1Le' cón che'n ayud co' thop gu' par lyath no gu' mèn co' ndxela's, co' ngro xà' loo cón che'n xab izlyo' no co' ngòc che'npe' Diox, mèn co' ndyactìi ciuda Jerusalén na, ndlyazen li gu'i xal mblu'en no xal mnibe'en loo mèn co' nqueltàa loo cón che'n Diox co' nqueltàa chol lugar par ned le'n yèezya' che'n làaz mèn galas. Tataa lyazen li gu', ne.
2Ndlyazen co'se' gàc ner huiz sman, thìb thìb gu' tan'que' pla centav xal nda'i lugar loo gu' no xal nzo gu'. Le' sya, co'se' gal neen máa gu' par nedrè', ya inquinte quée lyàa gu' hora par thop gu' ayud co' naquin na' huiza.
3No co'se' zin daa loo gu', tel' na plá mèn co' cui gu'. No leque tiempa tel'en cart loo mèna par tan cuent loo cart loo mèn ciuda Jerusalén le' mèn co' nde lá' tmi co' nac ayud co' nac con' ndac co' mbli gu', mèn co' nac mèn co' hue' carta nac mèn co' ndoo lìte mtel' gu'.
4No chele' gu' ndyac naquin gan con mèna ciuda Jerusalén par yilá' nu' tmi, gan, xàa. Yende cón lii. Thiba con' ndxè'.
5Le' tediba na, tan cuent loo gu', co'se' tenen ned par ga neen máa gu' par nedrè', nerleque' con' lin, ga ri'then par ned le'n yèezya' co' nac ned làaz mèn macedon. Le' yiloa na, zin daa loo gu' le'n ciuda Corint.
6No thìb descuid go non gu' ndxep tiemp. O peser go non gu' par ri'then tiemp xìl' le'n ciuda gu'. Le' yiloa, co'se' ri'th tiemp xìl', nee gu' xal li gu', ya lyath no gu' daa ned ga que tee'en.
7Taandxè' ngue niin loo gu' tac indlyasten ante gal ri'then loo gu' par gal neen máa gu' par nedrè' no maste. Ndxe'leque', ndlyazen gal too naan gu' no go non gu' ndxep huiz chele' Tad Diox ta' lugar tataa gàca loon.
8Lomisque', ngue niin loo gu', ne: Daa be' lyen' ndxep huiz le'n ciuda Efes axta riid lni che'n Pentecostés.
9Tac nden'en le'n huiz ndxè' Diox mbli par huax mod mxyal' ned mxyal' yó' loon par gon yalbàn par càba thìb con' ndac loo mèn co' ndxòn ron. Per mèn co' nac ngolo ngola's, anze'f huax nzo. No ndxecloo mèna ñèe mèna daa.
10Chele' Timote zin loo gu', cua'n gu' mod nabe'ste go no gu' Timote par tyac lezo' Timote. Tac Timote nxo'f zin' zin' cón che'n Tad Crist, ne, xalque' nxo'f zin'en zin'.
11Cona, ngue niin loo gu': Nec thìb gu' no nec tedib gu' ne'xìis node gu' Timote. No ne'xyán'te gu' ñèe gu' Timote. Ndxe'leque', ya tee ned gu' Timote co'se' bii Timote par yende cón tyactìi Timote ned co'se' yi'th Timote loon. Tac daa ngue bed con mèn co' ndxàc hues na' par zin Timote.
12Le' cón che'n hues na' Apol na, tan cuent loo gu'. Huax vez mna'ben loo hues na' Apol con taamas mèn co' ndxàc hues na' par ngui'th nee hues na' Apol máa gu' par nedrè'. Per nec thìb mod no nec tedib mod tarte ta' Diox lugar yi'th hues na' Apol loo gu' nalle'. Per yi'th hues na' Apol loo gu' co'se' ta' lugara loo hues na' Apol.
13Lomisque' ndlyazen, nalas gure gu' loo ryethe con'. No gure nèe gu' loo con' co' ndxela's na' loo Tad Crist. Fque tee ban gu' xalque' mèn co', lìcque', mté'thque' no co' nda'que' cuent cón che'n Crist par tyubdi's ndac gu' loo cón che'n Crist. Blo gu' valor loo gu'. No ne'zyebte gu' loo con' ndxela's gu' loo Tad Crist.
14Lomisque' ne, ndlyazen le' ryete con' co' ndli gu' loo hues xtàa gu', bli gu'i dib nzo yéc gu' no dib nzo lezo' gu' xalque' mèn co', lìcque', nque' lezo' ñèe hues xtàa.
15Nalle' ne, mèn huesen por cón che'n Crist, gu' nonque' le' mèn guliz Stef ngòc nerleque' mèn co' ngola's di's ndac cón che'n Tad Crist co' nac ned le'n yèezya' co' nac làaz mèn acay. No non gu' le' mèna mblo yécque' par nxo'f zin' mèna thìb zin' par lyath no mèna chol mèn co' ndxela's, mèn co' ngro xà' loo cón che'n xab izlyo' par ngòc mèna che'npe' Diox, loo chol gast no loo chol con' co' nde che loo mèna.
16Lomisque' ne, ndlyazen le' thìb thìb gu' lyath no mèna. No ndlyazen lyath no gu' mèn co' nxo'f zin' con nu' no taamas mèn co' nque zin' loo cón che'n Tad Crist.
17Anze'f ndyac lezon tac mzinle' Stef no Fortunat no Acaic. Tac mèn ndxè' ndlyath no nu' loo ryethe con' co' nde che loo nu' co' ngòc di's ngàc por cón che'n gu' tac gu' yende co'se' ngòc di's ngli gu'i.
18Mèn ndxè' mbli le' daa ngo nagàl lezo' no tataa mod mbli mèna par ngo nagàl lezo' gu'. Blu' gu' mèn ndxè' loo hues xtàa gu' co' ndxela's par nedrè' no ta' gu' cuent cón che'n mèn ndxè' loo hues xtàa gu' par nedrè'.
19Mèn co' ndxela's co' nqueltàa par ned le'n yèezya' co' nac che'n làaz mèn asia ngue nii Diox loo gu'. Aquil no Priscil, no mèn co' ndxela's co' nqueltàa liz Aquil no Priscil, rye mèna ngue nii Diox loo gu', ne, por lèe Tad Crist.
20Ryete mèn co' ndxàc hues na' por lèe Tad Crist ngue nii Diox loo gu'. Co'se' nii thìb thìb gu' Diox loo xtàa gu', bde's gu' yen xtàa gu' xal nac mod co' ndxàp gu' no xal nac mod co' ndli gu'i làth xtàa gu'.
21Loo ye's co' mque'en ye's con ya'pe'en loo ye's ndxè', daa Pab ngue nii Diox loo gu'.
22Chele' chol mèn nzo co' ne'tyalte que' lezo' Tad Jesucrist, mandit mèna, co' nee di's, mèndèe gàc mèna too zee too yál' par tetìi tín' Diox mèna, yiloa. Maranatha, di's co' nee di's, Tad, U' co' nac Tad nu', de U'.
23Ndlyazen le' Tad Jesucrist na' tolo li anggàc más con' ndac loo gu'.
24Ndlyazen le' gu' non no nanee gu' le' daa nque'que' lezo' ñèen ryete gu' por cón che'n Tad Crist Jesús na', ndee gu'. Taandxè' gàca.
