1 Corintios 16

1

2

3

4

5

6

7

8

9

10

11

12

13

14

15

16

¹Nach ṉia' naquen' gonḻe cate' gwtoble mechw da' gaclenen beṉe' ca' chesejnilaže' Diosen' Jerusalénṉa'. Ḻe gon can' bena' mandadw yeson beṉe' ca' chesedop chesežag chesonxene' Criston' to to yež da' zjachi' distritw Galacia.

²Yogo' ža dmigw to tole cheyaḻa' cuejle late' güeje mechw según gaca'te' benḻe gan lagüe' xman. Na' co'ošagüe'le mechon' cont den cate' yida' gan' zoale na' gague za' gwtoblen cate' yedeṉa'a le'e.

³Nach cate' la'a gan' zoalen', cana' gwzoja' cart da' yesox̱e' beṉe' ca' chaclaže'le šjasesane' xmechwlen' Jerusalénṉa'.

⁴Na' še chonen byen ša'a, cuina' c̱hi'a ḻegaque' Jerusalénṉa'.

⁵Na' yida' gan' zoale cate' yeyož yedia' Macedonia, ḻe cheyaḻa' šjayṉa'a beṉe' ḻježcho ca' nita' na'.

⁶Na' chacda' yega'aṉlena' le'e do tbio' do c̱hop bio' o še yega'aṉa' doxen tiemp zag, nach gaclenḻe neda' cate' yeza' ša'a gate'teze ša'a.

⁷Bi chaclaža' yedeṉa'a le'e ṉa'a, ḻe con teza' še ba za'a, na' chaclaža' soa' sša len le'e cate' yida' še X̱ancho Diosen' goṉšque' latje.

⁸Chaclaža' yega'aṉa' Efeso nga žinch ža gaḻa' ḻṉi dan' že' Pentecostés.

⁹Ḻe beṉe' zan že' nga beṉe' chesaclaže' yosozenague' c̱he Criston' na' ḻecze že' beṉe' zan beṉe' bi chesaclaže' c̱hix̱jue'eda' xtižen'.

¹⁰Na' še la' Timoteon' gan' zoalen', ḻe gwlebe' na' ḻe gwzenag c̱he' cont bi žebe' gwsed gwlo'ede' le'e, ḻe can' chona' xšin X̱ancho Diosen', ḻecz can' chonen'.

¹¹Ṉe tole bi cheyaḻa' gonḻe xbab bibi zaca' da' chsed chlo'ede', san soale güen len ḻe' na' gaclenḻne' cate' yeze'e cont yeyede' gan' zoa' nga to šagüe' to güen, ḻe chbeza'ne' txen len yezica'chle beṉe' ḻježcho ca'.

¹²Na' ca nac Apolosen', gota'yoeda'ne' ḻecze šejlene' Timoteon' gan' zoalen', txen len yezica'chle beṉe' ḻježcho ca' yesaclene' ḻe'. Perw bi chaclaže' šeje' ṉa'a, na' šeje' cate' soe' to latje.

¹³Ḻe soa ḻe ṉa' can' chonḻen', na' ḻe soa len toze xbab šejnilaže'le Criston'. Bi žeble, san ḻe soac̱hac̱h gonḻe can' chazlaže' Diosen'.

¹⁴Na' ḻe gaque ḻježle bite'teze da' chonḻe.

¹⁵Beṉe' migw c̱hia', ṉezele beṉe' ca' že' liž Estéfanas gosaque' beṉe' nechw gosejnilaže' Criston' distritw Acayan' na' ba gosaclenchgüe' yezica'chle beṉe' ḻježcho beṉe' chesejnilaže'ne'.

¹⁶Da'nan' chṉeyoeda' ḻe gwzenag c̱hegaque' na' gonḻe can' chesenen', na' ḻe gwzenag c̱he nochle beṉe' cheson xšin Diosen' na' chesaclene' beṉe' ḻježcho ca' can' chesone'na'.

¹⁷Chebeda' ba besela' Estéfanas, Fortunato, na' Acaico gan' zoa' nga. Ḻegaque' ba gosaclene' neda' cont bich chacyaše'da' dan' bi zoale nga len neda'.

¹⁸Ba gosone' cont beyaclaža' can' ba gosoncze' len le'e cana', na' da'nan' cheyaḻa' güe'cho yeḻa' chox̱clen c̱hegaque' c̱he dan' ba gosonen'.

¹⁹Beṉe' ca' chesedop chesežag chesonxene' Criston' doxen distritw Asian' chosoguape' le'e tiox. Na' Aquila na' Priscila na' beṉe' ca' chesežag ližgaque' chesonxene' Criston' ḻecze chosoguapchgüe' le'e tiox.

²⁰Nach yogo' beṉe' ḻježcho že' nga chosoguape' le'e tiox. Na' cate' chdop chžagle txen, ḻe gwnopa' na' ḻježle cate' gwguap ḻježle tiox cont gacbia' chaque ḻježle.

²¹Cuincza' neda' Pablo chzoja' late' dao' ḻe'e cart nga chguapa' le'e tiox.

²²Na' še ṉe' nc̱hix̱e baḻle bi chaquele X̱ancho Jesucriston', Diosen' gone' cont cuiaye'e toḻi tocaṉe. X̱ancho Jesucristo, yidšco' da' yoble.

²³Gaclenšca X̱ancho Jesucriston' le'e.

²⁴Chacda' yogo'le da' naccho txen chejnilaže'cho Cristo Jesúsen'. Da' na'zen' žia' le'e.