yaubada i weleweleya binei i ileta, naka pitenana gasi odubona Mose Yaubada a numa uyahina i ileta.
3Ma Yesu wotalagae baneina i tuhagaya, ma Mose wotalagaena i habulu. Galenahi mei numa dewadewana babana numana apega hina huneya, ma tu wogona apo hina huneya, ma Yesu tauna tu wogo.
4Tu lunuma emosi po emosi he memae, ma Yaubada tauna ginouli atapuhi tu wiwawalihi.
5Mose Yaubada a numa i iletaya ipa apo Yaubada a baha ina paligeleteya po amaka i bahena geletehi po tauna mei tu bagibagi.
6Ma Keliso Yaubada a u numa i ileta ega mei tauna tu bagibagi ma tauna Yaubada Natu dumana po a numa tu galena itetena. Tauta Yaubada a numa hota ma ipa tana inugonugotuhu lagona anai nugokadidilita po anai kaohata.
7Uyahinei Alugo Woiyawa i paliweleta Yaubada i ibaabani i pa, ‘Amalai ipa ponau ona nonoli,
8ega ipa ona nugonugokapala po mei googami odubona hoi balabala yabayababa hi laudadaniu ma u lugagayo hi ihinigigiyehi.
9Babana bolima magouhi 40 u hinehi u bagibagi waipoyahi atapuhi a iatatiyehi ma googami hi wobahabaha po gasi hi laudadaniu.
10Ubeihi ma a lukamna apapoe, po ega yaka a pa, “Amaka ma tauhi hai nugotuhugei hina ineneyabayababa, babana u tahaya ega hita hanapugehi.”
11Ega yaka a luuyogigiyehi po a paligubahi a pa, “Apega tau u ani wiyagohina uyahina ona lui mai.” ’
12Walewalehiu, omi winugonugotuhu ona galena itetehi meka po apo apapoe ina weluwinimi ma witumagana tahayana ona nehaleya po ona welupowa ma Yaubada waiyautuna ona meliya haleya.
13Yaka geka ‘Amalai’ ona ikadidila memi iyeta emosi po emosi uyahihi, meka po apo dewa apapoena uyahina ona welupowa ma ona nugokapala.
14Tauta lolowa ata witumagana Keliso uyahina ta houni, ma apo ata witumagana ta womomohi yaka houga anani kokoe uyahina, Keliso mitehi ta kaoha gogona.
15Naka pite Yaubada a baha i pa, ‘Amalai ipa ponau ona nonoli, ega ona nugonugokapala po mei googami u lugagayo hi ihinigigiyehi.’
16Iyawoi Yaubada a baha hi nonoli ma he ihinigigiyeya? Naka tauhi mei Mose Isipitagei i tahaehi ma hi gelegeletai, bo?
17Ma tauhi bolima magouhi 40 u hinehi hai dewa apapoehi bihiyei ma Yaubada i luuyogigiyehi po hi hilage hoi balabala yabayababa hai apapoe ubeihi.
18Tauhi hai wiponahahalena binei i paligubahi i pa, ‘Apega tau u ani wiyagohina uyahina ona lui mai.’
19Uyahinei ta galena tuhagaya tauhi ega hita luilui, babana ega hita witumaganeya.
