1Mire sentna phralale, save san vičimen le Devlestar, dikhen pro Ježiš – pro apoštolos the Nekbareder Rašaj amare pačabnaske.
2Ov hino verno Oleske, ko les andre oda ačhaďa, avke sar o Mojžiš sas verno andre calo kher le Devleskero.
3Le manušes, savo ačhavel o kher, hin bareder pačiv sar ole kheres, avke the o Ježiš peske zasogaľinel (zaslužinel) bareder pačiv sar o Mojžiš.
4Bo dojekh kher mušinel vareko te ačhavel a oda, ko ačhaďa savoro, hin o Del.
5The o Mojžiš sas verno andre calo kher le Devleskero sar služobňikos a svedčinelas pal o lava, so o Del pozneder kamľa te vakerel.
6Ale o Kristus hino verno sar o Čhavo upral leskero kher. A leskero kher sam amen, te doľikeraha zoraha o pačaben the užaripen (naďej), saveha pes lašaras.
7Vašoda, avke sar phenel o Sentno Duchos: “Adadžives, te šunďanas Leskero hangos,
8ma phanden andre tumare jile, sar oda kerenas ola džene, save pes vzburinde andro džives, sar pokušinenas le Devles pre pušťa,
9akor, sar tumare dada man furt probaľinenas (skušinenas), choc saranda (40) berš dikhenas oda, so keravas.
10Vašoda ačhiľom choľamen pre oda pokoleňje a phenďom: ‘Furt hine le jileha avrether a mire droma na prindžarde.’
11Avke andre choľi diňom lav: ‘Čačes na džana andre miro odpočinkos!’ ”
12Den pozora, phralale, hoj te na el varekas tumendar nalačho the napačabnaskero jilo a te na pes visarel le džide Devlestar.
13Ale sako džives tumen zoraľaren jekh avres, medik hin časos, so pes vičinel “adadžives”, hoj le klamišagoha ňikaske o binos te na zaphandel andre o jilo.
14Se amen keras e buči jekhetane le Kristoha, ale ča akor, te zoraha doľikeraha dži ostatkos oda pačaben, so amen sas anglunestar.
15Hin phendo: “Adadžives, te šunďanas Leskero hangos, ma phanden andre tumare jile, sar oda kerenas ola džene, save pes vzburinde.”
16Ko sas ola manuša, save šunde le Devleskero hangos a vzburinde pes? Či na sas oda ipen ola džene, saven o Mojžiš ľigenďa avri andral o Egipt?
17Pre kaste o Del chalas choľi saranda (40) berš? Pro manuša, save kerenas o bini a lengere ťela mule avri pre pušťa.
18Kaske o Del diňa lav, hoj na džana andre leskero odpočinkos? Či na olenge, save les na kamenas te šunel?
19Avke dikhas, hoj našťi gele andre, bo na pačanas.
