1 Wakolinto 16

1

2

3

4

5

6

7

8

9

10

11

12

13

14

15

16

¹Mwahasanga sente mbuli ya wanhu wa Mulungu, nowalonda mutende kamba vija vinivilongele vibumbila va wanhu wamtogole Yesu ako Galatia.

²Kila jumapili kila munhu kumwenu yabagule sente, ziigale na vija vimupatile, zikeni goya, muladi vondanize sekemulonde kusanga sente.

³Vondanize, nowagwaa baluwa na nhunza zenu waja muwasagule na nowatuma wachole Yelusalemu.

⁴Kamba yofaya naniye nichole, aho wodaha kuchola na niye.

⁵Nahabitila mwiisi ya Makedonia, nokwiza kuwalola, kwavija nogesa kubitila Makedonia.

⁶Sengine nokala na mweye kipindi kidodo, hebu sengine nodaha kukala na mweye kipindi chose cha kihuhwe, avo modaha kunitaza nigendelele na mwanza wangu kokose konda nichole.

⁷Mndewa yahalonda, nokwiza kumwenu kukala ng'hani, kubanza kwima aho kwa kipindi kidodo.

⁸Nokala hano kudibuga da Efeso mbaka siku ya Pentekosite.

⁹Kwavija nivuguliligwa lwivi mkulu mbuli ya sang'hano yangu, hamoja hana wanhu bwando wondema.

¹⁰Timoseo yaheza, mbokeleni goya, kwavija kotenda sang'hano ya Mndewa, kamba niye.

¹¹Munhu yoyose sekeyamwehule, lakini mumtaze yagendelele goya na mwanza wake, muladi yabwele kumwangu, kwavija niye nombeta hamoja na ndugu zangu.

¹²Avo, kwa mbuli ya ndugu yetu Apolo, baho kwa baho nimnanahiza yeze kumwenu hamoja na wanhu wayagwe wamtogole Yesu, lakini halonda bule kwiza sambi bule, avo yahadahika kokwiza.

¹³Kaleni meso, gangamaleni mditamanilo, muwe magalu na weli na nguvu.

¹⁴Sang'hano zenu zose muzitende kwa unogelwa.

¹⁵Ndugu zangu, mojuwa kuwa Sitefana na wanhu wa lubuga lwake wakala wa ichanduso kumtogola Yesu mwiisi ya Akaya. Watenda viwadahile kuwasang'hanila wanhu wa Mulungu. Ndugu zangu, nowapula,

¹⁶wategelezeni wanhu kamba wano, na munhu yoyose iyagwe yosang'hana hamoja na wao.

¹⁷Nodeng'helela ng'hani kwavija Sitefana, Folitunata na Akaiko wavika hano. Kukala kwao hano, ni kamba wasola hanhu ha kukala na mweye.

¹⁸Wautenda moyo wangu usamhuke ng'hani, kamba viwawatendile mweye musamhuke. Wategelezeni wanhu kamba wao.

¹⁹Vibumbila va wanhu wamtogole Yesu mwiisi ya Asiya kwa kuilumba na Kilisito vowalamuseni ng'hani. Akula na Pilisila na wanhu wa Mulungu weli mzing'anda zao, womulamuseni kwa twaga da Mndewa.

²⁰Wanhu wose hano wamtogole Yesu womulamuseni. Muilamuse kwa nzila ilagusa moinogela.

²¹Niye Paulo nowalamusa, nokwandika kwa makono gangu mwenyego.

²²Munhu yoyose hamnogela Mndewa, yaduiligwe na Mulungu! Mndewa wetu izo!

²³Ng'hekewa ya Mndewa Yesu ikale hamoja na mweye.

²⁴Nowanogela mose kwa kuilumba na Yesu Kilisito.