HEBREOS 3

1

2

3

4

5

6

7

8

9

10

11

12

13

¹Por neguin yra de ne che wbetxee xdol de no ne wye Dëdyuzh de por ne gak de xpén Ne, gukanzaleedx Jesucrist, laa Dëdyuzh wxaal Ne gyëzlyu no laa Ne nak fxuz ne mazre nondee zegne rlaleedx be.

²Wlaa Jesucrist yrandxee ne rlaan Dëdyuzh, laa Ne wzu Jesucrist por ne ylaa Jesucrist xdxiin Ne zegne wlaa Moises yrandxee ne rlaan Ne, wlaa Moises dxiin lo yra men-Israel.

³Per Jesucrist nak ne mazre nondee ke lo Moises, zegnak men ne rlep yuu, nondee men ke lo yuu ne rlep men.

⁴Yrandxee yuu syemper mén rlepo, per le yrandxee ne nuu, Dëdyuzh nak ne wzhexkwaa we.

⁵Wsalzaandet lextoo Moises wlaa Moises dxiin lo yra men-Israel, wak Moises zegnak te mos, wzëët Moises lo men-Israel yra ne gyed yzëët Ne.

⁶Per le Jesucrist XPee Dëdyuzh nak Ne, rlaa Ne yrandxee ne rlaan Dëdyuzh, laa Ne raknonen xpén Dëdyuzh. Laa be yra be nak xpén Dëdyuzh belne ysalzaandet be ne rkalo be Ne ydeblo ne mbán be no belne ysalzaandet be ne rzhiilen be porke che nanwen be ne nuu ne ykakwent be.

⁷Por neguin ka lo xgyiich Dëdyuzh ledne re Espíritu Sant: Belne gon de xdiiz Dëdyuzh nedxeree,

⁸ytsowndípdet lextoo de zegne wlaa yra men ne wondet diiz chene wlaa men preb Dëdyuzh denbidx.

⁹Nga wlaa yra xpenkwlal de noo preb, no mase txuplal iz wii men yrandxee ne wlaa noo nes lo men, re Dëdyuzh.

¹⁰Por neguin nak ne wlayaa noo lo men, lex re noo: “Noze zere zerotee nuu lextoo men, rlaandet men ynebeey men xnëz noo.”

¹¹Por neguin laatee ne rlayaa noo, wgon noo ne axtegue nunk teedet men yne men ledne wsanla noo ne yne men.

¹²Yra de ne no de rlaleedx Jesucrist, gugap kwent chen ni te de gakmaldet lextoo ne ysalzaan de ne rlaleedx de Dëdyuzhmbán, koleedxdet de Ne.

¹³Sinke yzhe yzhendxee gugulsaa lextoo de te te de ydeblo ne nak “nedxeree” ne rakzëët lo xgyiich Dëdyuzh, chen nganaa ysegyeedet dol lextoo de ni te de ne gakndíp lextoo de.

¹⁴Porke xpén Jesucrist nak be belne ysalzaandet be ne ykalo be Ne ydeblo ne ybán be zegne wkalo ke be Ne axtegue ne wzelo be ne nak be xpén Ne.

¹⁵Zegne che ke re lo xgyiich Dëdyuzh: Belne gon de xdiiz Dëdyuzh nedxeree, ytsowndípdet lextoo de zegne wlaa yra men ne wondet diiz.

¹⁶¿Txuzh nak ne wondet diiz chene wluzh won men xdiiz Dëdyuzh? Yrandxee mén ne wruu Egipto chene wboo Moises men, men guin ne.

¹⁷¿Txu lo wlayaa Dëdyuzh txuplal iz? Lo yra men ne wye dol, yra mén guin wet men denbidx.

¹⁸¿Txu lo wgon Dëdyuzh ne axtegue nunk teedet men yne men ledne wsanla Dëdyuzh ne yne men? Lo yra men ne wondet diiz.

¹⁹Zeree nak ne ryenen be ne wakdet gan ndxiin men ledne nne men porke wlaleedxdet men ne re Dëdyuzh.