2 Kings 14:10-26

¹⁰Amaziah, chiney e kam gel ngak piyu Edom, ma aram e ka rim taf. Nge fel’ u wun’um e fla’ab rom mag par u tabnaw. Mang ni ngam k’aring e wagey ni kemus ni nge girengiy e riya’ nga dakenam nge girdi’ rom?”

¹¹Machane me siyeg Amaziah fapi thin nde motoyil ngay, ma aram me yan Jehoash ni Pilung ni yad e salthaw rok ngar maelgad ngak u Beth Shemesh u lan yu Judah.

¹²Min gel ngak e pi salthaw rok Amaziah, ma gubin e salthaw rok nra milgad ngar sulod nga taferad.

¹³Me fek Jehoash i Amaziah nib kalbus, me yan ngalan yu Jerusalem, nge buthug fare yaror ko fare binaw nga but’ ni tabab ko fare Garog ni Efraim nge mada’ ko Garog ko Tabthung, palogen e re ngin’em e 200 e yard.

¹⁴Ma urngin e silber nge gol ni pir’eg ma yi go’ fek, nge urngin e pi talin e maruwel ko fare tempel nge urngin e machaf ko fare naun ko pilung, me fek nge sulweg nga Samaria. Miki fek e girdi’ ni yad e kalbus rok.

¹⁵Gubin e tin kabay ni rin’ Jehoash, nib mu’un feni m’uthan’ nge falu’ ko fare mael nib togopluw ngak Amaziah ni Pilung nu Judah, e kani yoloy ngalan Chepin e Pilung nu Israel.

¹⁶Me yim Jehoash min k’eyag u lan fapi low ko yam’ rok e pilung u lan yu Samaria, me Jeroboam ni fak e yan nga luwan nge pilung.

¹⁷Me Amaziah ni Pilung nu Judah e ki par nib fos ni ragag nge lal e duw nga tomuren nike yim’ Jehoash ni Pilung nu Israel.

¹⁸Gubin e tin kabay ni rin’ Amaziah e kani yoloy ngalan Chepin e Pilung nu Judah.

¹⁹Immoy ba makath u lan yu Jerusalem ni ngan thang e pogofan rok Amaziah, ma aram me mil nge yan ko fare binaw nu Lakish, machane me lek e pi to’ogor rok ngaram ngar li’ed nge yim’.

²⁰Min fek e ldow rok ngan fulweg nga Jerusalem u daken ba os ngan k’eyag u lan fapi low ko yam’ rok e pilung nu lan fare Binaw rok David.

²¹Ma aram me teelyawnag e girdi’ nu Judah ba pagel ni fak ni ragag nge nel’ e duw yangren ni Uzziah fithingan nge mang pilung.

²²Maki sulweg Uzziah u fithik’ e mael fare binaw nu Elath ngki ngongliy bayay, nga tomuren e yam’ ni tay e chitamngin.

²³U lan e duw ni ragag nge lal ko gagiyeg rok Amaziah ni Pilung nu Judah, nib mo’on ni fak Joash, me mang Jeroboam nib mo’on ni fak Jehoash e pilung nu Israel, me yog e thin u Samaria ni aningeg i ragag nge taareb e duw.

²⁴Me denen nib togopluw ngak SOMOL, ni i falwok ko kireb ni i rin’ e pilung nib m’on rok ni aram Jeroboam nib mo’on ni fak Nebat, ni waliy yu Israel nga fithik’ e denen.

²⁵Miki sulweg u fithik’ e mael urngin e yungi binaw ni tafen yu Israel, ni tabab u Hamath Pass u lane lel’och me yan i mada’ ko fare gi day ni Dead Sea ko yimuch. Irera’ e n’en ni micheg SOMOL ni Got rok yu Israel u l’ugun e tapigpig rok i Jonah ni profet nib mo’on ni fak Amittai nu Gath Hefer.

²⁶Me guy SOMOL e gafgow ni be tay yu Israel; ma dariy be’ nra ayuwegrad.