1Na taman dad flanekgu di kafaglut, du gamu tanalék Dwata i mnè di safédan di langit di fulé duh, tooyu fandam Dyisas, du kenen sa dek Dwata salu di tah tanà ani, du fye mbaling kenen mdatah baito di kafaglutito.
2Too mimen Dyisas Dwata di kdee fimoan kenen gambet i kimen Mosis di kifatan i dad to Dwata.
3Kabay di fandam Dwata mdatah fa Dyisas di ku Mosis salngad i kdatah to mimò i gumnè di gumnè i nimoan.
4Hae, gadeito ku nun gumnè, nun to mimò dun, na i mimò i kdee dunan Dwata.
5Na Mosis, too kenen mimen Dwata di kifatan i dad ton, du salig Dwata. Én nimoan tulenan di dad to i kaglut i man Dwata di kenen.
6Kabay Dyisas Krayst ise alò salig Dwata, bay Tingaan. Na too kenen mimen Dwata di kifatan i dad to Dwata, na gito i dad ton ku fadlug ito di kafaglutito di ku Dyisas, na ku là ito myà tmulen gablà di fatanito di kasfuléan.
7Na taman too ito mimen i fngewe i Mtiu Tulus fsulatan, manan, “E gamu, toogu fanlinge i man Dwata di gamu di duh ani,
8na nangyu fgal i uluyu, salngad di mgimò i dad gutambulyu di knangla Dwata klola tmilew kenen di knèla di banwe gulandè to.”
9Du gman Dwata manan, “Klo fat falò fali balù tateen dad gutambulyu dee too fye mgimògu di dale, knean tnilewla agu, du neyela ku tan kaftahàgu i nawagu di landè ksaligla deg.
10Taman, too agu flabè dale, na mangu, ‘Ale i dad to fasyat i nawala, là ale mayè mimen i dad knayègu.’
11Taman du too agu flabè nun fakanggu, mangu, ‘I dad to ani, là ale sa gfusuk di banwe gufaftudgu dale.’ ”
12Taman dad flanekgu, too gamu fafye, du fye landè di gamu nun sasè fandam i là mayè mimen Dwata i gamgebe gamu di ktagakyu Dwata i too mto.
13Kabay ani, du fye landè di gamu mafgaw i salà na mbaling mgal ulu, i balingyu nimò, satgal gamu nawa klit i duh di nun gdè bangyu mlinge i talù Dwata.
14Du ku tooito smalig di Dwata gambet i tnanin ksaligito di kenen, kel di gusen i kneito di tah tanà, nun alelito di kdee nfun Krayst Dyisas.
15Lêmangu nulit i man i Mtiu Tulus, manan, “E gamu, tooyu fanlinge i man Dwata di gamu di duh ani, na nangyu fgal i uluyu salngad di mgimò i dad to gutambulyu di knangla Dwata.”
16Simto kè i dad to balù tamlinge ale i talù Dwata, bay knean, too mnang nawala dun? Gadeito i dad to ani dad bel Israél di kebe Mosis dale lamwà di banwe Idyif.
17Na simto kè i fanlabè Dwata klo fat falò fali? Dunan lêman i dad bel Israél. Na du too ale gamsalà fanlayam ale Dwata, na di kfatila gilè i lawehla di tanà ditù di banwe gulandè to.
18Na simto kè i dad to i gman Dwata di fakangan i là ale gfusuk di banwe gufaftudan dale? Dad to bel Israél sa lêman i là mimen Dwata.
19Taman i gugamlabatito là ale gfusuk di banwe gufaftud Dwata dale, du là ale mayè faglut na smalig di kenen.
