1 Akakolinto 16

1

2

3

4

5

6

7

8

9

10

11

12

13

14

15

16

¹Ngoe kunhwalo gwa chango ya ela kwa magambu ga kape bandu ba Nnoongo, ntendanga andi panalagalinge bandu ba makanicha guku Galatia.

²Kila Jumapili kila mundu abeke ela tela na apapata, kupala gukabeje michango kingobu pambakuika.

³Kingobu pambakuika kwinu, nakinga bandu abampa kachagula kati jinu bapeleke balua na hupo inu Kuyelusalemu.

⁴Anda ipaligwe kujenda na nenga, tijabulanga nanenga.

⁵Mainka kwinu kuboka pa kupete Kamakedonia magambu mbakupete kwenio.

⁶Mbemele nitama kwenio kwa machoba machoko pangaje nitama machoba goa ga malili, kupala unyangatange mumwanja gwango kokotikola okumbakujenda.

⁷Mbaije kupeta kwinu chokwechokwe nu kujendeke na mwanja. Mbemele mandama kwinu machoba majingi anda Angwana bapaile.

⁸Nambu mba upamba pa Efeso mpaka lichoba lya Pentekoste.

⁹Pamba napabona pabi kipola pukamu maengo gango gambone, iganukube abangana babilingite ndu.

¹⁰Anda aike Timoteo makammeka kube na mbweleje, magambu jwenio akamu maengo ga Angwana andi pangamu nenga.

¹¹Makammembulaje, nambu munyangate ajendeke na mwanja gwakwe kwa tengela kupala aoto kubuja kwango, magambu twenga tutenda kunnolela aike na akalongo bito.

¹²Apolo nnongo gwito, ndekumpembela muno kupala aike kwenio pamwe na bange abanhyobale Nnoongo, apaije kuika machoba gano, nambu maika kwenio anda aotwile.

¹³Nkelukiange, ntamanga maha muimani jinu, nkachanange nu kube na makakala.

¹⁴Kila chankamula nkamulanga kwa mapalano.

¹⁵Mikimanyi kibelei cha Stefano, angweto bakiba bukulongalela kupokela lihyobalelo lya Kikilisto kukilambo cha Kuakaya, ni bikibekangite beneakangweto kabegelela bandu ba Nnoongo. Nanyopanga makalongo bango,

¹⁶mikibekange pae ja ulongochi gwa bandu andi benia na mulongochi gwa kila mundu ojwakamu maengo nu kubegelela pamwe nangweto.

¹⁷Nhala mojo muno kutenda Stefano na Fatunato na Akaiko baikangite, baibangite lilanga elikiba gwanga beganga gwinu.

¹⁸Bikialali kiuhuke chango na kiuhuke chinu uhyo. Yene ipaligwa kakombakela bandu andi benia.

¹⁹Bandu boa ba kukilambo chuku Asia abahyobale Nnoongo bampatanga abali. Akula na Pilisika pamwe na bandu ba likanicha boa ababilingite munyumba jabe bampatanga abali ku lina lya Angwana.

²⁰Akalongo boa bampatanga abali. Namangweto uhyo mpatananga abali kukiingi cha mapalano ga Nnoongo.

²¹Nenga Napaulo nampatanga abali, andika balua kuluboko lwango namwene.

²²Mundu jwajwoa jwangapala Angwana, abekigwe nhwilo. Angwana nhwike!

²³Upeele gwa Angwana ana Yesu ube pamwe na mangweto.

²⁴Mapalano gango gabe pamwe na mangweto mammi nkati ja Yesu Kilisto.