Text copied!
CopyCompare
Buk Baibel long tokples Motu - 2 SAMUEL

2 SAMUEL 3

Help us?
Click on verse(s) to share them!
1Saulo ena orea bona David ena orea na e tuari heheni: tuan na vada e daudau. David na e goada e laova, a Saulo ena orea na e manoka e laova.
2David ese natuna mamaruanedia haida e havaradia Heberon ai. Roboana na Amnon; ia na Ahinoama, hane Iesrele, natuna.
3Iharuana na Kilea, Abigail natuna; una Abigail na Nabala, tau Karamele, vabuna. Ihatoina na Absalom, Maaka natuna; una Maaka na Talmai, Gesuru pavapavana, natuna hahinena.
4Ihahanina na Adonia, Hagiti natuna; bona iha-imana na Sefatia, Abitala natuna.
5Ihatauratoina na Itireama, David adavana Egla natuna. Una na David ese e havaradia, Heberon ai.
6Saulo ena orea bona David ena orea e tuari heheniva ai na Abnere ese ena siahu e habadaia, Saulo ena orea ai.
7Saulo vabuna ta ladana na Rispa, Aia natuna. Bena Isiboset ese Abnere e gwau henia, eto, Dahaka dainai tamagu vabuna ta ida o eno bou?
8Bena Abnere e badu dikadika, Isiboset ena hereva dainai, eto, Be, lau na Iuda ena sisia kwarana ta a? Han dina ai, tamamu Saulo iduhuna bona tadikakana bona turana doini na badinadiamu. Oi na David imana ai asina atomu. Matona han dina ai o habadegumu, hahine ta ida na kerere dainai.
9Iehova ena gwauhamata, David enai, anina basinama havaraia, Dirava ese Abnere davana bema henia, ma bema habadaia.
10Gwauhamata na binai: basileia na Saulo ena iduhu amo baine heabi oho, David ena terono baine hahedai, Israel bona Iuda baine lohiadia, Dan amo ela bona Bere-sieba.
11Bena Isiboset ese Abnere se haere henia, badina be ia garina e gari.
12Bena Abnere ese gwaukau taudia na David dekena e siaidia, Heberon ai, eto, Tano be daika ena? Aita herohemaino, bena lau imagu ese baine durumu, Israel idoinai na emu ai baina vena hanai.
13David eto, Namo; aita herohemaino. Ḡau tamona, dekegu baoma negana ai na Saulo natuna hahinena, Mikala, ba hakaua mai guna; bema lasi, vairagu basio itaia.
14Bena David ese gwaukau taudia na Isiboset Saulo dekena e siaidia, eto, Adavagu Mikala a henigu, badina be na mao henia davana na Filistia taudia sinahu-ta peritome ai e iva heḡeḡe kopidia amo vada na karaia.
15Bena Isiboset e hesiai, hahine na adavana Paltiel Laisi ena amo e vena lou.
16A adavana ese e bamoa, bona murina amo e tai, ela bona Bahurimi. Bena Abnere ese e hamaoroa, eto, A lou aola. Bena e lou ela.
17Bena Abnere na Israel tau-badadia ida e henega bou, eto, Nega taina daudau vada e lao bubuni, umui ese David vada o ura heniava, emui pavapava ai bainela.
18Harihari, karana ba karaia; badina be Iehova ese David vada e gwau henia hamata, eto, Egu hesiai tauna David imana amo lau ese egu orea Israel na Filistia taudia imadia amo bona inaina iboudiai imadia amo baina hamauria.

19Abnere ese Beniamina taudia danu e hereva henidia. Bena Abnere na Heberon ela, Israel besena bona Beniamina iduhuna idoinai edia lalo-hadai ede bae kara toma eto na David baine hamaorolaia totona.
20Bena Abnere, tatau ruahui ida, David dekena ela, Heberon ai. Una negana ai, David ese aria ta e karaia, Abnere mai bamona ida adia.
21Bena Abnere ese David e hamaoroa, eto, Aina tore isi, bainala, Israel taudia iboudiai baina haboudia, egu lohia bona egu pavapava vairamu ai. Idia na oi ida bae herohemaino; bena o ura henidiamu taudia iboudiai na ba biagudia. Taunabunai David ese Abnere e siaia oho; ia na mai mainona ida ela.
22Una negana ai, David ena hesiai taudia na Ioab ida tuari amo e kau; e dadi kohudia momo e mailai. A Abnere na dia David dekenai Heberon ai; badina be vada e siaia oho, bena mai mainona ida ela.
23Ioab mai ena tuari oreana idoinai ida e kau; bena haida ese e hamaoroa, eto, Abnere Nere na pavapava dekena ema; ma vada e kahua nege, mai mainona ida ela.
24Bena Ioab na pavapava dekena ela, eto, Ede vada o kara toma? A itaia, Abnere na dekemu ema; dahaka dainai vada o siaia oho, bena ela?
25Oi dibamu Abnere Nere na ikoimu totona ema, emu raka lasi emu raka vareai bona emu kara iboudiai baine diba totona.
26Ioab na David vairana amo e raka lasi, bena ia ese gwaukau taudia e siaidia, Abnere bae ḡavaia. Bena Siragohugohuna amo e hakaua lou mai; a David na asi dibana.
27Bena Abnere na Heberon e lou henia negana ai na Ioab ese hanua ikoukouna amo e hakaua siri, baine hereva henia hehuni eto; bena bogana e gwada, bena e mase, ia tadina Asahele rarana davana.
28Gabeai, David e kamonai negana ai, ia eto, Lau bona egu basileia na asi emai kerere Iehova vairanai, Abnere Nere rarana dainai.
29Ioab latanai, bona tamana ena iduhu taudia latadiai, baine kau. Uru iboudiai Ioab ena iduhu ai haida na enobougorerena bae davaria, eiava bae lepra, eiava hahine edia ḡaukara bae kara, eiava dare amo bae mase, eiava bae hitolo.
30Badina bunai Ioab bona tadina Abisai ese Abnere e alaia mase, badina be ia ese Gibeon tuarina ai idia tadidia Asahele e alaia mase davana.
31Bena David ese Ioab bona ena orea taudia iboudiai e hamaorodia, eto, Emui dabua ba dare, puse dabuadia ba hedokilai, Abnere taina ba tai. Hanua pavapavana David na mase patana murinai e raka.
32Abnere na Heberon ai e guria; bena hanua pavapavana na gadona e habadaia, Abnere gurina badibadinai e tai; taunimanima iboudiai danu e taitai.
33Bena haulua pavapavana na Abnere taina e tai, eto, Abnere na kava tauna ena mase ai baineme mase a?
34Imamu na asie ḡuidia, aemu na asi gadeadia. Kara dika taudia vairadiai e ketomu tauna na heto, oi vada o keto. Bena taunimanima iboudiai na ia taina ma e tai.
35Bena taunimanima iboudiai na David dekena ela, lalona e ania toho, ia na dina ai do baine aniani. A David na hereva metauna e gwauraia, eto, Dina do basine diho ai flaoa eiava aniani ḡauna ta baina mamia toho, Dirava ese do baine hadikagu, baine hadikagu bada.
36Bena taunimanima iboudiai ese e haeroa, bona lalodia e namo, hanua pavapavana ena kara iboudiai ese lalodia e hanamodiava heḡereḡerena.

37Taunabunai, una dina ai hebou taudia iboudiai bona Israel idoinai lalodia na e parara, una Abnere Nere iala-masena na dia hanua pavapavana ena ura.
38Bena hanua pavapavana ese ena hesiai taudia na e hamaorodia, eto, Umui asi dibamui a, lohia tauna, tau badana ta, hari ina dina ai vada e mase Israel ai.
39Ena be e horogu, pavapava ai e halaogu, to hari ina dina ai vada na manoka-manokamu; ina Seruia natuna na egu ai eme auka herea. Iehova ese kara dika tauna davana do baine henia, ena kara dika heḡereḡerena.