Hiburu 3

1

2

3

4

5

6

7

8

9

10

11

12

13

¹Ke gua asa, kasa tasiqu koe Karisito, gamu pu ele somana ta tioko koe Tamasa, si mi va sotoa sa mia rinaṉeraṉe koe Zisu Karisito, sapu ele garunu mae nia Tamasa pude na Ṉati Hiama Kenukenue, sapu va hinokaria gita.

²Ele nabulu nia Zisu meke va gorevura ia Sa sa nana tinavete kekeṉoṉo gua tugo e Mosese sapu nabulu nia sa Tamasa meke va gorevura ia sa sa nana tinavete pa korapana sa vetu te Tamasa.

³Ba padana Zisu pude tava lavata hola nia se Mosese. Kekeṉoṉo gua sa vina lavata sapu ta vala koasa tie kuri vetu, si noma hola nia sa vina lavata sapu ta vala koasa vetu.

⁴Ura sari doduru vetu si koa dia tugo tie kuridi, ba asa sapu kuridi sari doduru likakalae, si e Tamasa mo.

⁵Ego, se Mosese hie si nabulu va gorevura nia sa nana tinavete koasa vetu te Tamasa. Helahelae ni sa sari tiṉitoṉa pu kote zama ni Tamasa vugo repere.

⁶Ba e Karisito sa Tuna si nabulu va gorevura ia Sa sa Nana tinavete koasa vetu te Tamasa sa Tamana. Gita na tie te Tamasa si na vetu Tanisa, be turu va nabu si gita koasa nada vinarane meke koari na tiṉitoṉa pu helahelaeni gita pa nada rinaṉeraṉe.

⁷Ke gua sapu zama nia sa Maqomaqo Hope, “Be avosia gamu sa mamalaiṉina sa Tamasa ṉinoroi,

⁸si mi lopu va ṉiṉirai sari na bulomia, gua sapu tavetia rina tiatamamia pukerane, sipu va karia rini sa Tamasa, meke podekia rini si Asa pa soloso qega.

⁹‘Sari na tiatamamia pukerane si podepodekau rini si Arau, ba koari ka made ṉavulu vuaheni si dogori rini gua sapu taveti Arau, ba lopu boka va hinokarau rini.

¹⁰Gua asa ke ta ṉaziri ni Rau si arini, meke zama si Rau, sari bulodi si taliri va seu koa Rau, meke korodia luli rini sari Qua hiniva.

¹¹Ke pa Qua tinaṉaziri, si zama tokotokoro si Arau sapu guahe: Lopu kaqu kamo ia rini sa Qua vasina magomagogosoana,’ ” gua si Asa.

¹²Kasa tasiqu koe Karisito, mi kopu puleni gamu, pude lopu keke koa gamu si va karia se Karisito, meke taluarae taloa koasa Tamasa toana.

¹³Ba mi variva ṉiṉirai doduru rane pa mia tinoa sipu korapa toa si gamu, pude loke tie gamu si tava ṉira sa bulona koasa kinaleana.

¹⁴Ura gita si somana tagoi sari na ginugua leadi te Karisito, be tuqe va nabu si gita koari na tiṉitoṉa pu ele va hinokari gita pa podalaena, meke osolae kamoa vinabetona.

¹⁵Gua sapu ta zamae pa Kinubekubere Hope sapu zama guahe: “Be avosia gamu sa mamalaiṉina sa Tamasa ṉinoroi, si mi lopu va ṉiṉirai sari bulomia; kekeṉoṉo gua rina tiatamamia pukerane pa soloso qega, totoso kilua rini sa Tamasa, meke sari Nana tinarae,” gua.

¹⁶Ego, ari sei tu sapu ele avosi sari na zinama te Tamasa, ba lopu hiva luli rini? Lopu arini tu sapu turaṉa vurani e Mosese pa popoa Izipi sari? gua.

¹⁷Sarini tugo mo sapu ta ṉaziri ni Tamasa koari ka made ṉavulu puta vuaheni! Meke ari kasa tugo mo sapu evaṉi sari na kinaleadi, meke mate beto pa soloso qega!

¹⁸Meke koari sei si zama tokotokoro sa Tamasa sapu lopu kaqu kamo si arini koasa Nana vasina magomagogosoana? Lopu koarini pu kiluna Sa tu sia?

¹⁹Gua asa ke gilania gita sapu lopu kamoa rini sa popoa magomagogosoana, sina lopu va hinokaria rini sa Tamasa.