1 Korinte 16

1

2

3

4

5

6

7

8

9

10

11

12

13

14

15

16

¹Now wi o taki abra a moni san un e piki fu yepi den sma fu Gado. San mi taigi den gemeente fu Galasia fu den du, na dati unu srefi mus du tu.

²Ala fosi dei fu a wiki, iniwan sma mus poti moni na wan sei. A mus poti san a man fu poti. Dan a mus kibri en. Bika a no mus de so tak' na te mi doro, dan fosi un o piki a moni.

³Te mi doro, dan mi o gi brifi na den sma di un e fertrow. Dan mi o seni den fu tyari a moni fu unu go na Yerusalem.

⁴Efu a de fanowdu tak' mi go tu, dan den sa go makandra nanga mi.

⁵Te mi waka lontu ini Masedonia, dan mi o kon na unu. Bika mi o waka lontu ini Masedonia.

⁶Ma mi wani tan na unu pikinso moro langa. Kande mi e tan a heri kowruten fu a yari srefi. Dan un kan yepi mi te mi mus go moro fara.

⁷Mi no wani tak' na te mi e psa fu go moro fara, ne mi kon luku unu. Ma efu Masra wani, dan mi wani tan wan pisten nanga unu.

⁸Ma now mi o tan na Efese te go miti a Pinksterfesa.

⁹Bika wan bigi doro opo dyaso gi mi èn furu okasi de. Ma furu sma e pruberi fu tapu pasi gi mi tu.

¹⁰Te Timoteus kon na unu, un mus sorgu tak' a e firi ensrefi na oso na un mindri. Bika a e wroko gi Masra neleki mi.

¹¹Dat' meki no wan sma mus si en leki noti. Ma un mus yepi en fu a go moro fara nanga freide, fu a kan drai kon baka na mi. Bika mi nanga den tra brada e ferwakti en baka.

¹²Fu taki fu brada Apolos. Furu leisi mi begi en fu kon na unu makandra nanga den tra brada. Ma a no ben wani kon nownow. Ma a o kon te a kisi a okasi.

¹³Un mus tan na ai! Un tan tnapu tranga na ini a bribi, no frede, hori dek'ati.

¹⁴Ala sani san un e du, un mus du nanga lobi.

¹⁵Un sabi Stefanas nanga den sma fu en oso. Den na den fosi sma fu Akaya di teki bribi. Den teki en leki den wroko fu yepi den sma fu Gado. Dat' meki mi e begi unu, brada nanga sisa,

¹⁶fu un saka unsrefi gi den sortu sma disi, nanga gi trawan di e du a wroko tu èn di e wroko tranga.

¹⁷Mi breiti tak' Stefanas, Fortunatus nanga Akaikus kon. Bika fu di unu no man de dya, meki den teki un presi.

¹⁸Den meki mi nanga unu srefi firi bun. Un mus fu sori den tak' un breiti nanga san den e du.

¹⁹Den gemeente fu a distrikti Asia seni taki un odi. Akwila nanga Prisila nanga a gemeente di e kon makandra na den oso, seni bigi odi gi unu ini Masra.

²⁰Ala den brada nanga sisa seni taki un odi. Un mus taki makandra odi nanga wan santa bosi.

²¹Mi Paulus seni taki un odi tu. Nanga mi eigi anu mi e skrifi en.

²²Wan fluku de na tapu a sma di no lobi Masra. Maranata!

²³Meki a bun-ati fu Masra Yesus de nanga unu.

²⁴Mi lobi un alamala, fu di un alamala de wan nanga Kristus Yesus.