ያቆቤ 3

1

2

3

4

5

¹ታ ኢሻቶ! ኢንቴፌ ዳሮቲ ኣስታማሬታ ጊዶፔቶ፤ ጋሶይካ ኑ ኣስታማሬ ጊዲዳይቲ ኣꬌꬃ ፒርዳ ኤካናይሳ ኢንቴ ኤሬታ።

²ኑ ዉሪካ ዳሮ ሚሻን ꬉጴቶስ። ሃሳያን ꬉጴቶንታዴይ ዲኮ ኢዚ ባ ኣሳቴꬅ ሎዔꬂ ናጋናስ ዳንዳዪዛ ኩሜꬃ ኣሳ።

³ኑኒ ፓራታ ኣዛዛናስ ቢፃላ ባርሲዲ ኑ ኮይዳ ማላ ኢስታ ኣዛዞስ።

⁴ዎይኮ ኣኔ ማርካቤታ ፄሊቴ። ኢስቲ ኣይ ጊታታኔ ጫርኮን ሱጌቲ ቢዛይታ ጊዲኮካ ማርካቤ ላጊዛዴይ ቄሪ ላፋ ላጊዛ ሚሻራ ባ ኮዪዛሶ ኤፌስ።

⁵ሄሳꬆካ ኣሳቴꬃ ጋርሳን ኢንፃርሲ ጉꬅ ጊዳ ኡታዳ ጊታ ዎልቃማ ኦቶሮ ኦቶሬታዉስ፤ ቄሪ ታማይ ጊታ ዎራ ዎስቲ ፁጊ ꬋይሲዛኮኔ ኣኔ ዩሺ ቆፒቴ።

⁶ኢንፃራሲካ ባ ባጋራ ታማ ማላ፤ ኑ ኣሳቴꬃ ጊዶን ዲዛ ኢታ ኣላሜ። ኣሳቴꬃ ዉርሳ ቱኒሳዉሲኔ ኣሳቴꬃ ቦላ ታማ ጉጃዉስ፤ ባስካ ጋናሜ ታማን ፁጌታና።

⁷ሜሄይ፥ ዶዓይ፥ ካፎቲ ሃይሳꬆካ ቢታ ቦላ ጎሼቲዛይታኔ ኣባ ጊዶን ዲዛ ሜꬌቴꬃታ ዉርሲ ኣሲ ሃራና ዳንዳዬስ፤ ኢስቲካ ሃሬቲዳ።

⁸ጊዶ ኣቲን ኢንፃርስ ሃራናስ ዳንዳዪዳዴይ ኦኒካ ዴና። ዎꬊዛ ማርꬔይ ኢዚን ኩሚዳሮኔ ኢዛ ሼምፓ ኤኮንታ ኢታ ሚሻ።

⁹ኑኒ ኑ ኢንፃርሳይራ ጎዳኔ ኣዋ ኣንጆስ። ኢዚንካ ፆሳ ሌሚሶን ሜꬌቲዳ ኣሳ ናይታ ዛሪዲ ቃንጎስ።

¹⁰ኣንጆይኔ ቃንጌꬂ ኢሲ ዱናራ ኬዜስ። ታ ኢሻቶ! ሄሲ ሄሳꬆ ሃናናስ ቤሴና።

¹¹ኢሲ ፑልቶ ኦላፌ ማልዖ ሃꬂኔ ጫሞ ሃꬂ ፑልቲ ኤሪዜ?

¹²ታ ኢሻቶ! ባላሴ ጌቴቲዛ ሚꬂ ዎጋራ ኣይፌ ዎይኮ ዎይኔ ሚꬂ ባላሴ ሚꬃ ኣይፌ ኣይፋናስ ዳንዳዪዜ? ሄሳꬆካ ጫሚዛ ሃꬃፌ ማልዒዛ ሃꬂ ቤታና ዳንዳዬና።

¹³ኢንቴ ጋራሳፌ ኣኬካራ ዲዛ ኤራ ኣሲ ኦኔ? ኤራይ ዲዛ ጊዲኮ ኣኔ ባ ኦሶ ኣሽኬቴꬃኒኔ ኣꬎ ኤራቴꬃራ ባ ሎዖ ዱሳን ቤሶ።

¹⁴ቃሴ ጫሞኔ ቃናቴይ፥ ኢንቴና ፃላላ ዶሲዛ ሃኖይ ኢንቴ ዎዝናን ዲዛ ጊዲኮ ኦቶሬቴꬅ ኢንቴስ ሲዬቶፎ። ቱማካ ካዶፊቴ።

¹⁵ሂኒ ማላ ኤራቴꬃያ ሳሎፔ ጊዲኩ። ሂና ቃሴ ቢታፌ፥ ኣሾፔኔ ፃላዔፔኮ!

¹⁶ቃናቴይኔ ባርካ ባና ሲቆይ ዲዛሶን ዋሶይኔ ኢታ ኦሶይ ዉሪ ዴስ።

¹⁷ሳሎፔ ጊዲዳ ኤራቴꬃያ ጊዲኮ ኮይሮ ጌሻ፥ ጉዬፔካ ሳሮቴꬅ ዶሲዛሮ፥ ዳንዳዪዛሮ፥ ኤሮ ጊዛሮ፥ ማሮቴꬂኔ ሎዖ ኣይፌይ ኩሚዳሮ፤ ቃሴ ዎርዶ ማዶንታሮኔ ኡሎን ጌኔይ ባይንዳሮ።

¹⁸ሳሮቴꬅ ዶሲዛ ኣሳቲ ሳሮቴꬃን ዜሪዲ ፂሎቴꬃ ኣይፌ ማፄቴስ።