HEBREOS 2

1

2

3

4

5

6

7

8

9

10

11

12

13

¹Jaꞌ yuꞌun scꞌan ti ta sloqꞌuel coꞌontic ta jchꞌuntic li cꞌusi caꞌiojtic li yaloj li Cajvaltique ti yoꞌ mu xijchꞌay oe.

²Li jtotic jmeꞌtic ta voꞌone ti iꞌalbatic smantaltac li Diose, acꞌo mi chꞌul ángeletic noꞌox iyal, pero persa tschꞌunic. Li buchꞌutic muc schꞌunic schiꞌuc li buchꞌutic la spꞌajique, iꞌacꞌbat yichꞌic vocol. Li svocol ti iyichꞌique, jaꞌ ti cꞌu sba smulique. Jaꞌ yuꞌun mi mu jchꞌuntic ti yaloj Cajvaltic ti chiscoltautic sbatel osile, ta onoꞌox xquichꞌtic vocol eꞌuc. Yuꞌun li Cajvaltique jaꞌ baꞌi iyal ti cꞌu sba chijcolutique, jaꞌ tsꞌacal to lijyalbutic eꞌuc li buchꞌutic iyaꞌiique.

⁴Li Diose iyacꞌ ta ilel ti ta melel jaꞌ scꞌop li iyalique yuꞌun iꞌacꞌbatic yaqꞌuic ta ilel stsatsal sjuꞌel. Ta sventa ti yacꞌojbe li Chꞌul Espíritue jaꞌ ispasic o li cꞌustic iꞌacꞌbat spasic li jujunique, jaꞌ li cꞌu sba iscꞌan yoꞌon stuc li Diose.

⁵Li Diose maꞌuc chacꞌbe sventain chꞌul ángeletic li achꞌ balumil li ta xtale ti chcalbe scꞌoplale. Joꞌotic albilutic ta jventaintic.

⁶Yuꞌun tsꞌibabil ta scꞌop Dios ti oy buchꞌu jech iyalbe Dios ta voꞌonee: Acꞌo mi muꞌyuc cꞌusi xuꞌ cuꞌuncutic, joꞌoncutic li crixchanouncutique, oyuncutic ta avoꞌon onoꞌox.

⁷Yuꞌun jliquel noꞌox li muc bu tsots cabtelcutique. Tsꞌacal to chavacꞌbun tsots cabtelcutic jech chac cꞌu chaꞌal tsots yabtel avacꞌojbe la avajꞌangeltaque. Yuꞌun ta xcꞌot scꞌacꞌalil chavacꞌuncutic ta ichꞌel ta mucꞌ, yuꞌun chavacꞌbun jventaincutic scotol li cꞌustic apasoje.

⁸Chavacꞌbun jpascutic ta mantal scotol, xi tsꞌibabil. Jaꞌ ta xvinaj o ti chijyacꞌbutic jventaintic scotol li Diose. Pero scꞌan to ta xquiltic ti chacꞌ jpastic ta mantal scotol li Diose, joꞌotic li crixchanoutique.

⁹Jaꞌ noꞌox chquiltic ti ichꞌbil xa ta mucꞌ li Jesuse ta sventa ti icham ta scoj jmultic jcotoltic, jaꞌ ivinaj o ti cꞌuxutic ta yoꞌon li Diose. Yuꞌun cꞌalal liꞌ oy ta balumil li Jesuse, muc toꞌox bu tsots yabtel yichꞌoj eꞌuc; jaꞌ más tsots yabtel yichꞌojic yajꞌangeltac li Diose.

¹⁰Ti ispas scotol li cꞌustic oy li Diose, schiꞌuc ti la spasutique, yuꞌun ta scꞌan ti acꞌo quichꞌtic ta muqꞌue. Joꞌotic li pasbilutic yuꞌune, tscꞌan chijyicꞌutic ba ta lequilal, jaꞌ yuꞌun isnop ti ta persa ta xichꞌ vocol li Snichꞌone yoꞌ jaꞌ jech xuꞌ chiscoltautic. Jaꞌ yuꞌun iꞌoch ta Cajcoltavanejtic li Snichꞌone.

¹¹Jech jun noꞌox jtotic jchiꞌuctic, joꞌotic li laj xa stuqꞌuibtasutique, jaꞌ yuꞌun mu cꞌu chal yoꞌon ti “quitsꞌin, quixlel” xijyututique.

¹²Yuꞌun jech onoꞌox tsꞌibabil ta scꞌop Dios ti jech laj yalbe Stot li Cajvaltique: Chcalbe acꞌoplal yaꞌiic li buchꞌutic quitsꞌinabtac quixleltac ta xcꞌotique, chaquichꞌotcutic ta mucꞌ jcotolcutic, xut onoꞌox.

¹³Jech laj yal nojtoc: Ta jchꞌun ti chiscolta li Diose, xi. Jech laj yal nojtoc: Chba jchiꞌin li crixchanoetic ti chiyichꞌic ta mucꞌ yuꞌun li Diose, xi onoꞌox tsꞌibabil.

¹⁴Li joꞌotique oy jbecꞌtaltic, oy jchꞌichꞌeltic. Jaꞌ noꞌox jech eꞌuc li Snichꞌon li Diose a yichꞌ sbecꞌtal schiꞌuc schꞌichꞌel jaꞌ yuꞌun icham. Cꞌalal ichame, jaꞌ te ichꞌay o stsatsal li yabtel li pucuje ti jaꞌ toꞌox ta scoj ti naca ta chꞌayel chijbat toꞌoxe.

¹⁵Jaꞌ jech icolic li buchꞌutic naca xiꞌel chaꞌiic ta sventa ti ta chꞌayel ta xbatique.

¹⁶Maꞌuc a scolta li chꞌul ángeletique; joꞌotic a scoltautic li snitilulutic li Abrahame.

¹⁷Jaꞌ yuꞌun persa a scoꞌoltajes sba jech chac cꞌu chaꞌal joꞌotic li Jesuse. Jaꞌ batsꞌi jchiꞌiltic ta voqꞌuel icꞌot. La scꞌuxubinutic, la stojbutic jmultic jech chac cꞌu chaꞌal tscꞌan li Diose. Jaꞌ yuꞌun iꞌoch ta banquilal pale cuꞌuntic ta stojol li Diose yoꞌ jech chispasbutic perton yuꞌun jmultic li Diose.

¹⁸Yuꞌun cꞌalal oy svocol li Cajvaltique, schiꞌuc cꞌalal iqꞌuelbat yoꞌone, vocol icuch yuꞌun iyaꞌi. Ta sventa ti staoj o yav yoꞌon ta stojol li Diose jaꞌ yuꞌun icuch yuꞌun. Jaꞌ yuꞌun xuꞌ chiscoltautic cꞌalal oy jvocoltic eꞌuque yoꞌ jech xuꞌ ta jpastic li cꞌusi ta scꞌan li Diose.