1 Crónicas 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Dule-yawagak-dakmalad weyob mimilesmarmogad. Coréʼgi dulemar-danimalad: Coré-machi-Meselemías, Asaf-wagwa.

²Meselemías-e-masmaladi, wemalad: Zacarías, machi-sailagined. Zacarías-yarbalid, Jediael. Jediael-yarbalid, Zebadías. Zebadías-yarbalid, Jatniel.

³Jatniel-yarbalid, Elam. Elam-yarbalid, Johanán. Johanán-yarbalid, Elioenai.

⁴Obed-Edom-e-masmaladi, wemalad: Semaías, machi-sailagined, Semaías-yarbalid, Jozabad. Jozabad-yarbalid, Joa. Joa-yarbalid, Sacar. Sacar-yarbalid, Natanael.

⁵Natanael-yarbalid, Amiel. Amiel-yarbalid, Isacar. Isacar-yarbalid, Peultai. Ar Bab-Dummad Obed-Edomʼgi nabir binsassoggu, ega masmala-bukidar uksad.

⁶Obed-Edom-machi-Semaías masmala-baigan nikusbalid. Wemar, e-babgan-e-gwenadgan-iduedga gudii gusmalad. Ade, we-dulemar, dule-gandikmalad naed.

⁷Semaías-e-masmaladi, wemalad: Otni, Rafael, Obed, Elzabad. Wemar, dule-gala-ibegan nanaed. Semaías-e-gwenadgan: Eliú, degi, Samaquías. Wemar, dule-gala-ibegan nanamogad.

⁸Bela wemar, Obed-Edom-waganmalad. Wemala, e-wagan-e-masmala, degi, e-gwenadganse-bakar, dule-gala-ibegan-naed, arbaedgi gandikmaladid. Obed-Edom-wagan, waladulapaa-gakabo (62) mergued.

⁹Meselemías-e-masmala, degi, e-gwenadganse-bakar, warambe-gakabaabak (18) mergued, bela dule-gandikmaladid.

¹⁰Merari-wagwa-Hosaʼye-nugad-e-masmaladi, wemalad: Simri, (machi-sailaginedsulinad, degi-inigwele, e-bab, bur-dummadga nug-imaksad).

¹¹Simri-yarbalid, Hilcías. Hilcías-yarbalid, Tebalías. Tebalías-yarbalid, Zacarías. Belagwable Hosa-e-masmala, degi, e-gwenadganse-bakar, warambe-gakapaa (13) mergued.

¹²Weyob dule-yawagak-dakmalad, wachi-wachiba-arbamalaga mimilesmalad. Wemala, degi, e-dummagan, e-gwenadganse-bakale, Bab-Jehováʼse-goled-neggi-arbamalaga mimilesmalad.

¹³Yawagak-iliba egi nakulemalagala, burwiganase-bakale, dummaganse-bakale, e-babgan-e-gwenadgan-merguedba, ibmargi-wilubdaklegar yopira mimilesmalad.

¹⁴Mimilenaigua, Yawagak-Dad-Nakwedsikid-dakega, Selemías sulenonikid. Yawagak-Dad-Nakwed-Sapiledsik-dakegardi, Selemías-machi-Zacarías sulenonikid. Zacaríasʼde, dule-binsaed-daked-nuedid.

¹⁵Yawagak-Dad-Nakwed-Argan-Nuedsikid-dakega, Obed-Edom sulenonikid. Bab-Dummadse-goled-neggi ibmar-sabolemalad-neg-dakedgi-arbaegardi, Obed-Edom-e-masmala sulesmalad.

¹⁶Dad-argwanedsik Yawagak-Salequetʼye-nugad-dakegardi, Supim, Hosaʼbogwa sulesad. A-yawagaksik igar-nakwileged maid. Wachi-wachiba-arbaleged weyob mimilesad:

¹⁷Iba-ilibali yawagak-dad-nakwedsikidgi, Levita-dulemar-nakulemalad, walanergwa (6) bukwamalad. Yawagak-dad-nakwed-argan-sapiledsikidgi, walabake bukwamarbalid. Yawagak-dad-nakwed-argan-nuedsikidgi, walabake bukwamarbalid. Degi, ibmar-saboleged-neg-iliba, agi, ebo-ebo bukwamarbalid.

¹⁸Dule dad-argwanedsik neg-imba-naidgi nakulemalaga, Levita-dulemar walabake bukwamalad. Degi, dule neg-ollor-naid-dakedga, walabo gwichibalid.

¹⁹Weyob Coré-wagan, degi, Merari-wagan yawagak-dakmaladgi-arbaega mimiles nanaed.

²⁰Levita-dulemar-baigan, Bab-Dummadse-goled-neggi ibmar-nuegan-gargermalad-bukwad-daked-Ahíasʼga sulesmalad, degi, ibmar-Bab-Dummadga-nugsalegaled-dakedga sulesmarbalid.

²¹Gersón-wagwa-Laadán-e-wagan e-neguya-sedimaladi Jehiel-masmala ega gudimalad. Jehiel-e-masmala, wemalad:

²²Zetam, degi, Joel. Wemar-warbogwad Bab-Jehováʼse-goled-neggi ibmar-nuegan-gargermalad-dakedga sulesmalad.

²³Deginbali, Amram-dulemar-abargi, Izhar-dulemar-abargi, Hebrón-dulemar-abargi, Uziel-dulemar-abargi, dule-sulesmalad, wemalad:

²⁴Sebuel, ibmar-Bab-Dummadga-nugsalegaled-daked-e-dummadga nugsalesad. Sebuelʼde, Moisés-machi-Gersón-e-wagwad.

²⁵Sebuel-e-gwenadgan, e-gwenad-Eliezerʼgi-danikidi, wemar sulesmalad: Eliezer-machi-Rehabías. Rehabías-machi-Jesaías. Jesaías-machi-Joram. Joram-machi-Zicri. Zicri-machi-Selomit.

²⁶Selomit, degi, e-gwenadganmala, Bab-Jehováʼga ibmar-nuegan-nug-imaklegar-bukwad dakedmaladid. We-ibmar-nuegan-nug-imaklegar-bukwad, wemar uksad: Rey-David, Israel-e-gwenadgan-e-gwenadgan-e-dummagan, sorda-mili-milibalid-e-dummagan (1,000-1,000), sorda-dulataled-dulataled-e-dummagan (100-100), sorda-dummagan-baigan. Selomit, degi, e-gwenadganmala bela a-ibmar dakmaladid.

²⁷We-ibmarmar bila-onolesadgi sulesmaladid. Degi, we-ibmarmar, Bab-Jehováʼse-goled-neg-nudakega nug-imaksamalad.

²⁸Deyopira, Selomit, degi, e-gwenadganmala Bab-Dummadga ibmar-belagwable-nug-imaklesad akwismarbalid. We-ibmarmar we-dulemar uksamalad: Negburgan-daked-Samuel, Quis-machi-Saúl, Ner-machi-Abner, Sarvia-machi-Joab, degine, dule-baigan. We-dulemar, Bab-Jehováʼga-we-ibmarmar-belagwable-nug-imaksamalad akwismalad.

²⁹Izhar-e-wagansik: Quenanías, degi, e-masmala, Israelʼgi sailaganga mamaid, degi, Israel-dulemarga igar-itoged-dummaganbalid, degine, neggwebur-baiganbo igar-itomaladid.

³⁰Hebrón-dulemarsik: Hasabías, degi, e-gwenadganse-bakar, dule-gandikmalad-naed, bela miligwen gaka dulataled-ilagugle (1,700) mergued. Wemar Jordán-diwar-dad-argwanedsik bela Bab-Jehováʼga, degi, reyga arbabukwamalad.

³¹Hebrón-dulemar-e-gwenadgan-e-gwenadganga, Jerías e-dummadga maid. Birga-dulabogus (40) Rey-David-yar-semaidgi, nugmar-narmakar-mamaid-gardagi Hebrón-wagan-danimalad amismalad. Agi daklenonikid, Jazer-De-Galaad-neggweburgi Hebrón-waganmar-abargi dule-gandikidmalad gudimala.

³²Jerías-e-gwenadgan dule-gandikmalad-naed. Amarde, bela milibo gaka dulataled-ilagugle (2,700) mergued. Degi, e-gwenadgan-e-gwenadgan-dummadganga maimarbalid. Rey-David wemar-dakega Jerías-e-gwenadgan-onug-imaksad: Rubén-wagan-dakega, Gad-wagan-dakega, Manasés-wagan-neg-abalad-dakbaligar. Deginbali, bela Bab-Dummadga negdakega, degi, reyga negdakbaliga onug-imaksabalid.