HEBREOS 3

1

2

3

4

5

6

7

8

9

10

11

12

13

¹Hermanu ca', ne laatu zeeda tu lade cani ulee chu Dios para laa. Nga runi laguietenala'dxi Cristu Jesús. Biseenda Dios laabe guidxilayú, beda gaca be sacerdote gola stinu.

²Jneza bi'ni be irá ni biseenda Dios laabe beda guni be ndaani guidxilayú, casi bi'ni Moisés chiqué. Laca jneza bi'ni ne gupa chaahui ca xpinni Dios.

³Peru qué zanda uchaaga nu Moisés Jesús purti jma risaca Jesús que laabe, zanda gabi nu casi ti yoo, jma risaca xpixuaana ni que cani runi si dxiiña ndaani ni.

⁴Irá yoo napa xpixuaana', peru Dios nga xpixuaana irá xixé ni nuu.

⁵Dxandí bi'ni Moisés xhiiña Dios xpixuaana jneza, ne gupa chaahui ca xpinni be, ne uní' ni gudxi be laa iní', ni chi tidxi be binni.

⁶Peru Cristu la? Xiiñi pe Dios laa ne runi xhiiña Bixhoze jneza. Bisaana Bixhoze be laabe gu'ya be ca binni lidxi. Laanu nga ca binni lidxi Bixhoze be pa qué usaana nu de guni cre nu laabe ne cueza nu ne stale enda nayeche dxi gueda caa be laanu.

⁷Guietenala'dxi nu ra cá lu Xqui'chi Dios ni uní' Espíritu Santu. Ndi nga na be: Pa iní' né Dios laatu yanadxí,

⁸cadi guni tu ladxidó' to naguidxi casi bi'ni ca bixhoze gola tu dxi uzá ca ndaani gui'xhi ne bichiichi ca laabe.

⁹Casi na be: Idubi naca cuarenta añu bichiichi cabe naa, ne biyubi cabe pabiá' zanda gune huantar laacabe, neca biiya cabe irá ni bine para laacabe ca dxi que.

¹⁰Nga runi bidxiiche nia laacabe ne gudxe óraque: “Nisi canauchee ca binni ri'. Qué riná ca guni ca ni rabe'.”

¹¹Nga runi bidxiiche nia laacabe ne bine ti juramentu, qué ziuu dxi chu' cabe ra nudiee laacabe para niziila'dxi cabe.

¹²Yanna hermanu ca', laguuya gá laatu, cadi laca aca ladxidó' to nadxaba' ne qué guni cre tu Dios ni nabani, pacaa zaxele tu de laa.

¹³Ni guni tu la? cada tobi ulidxe stobi irá dxi laga zanda, ti cadi uchee tobi de laatu sin ganna, ne aca naguidxi ladxidó', ne ma qué ulabi Dios.

¹⁴Purti naca pe nu xpinni Cristu, pa qué icha'cha nu de ni runi cre nu, cásica bini cre nu dxi ucuaa nu stiidxa'.

¹⁵Sti tiru cusietenala'dxe laatu ni cá lu Xqui'chi Dios ra na: Yanadxí ca, pa iní' né Dios laatu, cadi guni tu ladxidó' to naguidxi casi bi'ni cani bichiichi laabe que.

¹⁶Tuu nga cuzeete be ra na be bina diaga stiidxa Dios ne qué nulabi ni. Cuzeete be cani ulee Moisés ndaani guidxi Egipto.

¹⁷Nabé bidxiichi né Dios laacabe idubi cuarenta añu uzá cabe ndaani gui'xhi que, purti qué ñaana dxí cabe de nuchee né cabe laa. Nga runi ndaani gui'xhi que guti cabe.

¹⁸Purti bi'ni Dios ti juramentu, qué zaguu laacabe ra niziila'dxi cabe saca qué nuzuuba cabe stiidxa'.

¹⁹Zacá ridu'ya nu qué ñanda ñuu ca binni Israel ra ze ca para niziila'dxi ca purti qué ñuni cre ca'.