2. Kraľengero 14:10-26

¹⁰Gondoľines tuke, hoj sal zoralo, bo ňerinďal (zviťazinďal) upral o Edom. Oslavin tiro ňerinďipen, ale ačhuv khere! Soske tut thoďalas andre oda? Se pereha tu the e Judsko tuha.”

¹¹Ale o Judsko kraľis Amacijah les na šunďa, vašoda o Izraeliko kraľis Jehoaš geľa pre les pro mariben paš o Bet-Šemeš andre Judsko.

¹²O Izrael ňerinďa upral e Judsko a savore lengere slugaďa denašenas khere.

¹³Avke paš o Bet-Šemeš o Jehoaš zaiľa le Judske kraľis Amacijah, o čhavo le Joašoskero, o čhavo le Achazijoskero. Paľis geľa andro Jeruzalem a čhiďa tele o foroskere muri la Efrajimika Branatar dži paš e Rohoskeri Brana, ajse duj šel (200) metri.

¹⁴Iľa odarik savoro rup, o somnakaj the savore dragane veci, so arakhle andro Chramos the andre palaciskere pokladňi. Avke odľigenďa a iľa pale andre Samarija the varesave manušen, save ľikerelas ke peste.

¹⁵Savore aver veci, so kerďa o Jehoaš, leskero ňerinďipena the oda, sar pes marelas le Judske kraľiha, hin pisimen andro Zvitkos le Izraelike Kraľengero.

¹⁶Sar muľa o Jehoaš, parunde les andro foros Samarija paš o Izraelike kraľa. Pal leste ačhiľa kraľis leskero čhavo o Jarobeam.

¹⁷O Judsko kraľis Amacijah, le Joašoskero čhavo, dživelas mek dešupandž (15) berš, sar muľa o Izraeliko kraľis Jehoaš.

¹⁸Savore aver veci, so kerďa o Amacijah, hin pisimen andro Zvitkos le Judske Kraľengero.

¹⁹Sar pes pre leste andro Jeruzalem počoral dothode, hoj les murdarena, ov denašľa andro Lachiš, ale bičhade pal leste muršen a ode les murdarde.

²⁰Avke les odarik ande andro Jeruzalem pro graja a parunde les andro Foros le Davidoskero paš leskere phure dada.

²¹Akor savore manuša andral e Judsko ile le Azarijah a ačhade les vaš o kraľis pal leskero dad Amacijah. Sas leske ča dešušov (16) berš.

²²Sar muľa leskero dad, o Azarijah iľa pale o foros Elat a oprikerďa les.

²³Sar o Amacijah, le Joašoskero čhavo, kraľinelas upral e Judsko dešupandž berš, ačhiľa kraľis upral o Izrael o Jarobeam, le Jehoašoskero čhavo, a kraľinelas andro foros Samarija saranda the jekh (41) berš.

²⁴Ov kerelas oda, so na sas le RAJESKE pre dzeka, a na preačhelas te kerel ola bini, so kerelas o Jeroboam, le Nebatoskero čhavo, savo anďa le Izrael andro binos.

²⁵O Jarobeam dochudľa prekal o Izrael pale o phuva le Lebo-Chamatostar dži paš o moros andre Araba. Oda sas avke, sar o RAJ, o Del le Izraeloskero, phenďa prekal peskero služobňikos the prorokos Jonaš andral o Gat-Chefer, savo sas le Amittajoskero čhavo.

²⁶O RAJ dikhľa, sar savore Izraeliti sas andro baro pharipen, či otroka vaj o slobodne. Na sas ode ňiko, ko len cirdňahas avri andral o pharipen.