1ᤀᤠᤸᤗ ᤏᤛᤠ᤺ᤴ ᤑᤠ᤹ᤀᤡᤴ ᤌᤧᤔᤠ ᤑᤠ᤹ᤗᤧ ᤏᤡᤱᤛᤠᤱ ᤀᤠᤈᤥᤃᤢᤶᤒᤠᤴ ᤛᤧᤰᤂᤠᤀᤣ ᤐᤥ᤺ᤱ ᤜᤧᤰᤁᤩᤠᤱ ᤀᤠᤴᤏᤡ᤺ᤛᤢᤶᤔᤡᤴᤒᤠᤴ ᤛᤧᤰᤂᤠᤀᤣ ᤘᤠ᤹ ᤑᤠ᤹ᤀᤠᤱ ᤏᤡᤛ᤻ᤛᤣ ᤆᤥ᤺ᤰᤔᤠᤖᤥ॥
2ᤀᤢᤏᤠᤜᤢᤖᤡᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤩᤧᤖᤥ॥
3ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤒᤠ ᤑᤠ᤹ᤀᤠᤱ ᤀᤠᤏᤡ᤹ ᤏᤛᤠ᤺ᤴᤗᤠᤶᤒᤠ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ. ᤜᤧᤰᤁᤣᤗ᤹ᤖᤡᤰ ᤏᤡ᤺ᤔᤏᤠᤒᤠ ᤐᤠ᤺ᤴᤜᤠ᤹ᤃ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶ ᤐᤥ᤺ᤰᤂᤧᤒᤠᤖᤥ॥
4ᤏᤛᤠ᤺ᤴᤗᤠᤶᤒᤠᤀᤣ ᤜᤠᤒᤡᤗᤖᤧ ᤁᤢᤶᤓᤢ᤹ ᤁᤕᤡᤏᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤛᤡᤍᤢᤱᤈᤓᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤀᤠᤱ ᤂᤧᤴᤗᤠᤶᤒᤠᤀᤣ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤔᤏᤠ ᤔᤧᤳᤋᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤧᤛᤠᤱ ᤀᤠᤸᤗᤥ ᤌᤠᤖᤡᤰ ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤸᤗᤧ ᤏᤢ᤺ᤒᤠ ᤐᤠ᤺ᤴ ᤀᤠᤜᤢ᤹ᤖᤥ॥
5ᤏᤛᤠ᤺ᤴᤗᤠᤶᤒᤠᤀᤣ ᤜᤏᤥᤰᤁᤧᤴ ᤔᤧᤴᤇᤡᤀᤣ ᤁᤢᤜᤡᤱᤘᤧᤳ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤋᤣ᤹ᤖᤧᤖᤥ॥ ᤂᤢᤏᤧ᤹ ᤁᤢᤎᤰᤁᤡᤴ ᤂᤥ᤺ᤔᤧᤍᤧᤳᤋᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤱ ᤋᤣ᤹ᤖᤢᤖᤥ॥ ᤂᤢᤏᤧ᤹ ᤌᤠ᤺ᤱ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤛᤢᤀᤠᤱ ᤘᤕᤧ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤋᤥ᤺ᤴᤍᤡ ᤐᤡᤖᤢ᤹ᤖᤥ॥
6ᤜᤧᤰᤁᤩᤠᤱ ᤏᤛᤠ᤺ᤴ ᤔᤧ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤁᤧᤍᤠ᤺ᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤂᤢᤏᤧ᤹ ᤁᤧᤃᤥ᤺ᤵᤐᤠᤜᤠ᤹ ᤜᤠᤱᤛᤧᤶ ᤐᤡᤖᤢᤛᤡ᤹ᤖᤥ ᤗ᤹ᤖᤡᤰ ᤏᤛᤠ᤺ᤴ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥
7ᤏᤛᤠ᤺ᤴᤗᤠᤶᤒᤠᤀᤣ ᤏᤢᤜᤠᤖᤧ ᤁᤢᤜᤡᤶᤛᤕᤱᤜᤠ᤹ ᤋᤠᤱᤛᤧ᤺ᤵᤛᤧ ᤘᤠᤗᤠᤎᤠ ᤆᤥᤃᤢᤖᤥ॥ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥ᤺ᤱᤅᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤀᤠᤸᤗ ᤐᤥ᤺ᤱᤗᤥ ᤗ᤹ᤖᤡᤰ ᤛᤠᤶᤍᤡᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤂᤧᤵᤛᤢᤀᤠᤱ ᤜᤧᤰᤁᤣ ᤆᤥᤃᤢᤖᤥ॥ ᤂᤢᤏᤧ᤹ ᤁᤢᤏᤛᤠ᤺ᤴᤗᤠᤶᤒᤠᤀᤣ ᤂᤧᤴ ᤕᤧᤶᤔᤥᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧ ᤜᤧᤰᤁᤩᤠᤱ ᤏᤛᤠ᤺ᤴᤗᤠᤶ ᤁᤧᤍᤠ᤺ᤒᤠ ᤛᤠᤶᤕᤥᤏᤡᤒᤠ ᤗᤰ ᤁᤧᤄᤥ᤺ᤒᤠ ᤐᤥ᤺ᤰᤂᤧᤖᤥ॥
8ᤏᤛᤠ᤺ᤴᤗᤠᤶᤒᤠᤀᤣ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤂᤧᤵᤛᤢ॥ ᤜᤧᤰᤁᤩᤠᤱ ᤀᤢ᤺ᤳᤋᤢᤀᤠᤱ ᤐᤣᤃᤧ᤹ ᤔᤧᤳᤋᤢᤒᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤴ ᤗᤠᤈᤣ᤹ᤀᤡᤱᤃ ᤋᤠ᤺ᤴᤍᤡ ᤂᤢᤏᤧ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤁᤢᤗᤰ ᤘᤕᤧᤖᤥ॥ ᤂᤢᤏᤧ᤹ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤑᤠ᤹ᤀᤠᤱ ᤌᤣᤀᤠᤱ ᤔᤧᤏᤡ᤺ᤛᤢᤴᤗᤥ॥
9ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ ᤔᤠᤱᤜᤧᤰᤁᤥ ᤂᤥ᤺ᤛᤢᤒᤠ ᤗᤠᤈᤣ᤹ᤀᤥ ᤜᤡᤶ ᤆᤥᤃᤢᤀᤠᤱ ᤕᤠ᤺ᤰᤋᤧᤛᤠᤱ ᤂᤢᤏᤧ᤹ᤃ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤘᤕᤧᤖᤥ॥ ᤂᤢᤏᤧ᤹ᤏᤢ ᤛᤥᤖᤡᤰ ᤔᤠᤱᤜᤧᤰᤗᤧᤴ ᤗᤰ ᤁᤧᤄᤥ᤺ᤒᤠ ᤀᤡᤛᤜᤠᤁ ᤏᤢ ᤕᤠᤁᤢᤒ ᤁᤢᤀᤡᤛᤡ᤺ᤰ ᤂᤢᤏᤧ᤹ᤀᤠᤱ ᤛᤠ᤺ᤱᤃᤠᤜᤡᤶᤔᤥ ᤘᤕᤧᤃᤳᤋᤧᤖᤥ॥
10ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤏᤢᤵᤔᤏᤠᤒᤠ ᤐᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤌᤡᤰ ᤁᤥ᤺ᤳᤋᤢᤖ ᤘᤕᤧᤖᤥ॥ ᤂᤧᤴ ᤕᤧᤰᤕᤰᤁᤡᤸᤗᤧᤴ ᤀᤡᤳᤇᤠᤵ ᤁᤧᤛᤠᤵᤐᤠᤀᤠᤱ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
11ᤀᤒᤪᤠᤜᤠᤔᤖᤧ ᤁᤢᤔᤣ᤺ᤳ ᤛᤠᤖᤠ᤺ᤴ ᤛᤠᤔᤧᤱᤃᤵᤔᤏᤠᤔᤠ ᤘᤕᤧ ᤜᤧᤰᤁᤩᤠᤱ ᤛᤠᤃᤵᤔᤠ ᤗᤧᤳᤋᤢᤀᤠᤱ ᤘᤕᤧᤛᤠᤱ ᤏᤛᤠ᤺ᤴᤗᤠᤶᤒᤠᤀᤣ ᤛᤠᤃᤵᤔᤠ ᤛᤢᤰᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤜᤧᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢᤖᤥ॥
12ᤜᤧᤰᤁᤣᤗ᤹ᤖᤡᤰ ᤁᤴ ᤛᤡ᤺ᤔᤠ ᤁᤧᤀᤡ᤺ᤵᤐᤠ ᤔᤏᤠᤎᤡᤰᤗᤠᤶᤒᤠ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰ ᤏᤢ ᤘᤠᤜᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡ᤺ᤰ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤒᤥ᤺ᤰᤂᤧᤖᤥ॥
13ᤁᤴ ᤁᤠᤰ ᤏᤛᤠ᤺ᤴᤛᤠᤒᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰ ᤔᤧᤱᤄᤥᤀᤣ ᤔᤧᤛᤩᤧ. ᤁᤖ ᤂᤧᤱᤜᤠ᤹ᤖᤧᤃ ᤔᤠ᤺ᤱᤄᤠᤗᤠᤶ ᤂᤧᤴ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤴ ᤗᤠᤱᤔᤧᤍᤠ᤺ᤰᤋᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤗᤠᤈᤣ᤹ᤒᤠ ᤏᤢ ᤋᤠᤰᤁᤧᤃᤶᤒᤠ ᤘᤕᤡᤃᤧᤖᤧᤳᤇ ᤗ᤹ᤖᤡᤰ ᤋᤧᤴᤍᤡᤱ ᤔᤧᤈᤥᤃᤢᤖᤥ॥
14ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧᤃ ᤛᤧᤰᤂᤠᤛᤠᤱ ᤀᤠᤒᤠᤅᤣ ᤂᤢᤏᤡ᤹ ᤗᤠᤈᤣ᤹ᤀᤡᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤏᤡ᤺ᤴᤎᤥ ᤐᤥ᤺ᤱᤗᤥ॥
15ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤗᤠᤈᤣ᤹ᤀᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤸᤗᤧᤃ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤕᤧᤶ ᤔᤧᤄᤥ᤺ᤛᤢᤒᤠᤔᤧᤴ॥
16ᤁᤖ ᤂᤧᤱᤜᤠ᤹ᤖᤧᤃ ᤂᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤈᤣ᤹ᤀᤡᤴ ᤂᤥ᤺ᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤐᤠ᤺ᤵᤔᤠ ᤂᤧᤱᤜᤠ᤹ᤏᤢ ᤛᤡᤖᤡᤱ ᤔᤧᤔᤕᤧᤴᤏᤠᤱ ᤂᤢᤏᤡ᤹ ᤗᤠᤃᤡ ᤏᤢ᤺ᤒᤠ ᤕᤧᤰᤕᤰᤌᤡᤰ ᤕᤠᤖᤡᤵ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
17ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢᤸᤗᤧ ᤂᤢᤏᤧ᤹ ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤰᤁᤡᤴ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤋᤥ᤺ᤴᤍᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤜᤠᤁᤗᤠᤶᤒᤠᤀᤣ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥ᤺ᤱᤗᤥ ᤗ᤹ᤖᤡᤰ ᤔᤠᤱᤜᤧᤰ ᤐᤡᤖᤢᤀᤠᤱ ᤘᤕᤧᤛᤠᤱ ᤀᤒᤪᤠᤜᤠᤶᤔᤡᤸᤗᤧ ᤗᤳᤌᤡᤰᤗᤰ ᤁᤢᤛ᤻ᤛᤠ᤺ᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤧᤖᤥ॥
19ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧᤃ. ᤂᤢᤏᤧ᤹ ᤁᤢᤛᤡᤘᤧᤳ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤒᤠ ᤀᤡᤛᤜᤠᤰᤁᤡᤴ ᤕᤠᤶᤔᤥ ᤁᤢᤜᤡᤱᤘᤧᤳᤋᤣ ᤂᤥ᤺ᤛᤢᤖᤥ॥
20ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤁᤖᤧᤀᤠᤱ ᤕᤠᤁᤢᤒ ᤏᤢ ᤀᤧᤛᤠᤀᤢ᤺ᤴ ᤂᤢᤴᤇᤡ᤹ ᤁᤧᤍᤠ᤺ᤒᤠ ᤕᤧᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤢ᤹ᤀᤡᤛᤠᤶ ᤌᤠ᤺ᤛᤢᤐᤡᤖᤢᤛᤡᤖᤥ॥
21ᤏᤛᤠ᤺ᤴᤗᤠᤶᤒᤠᤀᤣ ᤕᤠᤁᤢᤒᤧᤴ ᤛᤡ᤺ᤔᤠ ᤕᤧᤶᤔᤥ ᤁᤢᤍᤰᤁᤠ᤺ᤳᤋᤡᤸᤗᤧ ᤋᤰᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤖ ᤕᤢᤛᤢᤑᤖᤧ ᤁᤠᤰ ᤁᤢᤛ᤻ᤛᤠ᤺ᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢᤐᤡᤖᤢᤛᤡᤖᤥ॥
22ᤏᤛᤠ᤺ᤴᤗᤠᤶᤒᤠᤀᤣ ᤕᤢᤛᤢᤑᤖᤧᤀᤠᤱ ᤛᤡ᤺ᤔᤠ ᤀᤡ᤺ᤳᤋᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴ ᤔᤧᤒᤣ᤺ᤰᤐᤠ ᤐᤠ᤺ᤴᤏᤡᤴ ᤆᤧᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤁᤢᤕᤧᤵᤐᤡᤴᤏᤠᤱ ᤂᤢᤏᤡ᤹ᤏᤢᤀᤣ ᤔᤧᤍᤣ᤹ᤖᤢᤖ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
23ᤏᤛᤠ᤺ᤴᤗᤠᤶᤒᤠᤀᤣ ᤔᤥᤛᤠ᤺ᤴ ᤛᤠᤘᤠ᤺ᤴᤇᤡᤱᤅᤡᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤗᤠ ᤛᤢᤶᤛᤡ ᤌᤠᤖᤡᤰ ᤆᤡᤰᤂᤧᤳᤇᤢᤀᤠᤱ ᤁᤳᤋᤧᤳᤇᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤅᤧ᤺ᤰᤘᤠ᤺ᤴ ᤛᤠ᤹ᤖᤡᤰ ᤏᤢ᤺ᤒᤠ ᤏᤡ᤺ᤛᤧᤳᤇᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴᤏᤠᤱ ᤔᤧᤃᤡᤖᤧᤳᤇᤢᤴᤗᤥ॥
24ᤔᤥᤛᤠ᤺ᤴ ᤌᤠᤱᤒᤧᤴ ᤁᤧᤖᤧᤸᤗᤧ ᤏᤛᤠ᤺ᤴᤗᤠᤶᤒᤠᤀᤣ ᤑᤠᤖᤥ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤀᤠ ᤐᤠ᤺ᤵᤔᤠ ᤔᤧᤍᤧᤴᤍᤧᤴᤗᤥ॥
25ᤂᤢᤏᤧ᤹ ᤗᤠᤕᤥᤒᤠ ᤛᤢᤰᤂᤣᤘᤠᤀᤥ ᤛᤵᤑᤠᤎᤡᤰ ᤘᤠ᤹ᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤵᤔᤡᤜᤠ᤹ᤏᤢ ᤋᤢᤰᤂᤣᤘᤠᤀᤥ ᤘᤠ᤹ᤔᤠᤀᤣ ᤏᤡᤱᤘᤠ᤹ ᤆᤥᤃᤢᤖᤥ॥
26ᤔᤡᤛᤪ ᤗᤠᤈᤣ᤹ᤛ᤻ᤔᤠ ᤕᤠᤱᤛᤠᤁᤢᤴᤎᤣ᤺ᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤏᤡᤱᤄᤢᤶᤔᤥ ᤌᤠᤔᤠᤀᤣ ᤏᤢ᤺ᤒᤠ ᤀᤡ᤺ᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤋᤠ᤺ᤴᤍᤡ ᤂᤥᤃᤧᤍᤧᤵᤐᤠ ᤌᤢᤶᤄᤥᤀᤥ ᤐᤳᤇᤧᤖᤥ॥
27ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ᤃ ᤏᤡ᤺ᤔᤧᤴᤎᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡ᤺ᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤜᤠᤱᤅᤡᤸᤗᤧ ᤁᤢᤛᤡᤰᤁᤡᤴᤏᤢ ᤔᤧᤃᤡᤛᤧᤴᤏᤠᤱ ᤔᤡᤛᤪᤗᤠᤶ ᤗ᤺ᤴᤍᤧᤐᤣᤒᤠᤴ ᤐᤣᤒᤠᤀᤣ ᤐᤥ᤺ᤰᤂᤧᤀᤠᤱ ᤔᤧᤏᤢ᤺ᤰᤂᤧᤴ॥
28ᤏᤛᤠ᤺ᤴᤗᤠᤶᤒᤠᤀᤣ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤒᤠ ᤛᤠ᤺ᤜᤠ᤹ ᤁᤧᤔᤧᤱᤒᤠᤸᤗᤧ ᤛᤢ᤺ᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤢᤏᤧ᤹ ᤔᤠᤰᤂᤡ᤹ᤀᤡᤴ ᤑᤡᤴᤍᤢᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤌᤡᤶᤔᤡᤴ ᤜᤣ᤺ᤰᤋᤢᤖᤥ॥
29ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤛᤧᤱᤛᤧᤱᤒᤠ ᤂᤠᤶᤔᤥ ᤗᤠᤱᤔᤧᤄᤣᤃᤧᤖ ᤜᤧ᤺ᤳᤋᤠᤱᤒᤠ ᤘᤠᤜᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤏᤠᤎᤠ᤺ᤶᤒᤡ ᤔᤧᤒᤣᤖᤥ. ᤁᤖ ᤔᤡᤛᤪᤡᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤸᤗᤧ ᤂᤧᤱᤜᤠ᤹ ᤁᤠᤰ ᤂᤩᤠᤶ ᤔᤧᤜᤢᤔᤧ ᤔᤧᤛᤩᤧᤖᤥ॥
30ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤕᤧᤖᤡᤜᤥ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤂᤧᤸᤗᤧ ᤁᤢᤄᤡᤖᤡᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤧᤖᤥ॥
31ᤏᤛᤠ᤺ᤴᤗᤠᤶᤒᤠᤀᤣ ᤕᤧᤖᤡᤜᤥᤀᤥᤔᤠ ᤁᤧᤳᤏᤡᤔᤠ ᤖᤠᤜᤠᤒᤖᤧ ᤀᤡᤛᤪᤠᤀᤡᤗᤡ ᤌᤥ᤺ᤶᤈᤡᤒᤠᤜᤠ᤹ ᤋᤖᤧᤍᤥ᤺ᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤱᤄᤧᤔᤏᤠᤒᤠᤜᤠ᤹ᤏᤢ ᤔᤧᤛᤩᤧᤏᤧᤴᤗᤥ॥
32ᤂᤧᤴ ᤕᤠᤖᤡᤰᤁᤠᤱᤎᤥ ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠᤒᤣ᥅ ᤃᤡᤍᤡᤕᤥᤏ. ᤒᤠᤖᤠᤁ. ᤛᤡᤶᤛᤏ. ᤕᤡᤵᤋᤠᤜ. ᤍᤠᤀᤢᤍ. ᤛᤠᤔᤢᤀᤧᤗ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤕᤧᤶ ᤔᤧᤃᤳᤋᤠᤴᤗᤥ॥
33ᤂᤧᤱᤜᤠ᤹ᤖᤧᤃ ᤏᤛᤠ᤺ᤴᤗᤠᤶᤒᤠᤀᤣ ᤜᤠᤱᤈᤢᤶᤜᤠ᤹ ᤔᤧᤏᤠ᤺ᤴᤍᤢ. ᤛᤠᤶᤕᤥᤏᤡᤒᤠ ᤂᤠᤛᤧᤴ ᤔᤧᤗᤥ᤺ᤴᤍᤢ. ᤔᤠᤱᤜᤧᤰ ᤆᤥ᤺ᤰᤔᤏᤠᤒᤠ ᤐᤠ᤺ᤴᤜᤠ᤹ ᤔᤧᤄᤥ᤺ᤛᤢ॥ ᤂᤧᤱᤜᤠ᤹ᤖᤧ ᤌᤧᤖᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ᤺ᤴ ᤔᤧᤛᤢᤒᤢ.
34ᤐᤕᤶ ᤕᤶᤒᤠ ᤔᤡᤖᤠ᤺ᤰᤜᤠ᤹ ᤔᤧᤛᤧᤖᤢ. ᤋᤠᤓᤣᤗᤠᤶᤒᤠ ᤋᤠᤱᤔᤧᤛᤧ᤺ᤵᤋᤧ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠ᤹ᤀᤡ ᤜᤥ᤺ᤵᤋᤧᤛᤠᤱ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤌᤱᤅᤥ ᤔᤢᤰᤁᤧᤃᤢᤒᤠ ᤔᤧᤒᤥ᤺ᤰᤂᤧᤀᤠᤱ ᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡᤖᤥ॥
35ᤔᤧᤴᤇᤢᤔᤠᤜᤠ᤹ᤖᤧ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤀᤠᤒᤠᤅᤣ ᤂᤢᤏᤡ᤹ ᤔᤏᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤄᤥ᤺ᤛᤢᤛᤡᤖᤥ॥ ᤘᤣ᤹ᤜᤠ᤹ᤖᤧ ᤛᤡ᤺ᤔᤧᤴ ᤀᤣᤃᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤆᤥ᤺ᤰᤕᤢᤶᤓᤥ ᤐᤥ᤺ᤱᤔᤠ ᤔᤧᤴᤍᤧᤴᤍᤧᤴᤏᤠᤱ ᤏᤡᤱᤄᤢᤶᤔᤡᤴ ᤔᤧᤍᤠ᤺ᤰᤋᤢᤖᤥ॥
36ᤁᤢᤓᤠᤃ ᤜᤡᤏᤠ᤺ᤶ ᤔᤧᤔᤧᤳᤋᤢᤛᤡᤀᤠᤱ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡ. ᤁᤢᤓᤠᤃ ᤀᤡᤔᤧᤄᤣ᤺ᤰᤂᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥
37ᤁᤢᤓᤠ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤛᤡ. ᤁᤢᤓᤠ ᤆᤧᤴᤍᤡᤖᤡ᤺ᤸᤗᤧ ᤔᤧᤈᤧᤖᤢ ᤔᤧᤛᤧᤖᤢᤛᤡ. ᤁᤢᤓᤠᤃ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡᤖᤥ॥ ᤁᤢᤓᤠᤃ ᤏᤡᤱᤄᤢᤶ ᤏᤢ ᤋᤢᤰᤂᤣ ᤔᤧᤈᤩᤧᤀᤠᤱ ᤆᤠᤜᤠᤒᤥ ᤔᤧᤘᤕᤧᤸᤗᤧ ᤔᤧᤸᤗᤢᤰ ᤏᤢ ᤔᤧᤴᤍᤠᤰ ᤛᤧᤜᤥᤒᤠ ᤆᤠᤱ ᤔᤧᤈᤠᤰᤂᤢ॥
38ᤂᤧᤱᤜᤠ᤹ᤃ ᤗᤢᤱᤓᤢᤰᤁᤢ ᤏᤢ ᤂᤠᤶᤓᤢᤰᤁᤢᤜᤠ᤹ᤀᤥ ᤕᤠᤱᤎᤥ᤺ᤰᤁᤡ ᤕᤧ᤺ᤱᤄᤠᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤀᤡᤖᤧᤖ ᤔᤧᤘᤕᤧᤖᤥ॥ ᤂᤧᤴ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤢᤶᤒᤥᤎᤠᤒᤠ ᤜᤥ᤺ᤵᤋᤧᤖᤥ॥
39ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤠᤛᤢᤛᤠᤱ ᤂᤧᤱᤜᤠ᤹ᤏᤢ ᤆᤥᤃᤧᤒᤠ ᤔᤠᤱᤜᤧᤰᤁᤡᤴ ᤔᤧᤱᤄᤥᤀᤣ ᤔᤧᤛᤩᤧ ᤔᤧᤒᤣᤖᤥ॥
40ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤏᤢ᤺ᤒᤠ ᤏᤡᤱᤛᤣ᤺ᤰ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤁᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤃ ᤀᤠᤏᤡ᤹ᤏᤢᤖᤰ ᤁᤢᤗᤡᤱᤎᤥ ᤔᤧᤃᤧᤳᤗᤥ॥
