1Ma Bada Moses i riwei, “Anivinuabola tagogi ava ana neiai Pharaoh ma Egypt awarii. Ma au murina tauna ina voteremi da ona nae ma lamna maranaina ina viaḡaḡana-opunemi.
2Ma nae ma mai Israel ma riwei, ‘Anatapumi ona nae ma mae-turami Egyptei ona vibaḡai da ai via goldei ma silvei ina veremi.”
3Bada i kauei da mai Egypt mai Israel i vivirei. Pharaoh ana gabemani babadai ma rava anatapui au Egypt Moses i vivirana-kauei.
4Ma Moses i nae ma Pharaoh i riwei, “Bada e ririwa, ‘Nubautuva nanare tau Egypt anatapuna ana babarani.
5Natuevou nelarai au Egypt anatapui ina iraḡe, Pharaoh natuevouna orotona, amana ana epaepaia, awarina ina vikarei, ma ina ḡaira da taunola awarina ina ḡeta, waivinewiti taugudaina natunatui maiteni. Ḡamoḡamo natuevou anatapui ina iraḡe.
6Ma dobu Egypt au anatapuna tou ḡaeḡaena ina ḡae, rorova eḡa nanare ma eḡa melanai nanare ina tupua me.’
7Wate eḡa aiwai apoapoena mai Israel awari ina tupua, eḡa auou tagogi, rava tagogi, bo ḡamoḡamo ina gwauei. Ma kampa ona aramanei da Tau Bada, mai Israel ma mai Egypt awariei a vivilamonei.
8Am gabemani babadai anatapui ina ḡairai awariu ma au naou ina mae-ḡaira ma ina raudune ma ina riwa, ‘Laḡilaḡina ma ruba-nae am rava tauvotaḡotaḡoim anatapui maiteni.’ Lamna au murina tau ana nae.” Moses meji orana i oai ma Pharaoh i netawanei.
9Bada Moses i riwei, “Pharaoh tam eḡa ina rautaniḡanem. Wenanare ina tupua da tau kaua babai ana kauei au Egypt.”
10Moses ma Aaron kaua ḡaeḡaei ma babai i kauei Pharaoh au matana wate Bada Pharaoh orana i vibadoi da mai Israel eḡa ita paritawanei.
