1 Korinito 16

1

2

3

4

5

6

7

8

9

10

11

12

13

14

15

16

¹Ainauia ta peigogoi hetabu tataodi enadi wa, doha ekalesia Galatia eai ea heatadi, hinage ea heatamiu, bena au ginauriwatai.

²Asubena bagubagunana Sabati sorasorana eai, esau to esau doha ana paisoa se lau lolo, abo aniona tupona i torehesuara, ea laowa abo taba nige ta hetubu ainauia ta tore.

³Sora ea lagewa, eai to eai emi leta eai au tauribaedi, isi abo ea hetamaridiwa emi nuagigibori heiheinoina wa abo se bahei se laei Ierusalema eai.

⁴Ena i lolo bena eau hinage ea lau, abo isi maeguyao.

⁵Abo ea laowa arimiu eai, sora Makedonia ea baeawai baguna, paana Makedonia egu dobila eai,

⁶nuana arimiu eai abo ea mia, ata bena huia gogoma abo ta miagogo, bena egu adau eai abo au hetamarigu ea lau, haedi egu abatorohai eai.

⁷Nige ea henua ea itamiu mo, egu gadosisi bena ea miahai begana arimiu eai, ena Guiau ie eari.

⁸Na Epeso eai abo ea bagibagi i lau e Penetekoso huiana,

⁹paana egu sorasora lolona inai, matagu eai se soeauri, taba agu paisoa ma aniona, waiunu hinage se gamagari.

¹⁰Ena Timoteo i laowa au oiyami, bena boeamiu eai i manasa, paana ia Guiau ana paisoa i paipaisoeai, gonoana doha eau.

¹¹Tabu esau i itadobei. Au helabiniei au hetamari ena lauwasi eai, bena i uioma arigu eai; paana ia ea bagibagiei, maeda tataoyao.

¹²Eda tau Apolo ribana eau ea dudu ariri bena i laowa arimiu eai, eda tataoyao headi wa maedi, na nige begana Eaubada ena nuatu bena aboina i laowa. Sora ena huia i lobai abo i laowa.

¹³Au silasilawahetete, sunuma eai ta au torotahitahinei, iilamiu doha tatao, au adidiri.

¹⁴Ginauri gamagaridi gadosisi eai mo bena au ginauridi.

¹⁵Egu tataoyao e, Setepanas ena numa tataodi abidi au atao, isi taunuabui bagubagunadi Akaia eai, eo se moseuioidi hetabu tataodi se bobodiedi;

¹⁶egu aiboda gadogadora arimiu eai bena tatao doha ina au awaabiedi, eo aidobudi hinage ada paisoa ta se sagui eo maeda se paipaisoa.

¹⁷Ea kode ariri Setepanas eo Fotunata eo Akaika edi laoma eai, saha arimiu eai ea hedeha, isi se heduduraiyao;

¹⁸paana earuagu se heaiyawasi, doha omi earuamiu hinage. Tatao doha ina au heasisiedi.

¹⁹Ekalesia Asia eai se lautoiemiu. Akuila eo Peresila se lautoi‐aririemiu Guiau debana eai, maediyao ekalesia pelena wa edi numaalo eai se oioigogo.

²⁰Eda tataoyao maudoidi se lautoiemiu. Alagoi tabuna eai au aiaitoiuioimiu.

²¹Eau Paulo egu lautoi ea uri ina, eaubogu nimagu eai ta.

²²Ena tau esau eda Guiau nige i gadosisiei, ia baaeana. Eda Guiau i laoma!

²³Guiau Iesu ena ainauia maemiu.

²⁴Egu gadosisi omi gamagarimiu arimiu eai i ota, Keriso Iesu boeana eai. Amen.