1 Ba Kkolinto 16

1

2

3

4

5

6

7

8

9

10

11

12

13

14

15

16

¹Lino mukulanga kubunganizya kwabantu basalala baLeza: Mbuli mbundakakalayilila mbungano zyaku Galantiya, lino, anywebo mwalelede kuchita.

²Mubuunsi bwakusanguna bwamviki, umwi awumwi wanu welede kubikka chimwi ambali alimwi akuchibamba, mbuli mbwajana. Muchite eehi kuti kutazobi kubunganya eelyo nintaboole.

³Naa ndaboola, kuli naba ni ooyo ngumuzuminina, ndiyoomupa magwalo, amanjililo kuli mbabo alimwi ndiyomutumizya achipo chanu kuJelusalema.

⁴Kuti kachili kabotu kuli ndime kwiinka lubo, bayoyinka andime.

⁵Pesi ndiyosika kuli ndinywe nindiyoyinda kuMasedoniya. Nkambo ndiyoyinda mu Masedoniya.

⁶Ambweni ndilakonzya kukkala andinywe nikuba kumana chilimu, kuchitila kuti ngamulandigwasya a lweendo lwangu, kufumbwa nkundinga ndilayinka.

⁷Nkambo tandilombozyi kumubona pe lino kukumuswaya kwangu kwakwinda luzutu. Nkambo ndilaabulangizi bwakuba achiindi chilamfu kandili andinywe, kuti Mwami wazumizya.

⁸Pesi ndiyokkala muEfesasi do mane Pentekkositi,

⁹nkambo mulyango ukwazeme wajuluka kuli ndime, alimwi kuli zyiingi zikachizya.

¹⁰Lino naa Timoti wasika, mubone kuti waba andinywe akutayowa pe, nkambo ulikubeleka chakuminwa kumulimu waMwami, mbuli mbundilikuchita.

¹¹Kutabi nikuba umwi umusampawula. Mumugwasye munzila yakwe muluumuno, kuchita kuti azoboole kulindime. Nkambo ndilikumulangilila kuboola ababunyina.

¹²Lino mukulanga mukwesu Apolosi, ndakamusungwazya kapati kuti amuswaye antoomwe ababunyina. Pesi nikuba biyeni tekwakali kuyanda kwakwe pe kuti aboole lino. Nikuba boobo, uzoboola kuti chiindi chaba kabotu.

¹³Muchenjele, mukakatile mulusyomo, muchite mbuli baalumi, musime.

¹⁴Muchite kuti zyoonse nzimuchita zyiitwe muluyando.

¹⁵Mulilizi isuwa lya Sitefanasi, kuti bakali njimichelo yakusanguna yaAchayila, alimwi bakalipeda kumulimu wabantu ba Leza basalala. Lino ndamwaambila inywe, bakwesu,

¹⁶kuti mube mukulifwinsya kubantu baliboobo alimwi akuli woonse ugwasizya mumulimu alimwi kaminwa andiswe.

¹⁷Ndilabotelwa kuboola kwaSitefanasi, Fotunatasi, alimwi a Achayikkasi. Bakayiizyiita mukutaba kwako.

¹⁸Nkambo bakatontozya muuya wangu awanu. Mpawo eelyo, amubayeye bantu bali mbuli mbabo.

¹⁹Imbungano zyaku Asiya zilamwanzya. Akwila a Pulisila baamwanzya muMwami ambungano eeyo ilimumunzi wabo.

²⁰Boonse beenzuma balamwaanzya. Mwaanzyane umwi awumwi alumyonto lusalala

²¹Ime, ndiPawulo, ndilemba eechi aluboko lwangu.

²²Kuti umwi katamuyandipe Mwami, ngatukwe.

²³Luzyalo lwaMwami wesu Jesu alube andinywe.

²⁴Luyando lwangu alube andinywe moonse kuli Kilisito Jesu.