1 Qoronttoosa 16

1

2

3

4

5

6

7

8

9

10

11

12

13

14

15

16

¹Ammaniya asaas miishe shiishobaa Galaatiya woosa keethatas taani kiittidayssada hintteka oothite.

²Miishiya shiishoy ta hintteko biya wode gidonna mela issoy issoy saaminttafe koyro gallas, wogga wode wogga wode ba demmeyssafe kessidi ba son dagayo.

³Taani yaa bida wode miishiya Yerusalaame gathana mela hintte dooriya asaas dabddaabbe immada entta Yerusalaame kiittana.

⁴Enttara ta buussay koshshiyabaa gidikko entti taara baanaw dandda7osona.

⁵Taani Maqedooniyara aadhdhanaw qoppida gisho yaa bada hintteko yaana.

⁶Ta biyaso aw gidikkoka, ta buussan hintte tana maaddana mela hintte matan guutha wode gam77onna aggike. Balggo ageenata hintte matan aathonna waaya aggana.

⁷Taani ogera aadhdhashe hinttena be7anaw koyikke. Goday giikko, hintte matan guutha wode takkanaw qoppays.

⁸Shin taani Phenxeqosxe Baaley gakkanaw Efesoonan gam77ana.

⁹Taw oosoy kumida dalgga penggey dooyettis, shin daro eqettiya morkketi de7oosona.

¹⁰I ta mela Godaa ooso oothiya asi gidiya gisho Ximotiyoosi hintteko biikko, hintte matan I hirggonna daana mela oothite.

¹¹Oonikka iya kadhoppo. I taakko saro simmana mela iya maaddidi moyzite. Taani I hankko ammaneyssatara simmanayssa naagays.

¹²Nu ishaa Aphiloosi hankko ammaneyssatara hintteko baana mela ta iya mintha woossas. Ha77i hintteko baanaw koyibeenna, shin iyaw injjetiya wode hintteko baana.

¹³Barkkite; Ammanon eqqite; xaalite; minnite.

¹⁴Ooso ubbaa siiqon oothite.

¹⁵Ta ishato, Isxifaanoseynne iya soo asay Akkayan entti koyro ammanidayssata gideyssanne ammaneyssata maaddanaw banttana aathi immidayssa hintte ereeta.

¹⁶Hintteka entta mela asaasinne, enttara ooson daaburiya ubbaas kiitettana mela ta hinttena woossays.

¹⁷Isxifaanosey, Forchchunaasinne Akkayqoosi taakko yidayssi tana ufayssis. Hintte baynna bessan entti hinttena gididi ta pacaa kunthidosona.

¹⁸Entti hinttena ufayssidayssada tanakka ufayssidosona. Hessa mela asata dogoppite.

¹⁹Iisiya woosa keetha asay hinttena saro goosona. Aqiilinne Phirisqila bantta son shiiqiya woosa keethaa asaara issife hinttena Godaa sunthan wozanappe sarothoosona.

²⁰Ammaniya ishati ubbay hinttena saro yaagosona. Geeshsha yeeretethi yeerettishe issoy issuwa sarothite.

²¹Taani, Phawuloosi, ha sarothuwa ta kushen xaafas.

²²Godaa dosonna asi de7ikko, qanggettidayssa gido. Nu Godaw, haaya!

²³Godaa Yesuus Kiristtoosa aadho keehatethay hinttera gido.

²⁴Ta siiqoy Kiristtoos Yesuusan de7iya hintte ubbaara gido. Amin77i.