1ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤛᤣᤛᤣ ᤁᤢᤔᤏᤠ ᤐᤥ᤺ᤱᤔᤠᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤐᤣ᤺ᤰᤔᤠ ᤗᤰ ᤁᤧᤄᤥ᤺ᤛᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤛᤣ᤺ᤰᤕᤢᤰᤔᤡᤒᤠ ᤏᤢ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤑᤠ᤹ᤀᤠᤱ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤕᤧᤛᤢ᤺ᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
2ᤔᤥᤛᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤒᤠ ᤁᤢᤀᤡᤛᤡ᤺ᤰ ᤕᤧᤛᤢ᤺ᤴᤏᤠᤱ ᤂᤢᤏᤧ᤹ ᤛᤣ᤺ᤰᤕᤢᤰ ᤁᤧᤈᤥ᤺ᤰᤐᤠᤸᤗᤥ ᤋᤠ᤺ᤰᤐᤥᤛᤠᤒᤠ ᤐᤥ᤺ᤰᤂᤧ॥
3ᤜᤡᤶᤔᤡᤴᤏᤢ᤺ᤸᤗᤧᤀᤠᤱ ᤜᤡᤶ ᤁᤧᤈᤥ᤺ᤰᤐᤧᤴ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤧᤛᤢ᤺ᤴ ᤔᤥᤛᤠ᤺ᤴᤏᤢ᤺ᤸᤗᤧᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤐᤥ᤺ᤰᤂᤧᤖᤥ॥
4ᤁᤧᤖᤧᤰ ᤜᤡᤶᤜᤠ᤹ᤃ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠᤖᤥ. ᤁᤖ ᤁᤠᤰ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
5ᤀᤠᤸᤗ ᤔᤥᤛᤠ᤺ᤱᤃ ᤁᤧᤍᤠ᤺ᤒᤠ ᤕᤧᤶᤔᤥ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤛᤣᤘᤠᤖᤥᤒᤠ ᤘᤕᤧᤖᤥ॥
6ᤁᤖ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤖᤥ॥ ᤂᤪᤡᤛ᤻ᤋᤀᤥᤒᤠ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤏᤡᤱᤛᤠᤱᤅᤡᤴ ᤔᤧᤸᤗᤧᤳᤋᤣ ᤜᤠᤱᤜᤠᤱᤅᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠᤛᤡᤖᤥ॥
7ᤂᤧᤸᤗᤧ ᤆᤥᤃᤢᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤜᤧᤰᤁᤣ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ
8ᤀᤣ᤺ᤰᤛᤠᤍᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤱᤔᤧᤛᤠ᤹ᤖᤢᤒᤠ ᤕᤧᤶᤔᤥ ᤒᤡᤑᤩᤢᤱ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤒᤠᤴ ᤁᤧᤎᤢᤱᤒᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
9ᤂᤧᤵᤔᤥ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤠᤛᤡ ᤌ᤺ᤵᤔᤠᤴ ᤔᤧᤛᤠ᤹ᤖᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤆᤥᤃᤢᤱᤒᤠ ᤀᤠᤕᤠ᤺ᤶᤒᤰᤁᤡᤴ ᤔᤧᤏᤡ᤺ᤛᤢ॥
10ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤌᤠ᤺ᤰᤜᤠ᤹ᤏᤢ ᤀᤡᤱᤃᤠ᤹ ᤀᤠᤛᤡᤰ ᤐᤥᤃᤧᤀᤠᤱ ᤐᤠ᤺ᤳᤋᤢᤱ. ‘ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤛᤍᤠᤍᤡᤱ ᤋᤠᤵᤐᤧ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤗᤠᤶᤔᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤠ᤹ᤖᤥ॥’
11ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤅᤠᤱᤗᤥ. ‘ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤔᤠ ᤋᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥’”
12ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤋᤠᤵᤑᤧ᤺ᤶᤒᤠ ᤏᤢ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤂᤡᤏᤡ᤹ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤠ᤺ᤱᤄᤠ ᤁᤧᤴᤈᤥᤃᤡᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
13“ᤀᤠᤀᤡᤴ” ᤘᤠ᤹ᤖ ᤌᤠᤖᤡᤰ ᤂᤡᤏᤡ᤹ᤃ ᤌᤡᤰᤕᤠ᤺ᤴᤎᤰ ᤜᤠᤱᤜᤠᤱ ᤔᤧᤳᤇᤡᤱᤅᤧᤶᤔᤧ᤹ ᤜᤧᤰᤁᤣᤗ᤹ᤖᤡᤰ ᤗᤠᤕᤥ᤺ᤸᤗᤧ ᤁᤢᤀᤡᤱᤗᤧᤰᤁᤥ ᤁᤧᤴᤎᤩᤧ᤹ᤀᤡᤴᤗ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤔᤧᤎ᤺ᤵᤛᤢᤴᤗᤖᤥ॥
14ᤀᤠᤏᤡ᤹ ᤋᤃᤡ ᤏᤛᤠ᤺ᤴ ᤀᤠᤈᤥᤃᤢᤶᤒᤠ ᤕᤧᤶᤔᤥ ᤂᤢᤏᤧ᤹ ᤋᤠ᤺ᤰᤐᤥ ᤀᤠᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤁᤢᤏᤢᤵᤔᤥ ᤌᤠᤖᤡᤰ ᤏᤛᤠ᤺ᤴᤛᤠᤒᤠ ᤀᤠᤒᤥ᤺ᤱᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤢ ᤗᤰ ᤁᤧᤄᤥ᤺ᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
15ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤀᤠᤒᤡ᤹ᤖᤥ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤒᤡᤑᤩᤢᤱ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎ᤺ᤵᤐᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥”
16ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢᤛᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤒᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ ᤀᤠᤳᤋᤡᤴᤜᤠ᤹ ᤔᤧᤘᤕᤧᤒᤣ᥅ ᤜᤠᤒᤠ ᤂᤧᤴ ᤔᤥᤛᤠᤖᤧ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
17ᤜᤧᤰᤁᤩᤠᤱ ᤋᤱᤒᤣ ᤗᤡᤒᤥ᤺ᤱ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴ ᤁᤧᤓᤥ᤺ᤱᤒᤠᤜᤠ᤹ ᤀᤠᤳᤋᤡᤴᤜᤠ᤹ ᤔᤧᤘᤕᤧᤒᤣ᥅ ᤀᤣ᤺ᤰᤛᤠᤍᤧᤴᤏᤥ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠ ᤔᤏᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
18ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤁᤧᤱᤄᤥ᤺ᤛᤡᤴᤗᤥ ᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤒᤣ᥅ ᤁᤢᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤔᤏᤠᤜᤠ᤹ᤏᤢᤀᤣ ᤔᤧ᤺ᤶᤒᤡ᥅
19ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤃ ᤂᤢᤏᤡ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤧᤱᤄᤥ᤺ᤛᤢᤶᤒᤠᤴ ᤀᤠᤏᤡ᤺ᤛᤢᤶᤗᤥ॥
