1Nggu wan nga murung’agen e salpiy ni ngan kunuy ni ngan ayuweg e pi’in girdi’en Got ngay ni yad bay u Judea: thingar mu rin’ed e tin kugog ngak girdi’en e galesiya nu Galatia ni ngar rin’ed.
2Chirofen nsom’on u gubin e wik ni aram e madnom e ra bigimed ma thangri fek boch u puluwon nge tay ngabang ni be yan u rogon e salpiy ni be yag ngak, ya nggu taw ma dakuriy fan ni ngan mukun salpiy.
3Nap’an ni bay gub mu gol’oeg e pi pumo’on ni gimed e kam dugliyed ni ngar feked e salpiy ni kam kunuyed nib tow’ath i yan nga Jerusalem, ma bay gu yoloy e babyor ni murung’agen urngin ban’en nggu pi’ ngorad ngar feked.
4Ma fa’anra bay fan ni nggu wan, me ere bay ra uned ngog nggu warod.
5Bay gu milekag u lan yu Macedonia mu gub ngomed — ya gu ra yib u lan yu Macedonia.
6Sana ra gu par romed nib n’uw nap’an boch, ni sana n’umngin i nap’an nib garbeb e yafang, ma aram e rayag ni ngam ayuweged gag nggu ul ul ko milekag rog, ni gin’en ni ir e nggu sor ngay.
7Ya dabug ni nga yugu da mada’gad mu gu wan. Ya gu be finey ni nggu par romed nib n’uw nap’an boch, ni fa’anra m’agan’ Somol ngay.
8Machane kug finey ni nggu par u roy u Efesus nge yan i mada’ ko rofen ni Pentekost.
9Yugu bo’or e girdi’ ni be togopluw ngog u roy, machane ba mab e kanawo’ ngog u roy nrayag ni gu ngongliy e maruwel riy ni ba ga’ mra yib fan.
10Fa’anra yib Timothy ngomed ma ngam guyed rogon nge par romed nike pagan’, ya be maruwel rok Somol ni bod rogog.
11Dariy be’ ni nge tafinaynag ndariyfan, machane thingar mu ayuweged nge ul ul ko milekag rok u fithik’ e gapas, nge yag ni sul ngog; ya gu be sonnag ni nge sul ni yad boch pi walageg ni girdi’en Kristus.
12Nggu wan nga murung’agen walagdad i Apollos ni girdi’en Kristus: ke yo’or yay ni kug pi’ e athamgil nga laniyan’ ni ngarbad boch i walagdad ni girdi’en Kristus ra guyed gimed, machane dawori duwgiliy ni nge yib e chiney; ma nap’an nra bung rogon me yib.
13Mu ayuwgad, mpired ni gimed bmuduwgil u fithik’ e michan’ romed ngak Kristus, dab mu rusgad, mpired ni gimed ba gel.
14Mu ngongliyed urngin e maruwel romed u fithik’ i rogon nib t’uf e girdi’ romed.
15Gimed manang murung’agen Stefanas nge girdi’en e tabinaw rok; yad e som’on ko girdi’ u Greece nra piggad ngar manged girdi’en Kristus, ma yad be tiyan’rad ngak girdi’en Got yad be ayuwegrad. Gu be wenig ngomed, pi walageg ni girdi’en Kristus,
16ni ngam folgad rok e pi’in yad bod e pi cha’ney, nge rok urngin e pi’in be un ngorad ko maruwel nge pigpig.
17Kug felfelan’ nike yib Stefanas nge Fortunatus, nge Akaikus; ka ranod nga luwmed,
18ma kar felfelan’ niged gag ni bod rogon nra felfelan’ niged gimed. Girdi’ ni aray rogon e bay rogon ni ngan pining e magaer ngorad.
19Girdi’en e pi galesiya ni bay u lan e nug nu Asia e be lungurad e nge felan’ Got ngomed; Aquila nge Priscilla nge girdi’en e galesiya ni yad ma mu’ulung ngalan e naun rorow e be lungurad e nge felan’ Somol ngomed.
20Urngin pi walagdad ni girdi’en Kristus u roy e be lungurad e nge felan’ Got ngomed. Gimed ra mada’ ma ngam farayed owchemed nrogon e pi’in kar walaggad u daken Kristus.
21Re bugithin ni ba’aray e ri gag Paul e kug yoloy nga pa’ag ke yib ngomed ni be lungug: Nge felan’ Somol ngomed.
22Cha’ nde t’uf Somol rok e nge buch wa’athan! Maranatha— Somol romad, moy!
23I Somol Jesus e ngi i ayuwegmed.
24Gimed gubin ni gimed ba t’uf rog u fithik’ Kristus Jesus.
