1 Qorontoose 16

1

2

3

4

5

6

7

8

9

10

11

12

13

14

15

16

¹Ha7i qasse ammanizaytas miisha keso gish Galatiyan diza Woosa Keeththatas tani immida azazo mala inteka ooththite.

²Miishay kezanay buro ta hee biin gidonta mala intefe issi issi asi baasi diza mala saamintan saamintan issi gallas wogga wogga kessi wotho.

³Ta he biza wode inte doorida asatas ta moyzo dabdaabe xaafa immada, isti inte immida imota Yerusalame gaththana mala haappe ta kiittana.

⁴Ta istara baanas koshshizaz gidikko tanara baandettes.

⁵Tani bashe Maqidooniyara aadhdha buussi taas attonta gish ta Maqidooniya gakkada heera inteko baana.

⁶Ta awakka bishin tana ogey waayssonta mala inte tana maaddana mala bashe ta inte achchan gam7onta aggike. Oone erizay balgoy aadhdhana gakkanaas ta inte achchan balgoza aaththonta waaya aggana.

⁷Ta inte achchan daro wode gam7anas koyiza gish intena coo ogera aadhdha bashe beyanas koyikke. Goda shene gidikko inte achchan adussa wode gam7anas koyays.

⁸Gido attin Phenxaqoste geetettiza ba7aale gallas gakkanaas ta Efesoonen gam7ana.

⁹Ta heen gam7ana gaasoyka taas heen gita ooso pengey doyettides shin tanara eqetizayti daroti deettes.

¹⁰Ximtoosi inteko biikko izi ta mala Goda oosancha gidida gish izi baboy baynda daana mala inte iza maaddite.

¹¹Hessa gish oonikka iza kadhoppo. Izi taakko saron simmana mala inte maaddite. Nukka hara ammanizaytara iza yuussa naagon doos.

¹²Nu isha Aphilosi hara ammanizaytara inteko baana mala keeha woossadis shin izi qas ha7i inteko baanas koybenna. Gido attin baana ogey giigishin izi inteko baana.

¹³Beeggite! Ammanon minni eqqite; minnite; goobte.

¹⁴Inte ooththizaz wursikka siiqon ooththite.

¹⁵Ta ishato! Akaaya biittan koyro ammaniday Istifanooseso asa gididayssanne ammaniza asa maaddanas isti bana aaththi immidayssa inteka ereeta.

¹⁶Ista misatiza asatasinne istara issife daaburiza asatas ubbas azazettana mala ta intena woossays.

¹⁷Istifanoossi, Ferdonaxoossinne Akayqoosi yida gish ta daro ufayetays. Gaasoyka inte haan tanara doonta gish isti taas paccizaz wursi kunthida.

¹⁸Ta woznanne inte wozna wursi shempisida. Hessa gish hessanta mala asata mule baloppite.

¹⁹Iisiya biittan diza Woosa Keeththati intena saro geetes. Aqilaynne Phirsiqillaykka ista soon shiiqiza ammaniza asay Goda sunthan boncho sarota intes shiisheetes.

²⁰Haan ammanizayti wurikka intena saro geetes. Inte inte giddon issoy issara siiqo yeereteth yeeretite.

²¹Hayssa sarokka ta kushera xaafiday tana Phawuloosa.

²²Goda dosontadey diikko izi qangetidade gido! Godo haaya!

²³Goda Yesusa kiyatethi intenara gido.

²⁴Ta siiqoy Goda Yesus Kirstoosa baggara intes ubbas gido. Amiin.