2 Hadì 14:10-26

¹⁰Amazia, tutuu he nezaag nu is Edom ne ibpahambug nu heini. Mekuntintu ke en te kebpekezaag nu ne peeneng-eneng ke en keniyan te kenikew he lugar. Maan is ebpen-ehè ke pa te samuk he ebpekeuwit te kezeetan nu wey te Juda?”

¹¹Piru wazà mebpemineg si Amazia, umbe midsurung sikandin ni Hadì Jehoash wey te menge sundaru zin. Midtebek dan diyà te Bet Shemesh he sakup te Juda.

¹²Nezaag is Juda te Israel, ne nekedsusuwey is menge sundaru te Juda he nemelaǥuy pehendiyà te ed-ulian dan.

¹³Nezekepan ni Hadì Jehoash si Hadì Amazia diyà te Bet Shemesh. Ne midhendiyà si Jehoash te Jerusalem ne migevè din is menge verengbeng kayi puun diyà te Pultahan te Efraim pehendiyà te Pultahan diyà te Suyuk, he 600 he ǥiek is keluǥayad din.

¹⁴Mibpenguwa zin is langun he vulawan, pelata, wey is menge gelemiten he neehè din diyà te valey te Nengazen wey ziyà te budiga te menge azen diyà te turuǥan. Nenduma zaan sikandin te menge vihag te kedlikù din diyà te Samaria.

¹⁵Is duma pa he ǥuǥud mehitenged te kedhadì ni Jehoash, wey is nevantug he mibeelan din wey is duma pa he mibeelan din, ragkes en is kebpekidtebek din ki Hadì Amazia he hadì te Juda, ne ingkesurat diyà te Libru he Midsuratan te menge Keguǥuza te menge Hadì te Israel.

¹⁶Hein minatey en si Jehoash, inleveng sikandin diyà te midlevengan te menge hadì te Israel diyà Samaria. Ne is anak din he si Jeroboam II, iyan nekeilis kandin te kedhadì.

¹⁷Nengungubpaan pa seled te 15 he tuig si Hadì Amazia he hadì te Juda puun te kebpatey ni Hadì Jehoash he hadì te Israel.

¹⁸Is duma pa he ǥuǥud mehitenged te kedhadì ni Amazia, ne ingkesurat diyà te Libru he Midsuratan te menge Keguǥuza te menge Hadì te Juda.

¹⁹Dutun he timpu, duen menge etew he ebpelanu edhimatey ki Amazia ziyà te Jerusalem, umbe mibpelaǥuy sikandin diyà te Lakish. Piru mibpetelukunan dan sikandin diyà te Lakish. Ne midhimetayan sikandin dutun.

²⁰Is lawa zin ingkarga te kudà ne inlikù diyà te Jerusalem ne inleveng diyà te midlevengan te menge kepuun din diyà te Inged ni David.

²¹Is midhimu te menge etew ziyà te Juda he ilis ki Amazia he hadì, iyan is anak din he si Azaria he 16 he tuig is keǥurang din.

²²Iyan sikandin nekehawì te Elat ne mid-umanan din benguna heini hein minatey en is amey zin he si Amazia.

²³Nehimu he hadì diyà te Israel si Jeroboam II he anak ni Joash hein ike-15 he tuig te kedhadì ni Amazia he anak ni Joash diyà te Juda. Diyà med-ubpà te Samaria si Jeroboam II, ne midhadì sikandin seled te 41 he tuig.

²⁴Mezaat is ulaula zin diyà te etuvangan te Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.

²⁵Iyan sikandin nekehawì te menge lugar he gaked dengan te menge Israilihanen, he puun te Lebo Hamat taman te Zaǥat te Araba. Iyan heini impenaad te Nengazen he Megbevayà te Israel, pinaaǥi te suluǥuen din he mibpenaub din he si Jonas, he anak ni Amitai he tig-Gat Hefer.

²⁶Ketau te Nengazen is kegkeul-ulaha kayi su neehè din is utew subra he ked-antus te menge Israilihanen, uripen man etawa kenà. Ne wazà ebpeketavang kandan.