Hebru 3

1

2

3

4

5

6

7

8

9

10

11

12

13

¹Gem kol siŋtay, ɗo saan taar-an, diyon pikirriko ɗo Iisa Masi. Ka seener, ku kuuniy gee ku Buŋdi ho ŋa koliŋko a ku ɓaayiy goye ka samaaner. Diŋ gay, pakiroŋ ɗo Iisa Masi, ŋaar gay tabiriikar ka Buŋdi ho ŋaar ko *mee satkiner ka tatko ɗo imaan taat gi gaariyo.

²Awalle, uudin taat Muusa ginit riy taat gaara kadar Buŋ nec amniyin̰ji ɗo geriy okin̰ji, Iisa oki gaar kadar Buŋ kaak diyig ɗo riyor-ak nec amniyin̰ji.

³Ka seener, ar kaak ŋu jaaliig siŋ ku gem kaak pina gero pak ger meen̰ji, Iisa oki, ŋuu jaalin̰ siŋji kuwa pak Muusa.

⁴Geray okin̰co gin gay pinin̰co. Kar ŋaar kaak pinig gamin okin̰co gay, ŋa meen̰ji Buŋ.

⁵Muusa gay, ka seener, ŋaar nec a Buŋ yaa amniyin̰ji ar gay riyoy ɗo *ger ka Buŋdi okin̰ji. Riyoy-at ta gaare ɗo geemir kaaw taat Buŋ asiy kaawe neginda.

⁶Kar Iisa Masi gay, ŋaar nec a Buŋ yaa amniyin̰ji ar Roŋ kaak goy ɗo kaay ka ger ka Buŋdi. Kar geriy-ak gay, ŋaar ginte, ya gi zeeɗa obe tirit ɗo imaante ho ɗo maan kaak gi eriyo. Maan kaak gi eriy-ak ɗeŋraate gi kaawiy bal kolaw ɗo uŋco ka geemir.

⁷Ɗo saan taar-an, uudin taat Ruwwin ta Buŋdi kaawiy aman : « Ƴiriyta, ya ku cokiyaat gaaƴ ta Buŋdi,

⁸dakoŋ tirin̰coɗo ɗeŋginko ar kaak aginiyko gintu ɗo wiktin taat ŋu poociiga ho ŋu geciig ɗo goosiner.

⁹Ka seener, Buŋ kaaw a ɗo menaw-ak, aginiyko talig gamin okin̰co kuuk nu gintu ɗo elgin kuuk orok pooɗ. Kar iŋ taar-at oki, ŋu poocintu ho ŋu gecintu.

¹⁰Ampaa ko, adir nigtu iŋ gee-aku ho nu kaawtu aman : ‟ Gee-aŋ, pikirrico jaga jagen di. Ŋu bal ibinin̰ maan kaak nu eriy minninco. ”

¹¹Ansii ko, iŋ adir ka nige-ak, nu togiltu aman : ‟ Ŋu un̰jaaɗo tak-tak ɗo wer ka jamiyner kaak nu siyiico ! ” »

¹²Gem kol siŋtay, goyoŋ goɗom, paa waan minninko adiy yaa gine pondiko nam ŋa aaminiyɗo ho ŋaaji newse kop ɗo Buŋ kaak goy mento.

¹³Kar gay, kun kawta, iskiguwoŋ ziŋkiko. Ansii kat, yoo waan minninko, rasiyɗo ziŋkay a zunuubinna yaa caaciyin̰ji ho kaay yaa gine bombo. Ginguwoŋ pa ɗo wiktin taat kaaw taat a « Ƴiriyta » goy tiya misa.

¹⁴Ka seener, ya gi oba tirit yoo gaasuwa ɗo imaan taat gi gastu, ŋaar-ak, gi geen̰ji ku Iisa Masi ko.

¹⁵Ansii ko, ŋu siirtu ɗo Kitamner aman : « Ƴiriyta, ya ku cokiyaat gaaƴ ta Buŋdi, dakoŋ tirin̰coɗo ɗeŋginko ar kaak aginiyko pooctu kaawoy. »

¹⁶Ŋaar-ak, ŋuur kuuk cokiyit gaaƴ-ata ho poocit kaawoy, ŋu kun̰ waa ? Ŋu gee okin̰co kuuk Muusa imiltu min darre ta Meser.

¹⁷Ɗo elgin kuuk orok pooɗ, Buŋ, adiy nigtu-ak iŋ kun̰ waa ? Adiy nig iŋ ŋuur okin̰co kuuk gin zunuubinna ho mat ɗo goosiner.

¹⁸Ɗo wiktin taat Buŋ togiltu aman : « Ŋu un̰jaaɗo tak-tak ɗo wer ka jamiyner-ak », ŋa togil ɗo kun̰ waa ? Ŋa togil ɗo ŋuur okin̰co kuuk poocit kaawoy.

¹⁹Ansii ko, gi ibintu kadar gee-ak bal un̰je ɗo wer ka jamiyner-aka, asaan ŋu pooc aamniye ɗo Buŋdi.