1 Wakolinto 16

1

2

3

4

5

6

7

8

9

10

11

12

13

14

15

16

¹Lelo nonge imbuli yokuwasangila iwanu we Imulungu, mtende achila chanighalongele makingili ghe iwanu we Imulungu gha Wagalatiya.

²Chila jumapili, chila munu mghati mwenu yabaghule sendi iilawa mna achila choyobokela, kuya yeke ili hanikutsa ndeke kubama msango keli.

³Kuya hanipfika kuna mwemwe nitsowatuma awala yamuwasaghula waghale ibaluwa na msango wenu Yerusalemu.

⁴Ka pfinogha na nene kughenda ako, watselongotsa na nene.

⁵Hanitsobita kughenda Makedoniya, tanu nitsakutsa kuna mwemwe, mana nobama kughenda Makedoniya.

⁶Nodaha kukala na mwemwe chidogho, au kukala namwe matsuwa ghose gha chipfeghetsi, ili mnyapfile mna ghumwanza wangu kokose konighenda.

⁷Sibama bae kwibona na mwemwe kwa kubita kuliheka, nobama nikale namwe chidogho Imtwatsa ang'abama.

⁸Lekeni nitsokala hano Efeso mbaka litsuwa lya Pentekoste,

⁹kwaapfila libani lya mwatsi kwa sang'ano yangu ng'ulu hano, hata ka kuna iwanu wengi iwobela ghanilonga.

¹⁰Timoteo ang'atsa mumtende aleke kwalangula chinu chochose hayatsokala na mwemwe, kwaapfila yeye kosang'ana ing'onde ye Imtwatsa ka nene.

¹¹Apfo imunu wowose yaleke kumbetsa, ila mwapfileni yaghendelele tseghamba na ghumwanza wake ili yadahe kumbuyila. Mana nomlolela yoye ne iwanu wangi.

¹²Lelo nonge mbuli ya ndughu yetu Apolo, tsanimkomangitsa yamwangileni hamwe na iwandughu wangi. Lekeni ng'obama bae kutsa sambi, lekeni katsakutsa hayatsopata uleghelo.

¹³Mkale meso, mwikindilise mne ukutoghola, mwime chilume na muwe iwanu wane ngupfu.

¹⁴Msang'ane ghose kwa kwinoghela.

¹⁵Mwommanya Stefana na iwanu wa mkaye mwake, wawo tsawalongola kuwa wakiristu ako Akaya, kuya tsawelapfa wenyegho kuwasang'anila iwanu we Imulungu. Apfo ndughu tsangu nowalomba,

¹⁶muwategheletse iwanu ka awo na chila imunu iyosang'ana nawo.

¹⁷Tsandeng'ela hawatsile Stefana na Fotonata na Akaiko, kwaapfila tsawamemesa achila ichihunguke kuna mwemwe.

¹⁸Mana tsawadeng'eletsa ghumoyo ghwangu ka pfawamdeng'eletseni mwemwe. Iwanu awo pfinogha wang'akumbukighwa.

¹⁹Makingili ghe iwanu we Imulungu gha Asiya ghomlamsani. Akila na Pilisila ne iwanu wose iwotingana mkaye mwawo womlamsani kwa taghwa lye Imtwatsa.

²⁰Wandughu wose iwali hano womlamsani. Mwilamse kwa kulangusa unoghelo wa Kiristu.

²¹Nene, Pauli nowalamsani, nakwandika kwa ghumoko ghwangu mwenyegho.

²²Imunu wowose iyolema kumnoghela Imtwatsa, ayo yalighitwe. Utse ghwe Imtwatsa wetu.

²³Uluso we Imtwatsa Yesu ukale namwe.

²⁴Unoghelo wangu ukale na mwemwe wose yamli mghati mwa Kiristu Yesu.