Ibra 3

1

2

3

4

5

6

7

8

9

10

11

12

13

¹Ogonante cecinngayn Barjosa eelimenam kashimayna, gaza maataana imbanaanato, Barjodar woylamin wosa qajidin goynsa Barjoyn yittsaa gudullasa gebhaa Yesusam bhocchee.

²Muse Barjo oonin wulir woylam yindar qajadhea kinin dohondettsi, Yesusaar yiam kamayse wodaa Barjokal woylam yindar qajadhea ki maatade.

³Ooninam woysea oonindara sagi kisa gobshi dohondettsi, ogodettsi Yesus Musedara sagi gobshi yiam zaskea maatayse ki haapadhade.

⁴Ooni wul koam woysaa eedi daane; yerin wulam ashkaa Barjone.

⁵Os birante giidhen yerinna tarja maatota Muse Barjo oonin wulsa waadima eedi dahayse woylam yindar qajadhea ki maatade.

⁶Kiristoos Barjosa Naasi dahayse Barjo oonin wottsadhenka woylam yindar qajadhea ki maatade. Wodiar Barjosa oonine; kisa ooni wonin maatayno wonin woylam qajenbee qaabe daran hayayse woninka erimayna yerrabeam wocchinsayse wonin yedenkane.

⁷Ogonante Manpas Gazanin giyendettsi, “Kina kisa upsinam ye qansidianna,

⁸darante yesa eykena iam taysayse kenin shedenka iam kenin dhagattsondettsi yesa woylaminam wocchinseebhode.

⁹Ogote eykena yenna iam taysate ke shedade; eedi lamaa kaysa levena inin waadadhonam ke haapade.

¹⁰Ogonante ogo wodanka dahaana eenaam i wacimade. ‘Kesa woylammo rooro wul koda dhaddhise; isa goynamaar kedi dhesadehe’ i hamade.

¹¹Pir ‘Inin imen ukunsen raqinte hamin ko dahaakaar kedi ardehe’ hamayse isa wacimenka inta mallidine” hamayse ko giyade.

¹²Imbanaanato, yesa iira hayyear lay dehea Barjokala pegisea siyabee kidar woylamin qajima woylambe konin doamadettsi mete yesaam gishee.

¹³Kalon yesa iira hayyear seesoka taysadhayse yisa woylaminam kinin wocchisoamadettsi, “kina” hamayse kinin eldhaa rooroayn dohonka yekka rooroa rooroaka kinka kiam kiam kiilee.

¹⁴Harrna hambhidianna, birayse wosa dohon Barjodar woylamin wonin qajenam macchinka yekka wocchinsayse wo yedanna, Kiristoosbesana kashimayna wo maatade.

¹⁵Ogonoar “Kina kisa upsinam ye qansidianna, yesa eykena iam kenin dhagattsondettsi yesa woylaminam wocchinseebhode” ko hambhade.

¹⁶Igina kisa upsinam qansayse kiam dhagattsaana haybene? Igina Muse keam entsaysaka Gibth peera utaana wultayu?

¹⁷Barjoar eedi lamaa kaysa levena yindar wacimaana igina haybene? Igina seeson hayaana, yisa leesinin darante dhambayse shidhaanatayu?

¹⁸“Inin kena imen ukunsen raqinte ardehe” hamayse kedar kinin mallaana haybene? Igina kina ee hamimina eenatayu?

¹⁹Ogonante Barjo kena imen ukunsen raqinte ardana kenin damaammo Barjodar woylamin kenin qajea kesa qolmon goynka konin dohonam woda haape.