1Mitiŋic âgofâc‐nane, sambâŋte mâmâc hefârec‐ŋopakicne, ŋoŋe miti kiŋaŋ ŋic â taha bapa sâko Jesu, ʒâŋene murâ rereŋ eeŋgopeneŋ, erao findendeŋnenʒepieŋ.
2Eki gie runere mume rereŋ juwec, Mosezi Anuture ficko juwec irec sâc juwec hâcne.
3Fic baekac ere ʒâŋe biŋezi ficte ʒâŋe biŋe jâuruekac, sâc ijaha Jesu ʒai ʒonʒoŋ‐ticnezi Mosere sirickekac.
4Ficne ficne i bâbâfua‐ticnehec, wiac sasawa irec bâbâfua ine Anutu.
5Mose e Anuture ficko jufârehuc mume rereŋ gie bawec, i dâŋ ʒâhec fufuanere biŋe muocte kiŋaŋ qaqa juwec.
6Kristo e ine Ŋokâzi fic rune jukac. Ficticne nâŋâc hâcne. Erâ i mâc mâcne, wiac biŋe qanârekicne irec mamanac paŋʒâic â bubiaŋko juhapene taraocmu, ine ficticne eŋgopeneŋ muzo.
7Irec Tiri Mârozi dâŋ ʒiŋuc muwec i nâŋâcne biŋe ekac: “Ŋoŋe miŋecgac dâŋticne manaŋgopieŋko,
8tuhuo eesâic fuame aaricko ekicne, maŋsanaŋ iŋuc mi enʒepieŋ.
9Mimiŋnefâc‐ŋeŋic jaŋe ira wiac bapa‐nane jara 40 honembiŋ, erâ sifu pepecne enarehuc esâicnumbiŋ.
10Eme no irec manape gâpâreme jaŋere ʒiŋuc mupo: ‘Jaŋe maŋjeŋiczi raŋɋa raŋɋa qâsorieeŋgopieŋ, jaŋe nore hata moc mi hone manac embiŋ.’
11Iŋucte kimbeŋ qajarehuc mumupaŋ dâŋ ʒiŋuc mupo: ‘Jaŋe nore jujumana hae mâreŋko moc mi raʒinʒepieŋ’.”
12Âgofâc‐nane, ŋoŋeraonec moc e miti qikiŋnehuc maŋ gâgâpâc erâ Anutu jujune râpeckezacte soŋaŋ babac ehuc junʒepieŋ.
13Erâ ʒoaŋne ʒoaŋne miŋecgaczi miŋegac forahuc juocmu sâc faŋ qaqac enʒepieŋ, sâqocnere eeatuczi ŋoŋeraonec ŋic moc ecneme maŋbâzic ezackohec.
14Nâŋâc Kristore miti kâdoc babaju, ine fuŋkehuc manasiŋkembeŋ mamanasiŋ i paŋnea bajuku mao fisinaŋmuzi eŋgopeneŋ.
15Dâŋ ʒiŋuc fokac: “Ŋoŋe miŋecgac dâŋticne manaŋgopieŋko, aaricko ekicne, maŋsanaŋ iŋuc mi enʒepieŋ”,
16ine weni jaŋe dâŋticne mana‐bipiehuc aaric bâfuambiŋ? I mockoneczi mâcne, Mosezi micne bajareme Aigita mâreŋkonec warembiŋ ŋicguru i sasawa jaŋe hâcne.
17Me weni jaŋere Anutuzi maname gâpâreme jara 40 tarawec? I sâqocne bahuc mâreŋ tuhuo hâmo sipiric embiŋ jaŋere hâcne iŋuc ewec.
18Erâ weni jaŋere mumupaŋ dâŋ ʒiŋuc muwec: Nore jujumana hae mâreŋko mi raʒinʒepieŋ? I dâŋticne qahuc jumbiŋ jaŋere hâcne muwec.
19Irec ʒiŋuc honeŋgopeneŋ: Jaŋe miti qiqikiŋ‐jeŋicte quŋkerâ mi raʒimbiŋ.
