1Coo Pentecostés‑xøø yhabaaty, mänitä mäbøjpädøjc‑hajxy nägøx̱iä yhamugøøyy.
2Jiiby hajxy hänajty tøgooty yhäñaꞌay. Mänit hajxy miädooyy nebiä poj yhamuuyän coo møc piojy. Cøxp jaduhṉ chohṉdaacy. Møc jiiby yhawaaṉdsøøyy tøgooty.
3Mänit hajxy nägøx̱iä ñägädaacä hanidiuhm̱jaty jaꞌa Dioshespíritäm. Jaduhṉ hänajty quiähxøꞌøgy nebiä tootsän, nebiä jøønhaayän.
4Mänit hajxy nägøx̱iä yhadägøøyyä jioottägøøyyä jaꞌa Dioshespíritäm. Mänit hajxy tiägøøyy mädiaacpä wiinghayuucjaty. Jaꞌa Dioshespíritu hänajty jaduhṉ yajmädiaacp.
5Tøø judíoshajxy hänajty nämay miech Jerusalén xøøhajpä. Wiinduhm̱yhagajpt hajxy hänajty chooñ. Paady hajxy miejch Jerusalén xøøjooty, quiudiunaam̱biä quiuhdujt hajxy hänajty jaduhṉ neby hajxy hänajty quiuhdujthatiän.
6Coo judíoshajxy miädooyy coo poj hänajty møc yhamuuy jiiby tøgooty maa mäbøjpädøjc‑hajxy hänajty tøø yhamugøꞌøyän, mänitä judíoshajxy jiiby tiøjtägøøyy. Coo judíoshajxy jaduhṉ miädooyy coo mäbøjpädøjc‑hajxy hänajty quiapxy miädiaꞌagy wiinghayuucjaty, mänitä judíoshajxy wyiinjuøøyy yhamdsoo hayuuc‑haamby neby hajxy hänajty miädiaꞌaguiän majaty hajxy hänajty chooñ wiinduhm̱yhagajpt. Coo hajxy jaduhṉ miädooyy, mänit hajxy jiaanc̈h tehm̱ yagjuøøyy nägøꞌø nädecypiä. Mänit hajxy ñiñämaayyä: ―Yøꞌø jäyaꞌayhajxy xiiby capxpä mädiaacpä, haagä Galilea yøꞌø hajxy chooñ.
8Tii hajxiädaꞌa coo tøø nmädóow̱äm nebiaty hajxy cøjwiinghayuuc tøø nmämíṉ tøø nmägaꞌawǿøyyäm.
9Hix̱, wiinduhm̱yhagajpt hajxy ndsóhṉäm, Partia, Media, Elam, Mesopotamia, Judea, Capadocia, Ponto, Asia,
10Frigia, Panfilia, Egipto, møød jim̱ Libia, Cirene mäwiingóṉ. Høxtä Roma hajxy näjeꞌe ndsóhṉäm,
11møød Creta, møød Arabia. Näjeꞌe hajxy judíos nmämíṉ nmägaꞌawǿøyyäm. Näjeꞌe jaꞌa judíos quiuhdujt wyiinmahñdy hajxy tøø njøjpøgǿøyyäm neby hajxy quiuhdujthatiän. Coo yøꞌø Galileabä‑jäyaꞌayhajxy jaduhṉ tøø quiapxy tøø miädiaꞌagy wiinghayuucjaty nebiatiä Dios jaꞌa hoy‑yagjuǿøñäbä tøø yajcähxøꞌøgy, jaduhṉ hajxy tøø nwiinjuǿøyyäm jaꞌa nhamdsoo hayuuc‑haamby cøjwiinduum ―nøm̱ä judíoshajxy ñiñämaayyä.
12Coo judíoshajxy jaduhṉ wyiinjuøøyy jaꞌa yhamdsoo hayuuc‑haamby, paady hajxy jiaanc̈h tehm̱ yagjuøøyy nägøꞌø nädecypiä. Mänit hajxy ñimiäyajtøøw̱ä: ―Tii yøꞌø jäyaꞌayhajxy coo quiapxy coo miädiaꞌagy wiinghayuucjaty, yøꞌø hajxy tsohm̱bä Galilea.
13Mänit hajxy näjeꞌe yhadsooyy xiꞌigy hanähaty: ―Múucäp hajxiädaꞌa.
14Mänitä Pedrohajxy tiänaayyøꞌcy møødä jiamiøødhajxy jaꞌa nämajtuꞌugpä, jaꞌa hajxy hänajty jaduhṉ Dioswiinguex̱ypä. Mänitä Pedro møc tiägøøyy mädiaacpä: ―Mäguꞌughajpädøjc, nägøx̱iä hajxy njudíoshájtäm mäduhṉ̃tiä hajxy yaa nyajpáatäm, mäduhṉ̃tiä hajxy jäguem̱ mdsooñ, møød mijts yaa tsohm̱bä Jerusalén. Näjeꞌe mijts mmänaꞌañ cooc tyijy højts nmuꞌugyii. Pero cab jaduhṉ tiøyyä. Cab jaduhṉ pøṉ yhuꞌugy jopyñä.
16Coo hajxy tøø mhix̱y tøø mmädoy coo højts tøø ngapxy tøø nmädiaꞌagy wiinghayuucjaty, jaanc̈h tøjiajt jaduhṉ nebiä Joel jecy quiujahyyän jaꞌa Dioscøxpä. Diosquex̱iä Joel hänajty. Jaduhṉä Joel jecy quiujahy:
17Jaduhṉä Dios miänaaṉ̃: Coo hänajty yhabaadaaṉnä coo naax̱wiimbä hänajty wyiimbidaaṉnä, mäníthøc̈hä nhEspíritu nguexaꞌañ maa jäyaꞌayhajxy nägøx̱iän, mäduhṉ̃tiä hajxy yaa yhity hädaa yaabä naax̱wiin. Y mijtsä mnøøx mmajc‑hajxy, mäníthøc̈hä nmädiaꞌagy hajxy xyajwaꞌxaaṉä. Jaꞌa høxcujc‑hänaꞌc‑hajxy, hoy‑yagjuøøñäjátyhøch hänajty nyajwiinhixaꞌañ. Jaanä jaduhṉä majjäyaꞌadiøjc‑hajxypä, nyajcumaꞌawáam̱biøch hajxy hänajty hoy‑yagjuøøñäjaty.
18Coo hänajty yhabaadaꞌañ, mäníthøc̈hä nhEspíritu nyajnäguexaam̱bä jaꞌa nmoonsähajxy, jaꞌa yaꞌaybä, jaꞌa toꞌoxypä. Mäníthøc̈hä nmädiaꞌagy hajxy xyajwaꞌxáaṉäbä.
19Nyajcähxøꞌøgáam̱biøc̈hä hijxtahṉd hoy‑yagjuøøñäjatypä jim̱ tsajtcøxp møød hädaa yaabä naax̱wiin. Hochähgøøñäjátyhøch jaduhṉ nyajcähxøꞌøgaꞌañ nebiä nøꞌtiän, nebiä jøønän, nebiä jøønjocän.
20Wiingoodsøꞌøwaam̱bä xøø hänajty. Jaꞌa poꞌo, tsapts hänajty yhanaꞌañ nebiä nøꞌtiän. Ja ween hänajty quiaꞌa habaadyñä cooc̈hä naax̱wiimbä nyajwiimbidaaṉnä, cooc̈hä nHuuṉg Jesucristo yaa quiädaactägatsaꞌañ hädaa yaabä naax̱wiin. Mänitä jäyaꞌayhajxy nägøx̱iä yajtøyhajtyegaꞌañii. Jadúhṉhøc̈hä nmøcmäjaa hänajty nyajcähxøꞌøgaꞌañ.
21Pønjatiä Jesucristo hänajty capxpaadaam̱b, jeꞌe hänajty hodiuum mähmøꞌøwaam̱b, nøm̱ä Dios miänaaṉ̃. Jim̱ jaduhṉ myiṉ̃ maa Joel jecy quiujahyyän.
22’Mijts israelitas, huuc hamädoow̱hit hajxy hoy. Mnajuøøby hajxy jaduhṉ coo Dios jaꞌa Jesús jaꞌa Nazarettsohm̱bä wyiinguejxy coo jii tiúnät maa mijtsän. Madiuꞌu jaꞌa Jesús hijxtahṉd yajcähxøꞌcy hoy‑yagjuøøñäjatypä maa mijtsä mwiinduumhajxiän.
23Tøø Dios hänajty yajnähdijy coo mijtsä Jesús mmádsät. Mänitä cahwiindøyhänaꞌc hajxy hoy myajcøꞌødägøꞌøy. Mänitä Jesús hoy miøjpahbedyii cruzcøxp. Mänit yhoꞌcy.
24Pero mänitä Dios jaꞌa Jesús yagjujypiøjtägajch. Jaduhṉä Dios hänajty tøø miänaꞌañ coogä Jesús tsipcøxp jiujypiǿgät.
25Hix̱, jaduhṉä David jecy miädiaacy jaꞌa Jesúscøxpä: Nnajuǿøbiøch jaduhṉ cooc̈h homiänaajä xpiuhbety. Homiänáajøch jaduhṉ xcwieendähaty, jadúhṉhøch pøṉ xquiaꞌa hadsähgǿꞌøwøt.
26Páadyhøch jootcujc njaanc̈h tehm̱ ñijiäwøꞌøyii. Páadyhøc̈hä Dios jootcujc nbaꞌyaꞌaxy. Cábøc̈hä nhoꞌog ndsähgøꞌøy jeꞌeguiøxpä cooc̈hä njuøhñdy nbädaꞌagy maa Diosän.
27Xyagjujypiøgáam̱bøch miic̈h jaduhṉ. Cábøch miic̈h jiiby jutjooty xyajmähmøꞌøwaꞌañ cooc̈h jiiby nbúꞌudsät, jeꞌeguiøxpä cooc̈h miic̈h xyHuunghaty.
28Xyagjugyhadáam̱bøch miic̈h cøjxtaꞌaxiøø nej miic̈h homiänaajä mjugyhatiän. Cooc̈h miic̈h jaduhṉ xmiøødhidaꞌañ tehṉgajnä, páadyhøch jootcujc nnijiäwøꞌøwaꞌañii.
29Mänitä Pedro miänáaṉgumbä: ―Mäguꞌughajpädøjc, nmøødhájtämä tøyhajt hajxy jaduhṉ coo David jaduhṉ jecy quiaꞌa nimiädiaacä hamdsoo. Hix̱, coo David jecy yhoꞌcy, mänit hoy ñaax̱tägøꞌøy. Jiiby jaduhṉ yhityñä jutjooty høxtä jädaꞌanäbaadyñä.
30Coo David jaduhṉ jecy miädiaacy, ñajuøøby hänajty jaduhṉ coo yhapä yhoc hänajty tuꞌug wyiinguexáaṉäxä jaꞌa Diósäm, møød coo hänajty yhaneꞌemaam̱bä nebiä David jecy yhanehm̱iän. Tǿøyyämä Dios hänajty miänaꞌañ coo hänajty yajtøjiadaꞌañ coo David jaꞌa yhapä yhoc hänajty tuꞌug wiindsǿṉ tiunaꞌañ.
31Jaduhṉä David tøyhajt jecy miøødhajty coo Dios jaꞌa wyiinguex̱ypä yagjujypiøgaꞌañ coo hänajty tøø yhoꞌogy, møød coo hänajty quiaꞌa mähmøꞌøwaꞌañ jutjooty, møød coo ñiꞌxä quiopc hänajty jiiby quiaꞌa puꞌudaꞌañ.
32Jaꞌa Jesúscøxpä David jecy miädiaacy coo Jesús hänajty jiujypiøjtägatsaꞌañ. Tøø højts nhamdsoo hix̱y coo jiaanc̈h jujypiøjcy.
33Mänitä Jesús jim̱ miøjyaax̱ä maa Tieediä wyiinduumän. Mänit ñämaayyä coo jim̱ yhøxtáꞌagät maa Tieediä yhahooyhaampiän. Mänitä Jesús jaa Tieediä yhEspíritu miooyyä nebiä Tieedy hänajty tøø yajwiinwaaṉøꞌøyiijän. Mänitä Jesús jaꞌa Tieediä yhEspíritu yaghawaꞌxøøyyä. Jeꞌe hajxy jaduhṉ tøø mhix̱y tøø mmädoy.
34Jaꞌa Jesúsäts jim̱ møjyaax̱ä tsajpootyp, caꞌa Diavitä. Hix̱, jaduhṉä David jecy miänaam̱bä: Jaꞌa høøc̈hä nWiindsǿṉ, jeꞌe jaduhṉ nämaayyä jaꞌa Tiéediäm: “Miṉ yaa häñaꞌaw maac̈h nhahooyhaampiän.
35Nmoꞌowáam̱biøch miic̈h cuhdujt jaduhṉ coo mmädsip mgaꞌa yajmäjädáꞌagät.” Jaduhṉä Dios jaꞌa yHuung ñämaayy.
36Mänitä Pedro miänáaṉgumbä: ―Jaduhṉds jeꞌe, jaꞌa Jesús, jaꞌa mijts mmøjpahbéjtäbä cruzcøxp, jeꞌe jaꞌa Dios jaduhṉ wyiinguejx coo hajxy nWiindsøṉhájtämät, coo hajxy xyajnähwáatsämät. Tøyhajt jaduhṉ. Hahixøøby jaduhṉ coo hajxy nägøx̱iä mmäbǿgät jaꞌa Jesúscøxpä, mijts israelitas. Caꞌa hajxy mgaꞌa mäbøcy ―nøm̱ä Pedro miänaaṉ̃.
37Jaꞌa jäyaꞌayhajxy hänajty jiiby hamädoow̱hijpä, coo hajxy jaduhṉ miädooyy, mänit hajxy tiägøøyy tajpä maabiä hoyhoy. Mänitä Pedrohajxy ñämaayyä møødä jiamiøødtøjc: ―Mäguꞌughajpädøjc, neby jaduhṉ yhahixøꞌøy højts ngudiúnät.
38Mänitä Pedro yhadsooyy: ―Najtshixøꞌøw jaꞌa mhaxøøgcuhdujt hajxy. Jøjpøgøøyyä jaꞌa Dios jaꞌa quiuhdujt hajxy. Näbet hajxy jaꞌa Jesucristocøxpä. Jaduhṉä Dios jaꞌa mbojpä mgädieeybä hajxy xyajnähwáatsät. Jaduhṉä yhEspíritu hajxy xmióobiät.
39Pønjatiä Dios jaꞌa nWiindsøṉhájtämbä miøjyaax̱yp, jéꞌegädsä piojpä quiädieeybä yajnähwáatsäxäp, jéꞌegädsä Dios yhEspíritu mioꞌowaam̱by, møød mijts, møødä mhap møødä mhoc‑hajxy, møød pønjaty jäguem̱ tsänaaby. Jaduhṉ hajxy xyajwiinwaaṉǿøyyäm ―nøm̱ä Pedro miänaaṉ̃.
40Madiuꞌujä Pedro jiaac mädiaacy. Mänit jiaac tehm̱ miänaaṉ̃: ―Yøꞌø cahwiindøjiäyaꞌayhajxy, caꞌa hajxy tehṉgajnä mbahix̱y neby hajxy quiuhdujthatiän, coo hajxy jaduhṉ mnäꞌä padägóyyät ―nøm̱ä Pedro miägapxy yhanehm̱y.
41Mänitä Pedro miädiaꞌagy miäbǿjcäxä nädägøøgmil‑jäyaꞌay. Mänit hajxy hoy nägøx̱iä ñäbety.
42Hamuumduꞌjoot hajxy hänajty miäbøcy nägøx̱iä neby hajxy hänajty yajnähixøꞌøyiijän jaꞌa apóstoldǿjcäm. Nax̱y hajxy hänajty yhamugøꞌøy tsajcaagyquiaamiujpä, møød hajxy hänajty Dyiospaꞌyaꞌaxy. Tuꞌugjoot tuꞌugwiinmahñdy hajxy hänajty yhity. Hamiṉ̃ haxøpy hajxy hänajty ñibiuhbedyii.
43Madiuꞌujä apóstoldøjcø hijxtahṉd hajxy hänajty yajcähxøꞌøgy hoy‑yagjuøøñäjaty. Jiaanc̈h tehm̱ yagjuøøbiä mäbøjpädøjc‑hajxy hänajty neby hajxy hänajty yhix̱iän.
44Tuꞌugmädiaꞌagy hajxy hänajty yhity mäduhṉ̃tiä hajxy hänajty miäbøcy. Yajtuuṉmujpy hajxy hänajty tijaty hajxy hänajty miøød.
45Mänit hajxy nägøx̱iä tiägøøyy tooꞌpä tijaty hajxy hänajty miøød. Pønjatiä xädøꞌøñ hänajty yajmaajiajp, mänitä xädøꞌøñ hajxy hänajty mioꞌoyii mäduhṉjaty hajxy hänajty yajmaajiaty.
46Jabom̱‑jabom̱ hajxy hänajty yhamugøꞌøy maa møjtsajtøjcän Diospaꞌyaax̱pä. Jootcujc hajxy hänajty quiaamiucy yhuucmucy maa yhamdsoo tøjc‑hajxiän. Hojioot hajxy hänajty miøød.
47Wyiingudsähgøøbiä Dios hajxy hänajty. Møødä cuꞌug hajxy hänajty wyiingudsähgøøbiä. Jabom̱‑jabom̱ä mäbøjpädøjc‑hajxy hänajty yajmayøꞌøyii jaꞌa Diósäm. Jaduhṉ hajxy hänajty yajnähwaꞌac̈hii.
