1 Korinto 16

1

2

3

4

5

6

7

8

9

10

11

12

13

14

15

16

¹Nadid, tungkul ta abuluy tam du tétotop tam ta Hudea a te hirap. Gemtén moy be tu nibilin ko du iba a simbaan ta Galasia.

²Tuwing simba, i bawat esa dikam, éy dapat ibukod moy i sénganya to mineta moy, a iimbak moy, monda éwanék tu kailangan a magaged dikam ta abuluy moy ta kédemét ko.

³Ey nadid, kédemét ko sina, éy péglakadén ko ta Jerusalem i maski ti ésiya a gustu moy, a magtugén ta abuluy moy dide. Sakay manulaték be ta simbaan ta Jerusalem, monda tukoy de a sakén i nagutusa du pinaange moy sa.

⁴Sakay éng maglakadék be ta Jerusalem, éy kuyugén ko dén du paangen moy sa.

⁵Nadid, éy umangeék pa ta Masedonia. Kéhektat ko sa, éy tulos ko sina dikam.

⁶Makay maleék sina dikam. Makay mégiyanék sina a esa a amiyan, monda pagayakanék moy éng maglakadék ta iba a lugar.

⁷Idelék a sumibel san sina; éngˈwan, gustu ko a matagal sina dikam, éng pakultadenék na Panginoon.

⁸Pero édseék pabi nadid ta Epesoae, hanggan éwan malipas i Piyesta na Pentekos.

⁹Da maski te meaduék a kakontara ta éye, éy te meadu be se a gustu a mégbati ta pégtoldu ko.

¹⁰Eng dumemét sina ti Timoteo, éy tanggapén moy siya ta mahusay, da mégtarabaho be siya ta Diyos, a kona diyakén.

¹¹Diyan moy siya apién. Maigi pa, éy péglakadén moy siya ta mahusay, monda makasoli se siya diyakén, da sakén éy uhayén ko siya sakay du kakaguman na.

¹²Sakay tu top tam a Apolos, éy pinékiohonan ko siya a kuyugén na du iba a top tam ta péngbisita de dikam. Pero éwan pabi maari a makaange sina dikam. Bumisita siya dikam, bagay te panahun siya.

¹³Mangilag kam, a patibayén moy i isip moya ta péniwala tam. Diyan kam méganteng.

¹⁴I mahalaga a gemtén moy éy mahalén moy i kapareho moy.

¹⁵Nadid, a tétotop ko, éy te bilinék pa dikam a esa: Tukoy moy dén de Esteban a mététena, a side i neditol a méniwala ta Akaya. Palagi side nadid a mégtulung du tolay na Diyos.

¹⁶I pékiohon kua dikam, éy pasakup kam ta kona sa a tolay. Pasakup kam du étanan a mégtulung du méniwala ta Diyos.

¹⁷Masayaék, da dinumemét dén se de Esteban, sakay ti Portuna, sakay ti Akay. Maski éwan kam se, éy side i katulung ko.

¹⁸Pinatibay de dén i isip kua, sakay ta isip moya. Igalang moy i kona sa a tolay.

¹⁹Du tolay ta bawat simbaan ta Asia éy mékikumusta side dikam. De Akila éy ti Priska, sakay du tolay a mégsimba ta bile de, éy mékikumusta be side dikam, da top moy be side ta péniwala.

²⁰Sakay mékikumusta dikam du iba a top tam ta éye. Sikam éy négbatian kam ta mahusay.

²¹Sakén éy ti Pablo. Sakén a mismo i nagsulata ta éye.

²²Maski ti ésiya éng éwan na gustu i Panginoon tam--isumpa siya! Dumemét ka maka agad, Panginoon!

²³Kagbian kam maka na Panginoon tam a Jesu Cristo.

²⁴Mahal ta kam a étanan, dahil ni Cristo Jesus. Ewan dén, Pablo.