Santiago 3

1

2

3

4

5

¹Re goo wetsʼn ne btan na, ndoblot tablaaz reta goo gak goo maestr kuu loo xkiiz Diox; tak neʼa goo mas nathoz naab Diox kwent lo re zha kuu nloo xkiiz Diox.

²Kwathoz ndaaʼaa falt, ne os nzo cho ndediz pur kuu wen taxal ndobloy, zhaʼa nak thib zha nali, ne tak nabee zha lo dib kwerp zha, tsa gone diiz lo zha.

³Noga ne goo ngo zha fren roo kabay, tsa gon maa diiz lo zha ne tsa ya maa lad ta ndano zha maa.

⁴Ne leeka tata nak thib bark: Tegal kwathoz naro bark ne tegal nchoop mbi thoza, per lee zha kuu ntetee bark, kon thib le ya lut ntetee zhay loka ta nlaaz zha.

⁵Leeka tata nak loz men; kwathoz lutte, per ndake naroob kwaa tak tsowe, leey nak taxal thib bel lut kuu tak teyy dita thib yii naro.

⁶Lee loz men nak taxal thib bel lut, kuu kwathoz went kuu ntsow ndaa men falt ne ntetsaay men lo dib kuu naban men. Leey nak taxal ki kuu ndyaad gabil.

⁷Relota maa wan, re min, re mbeel ne re maa kuu nzo leen nitdoo, nye zha lo maa ne ntsow zha gan nzhon maa diiz lo zha;

⁸per lee loz men, neeka thib men ter ye loy ne neeka ter tsow men gan gone diiz lo men. Leey nak thib kuu kwathoz went, ne ndaate diiz gone diiz, taxal kwaan kuu nzhuth.

⁹Kon leey nzhoolaa lo Diox kuu nak Xutaa, ne kon leeka leey ngeʼaa re men kuu mdexkwaa Diox.

¹⁰Reta goo wetsʼn ne btan na, ndoblot leeka kon rooʼaa kuu nzhoolaa lo Diox kodeʼaa re men, thitanax ndoblot tsowaa tata.

¹¹¿Chu tak tsib nit natsi ne nit nala lo thibka xlen nit?

¹²Re goo wetsʼn ne btan na, ¿chu tak taa ya ig aseytun o chu tak taa luts ub ig? Leeka tata, gagt tsib nit natsig ne nit natsi lo thibka xlen nit.

¹³Os nzo cho zha nzhaak ne nyen re kwaa xid re goo, kon yalnzhaak ne kon yalnadoo ndoblo loo zha nzhak zha por re kuu wen kuu ntsow zha.

¹⁴Per os lee goo kwathoz ndablaaz goo re kwaa ne nzo zhyan leettsoo goo ne goo altaa goo, ndoblot ley goo lee goo nzhaak, tak lee kona nak nkedi goo ne mbezt goo kuu wli.

¹⁵Lee yalnzhaak ree ndyaadte lo Diox, sinke leey ndyaad lo re men yezlyu ree ne chaan Maxuuy nake.

¹⁶Tak ta nzo zhyan ne yalndablaaz, tya ngyo zha ne tya nzo relota kuu went.

¹⁷Per lee zha kuu nap yalnzhaak kuu ndyaad lo Diox; tenzhee nak zha: Nambi nak zha, ntsow zha wen kwin re men, nyen zha re kwaa ne nadoo nak zha, wen nak zha lo reta men, nlat leettsoo zha ne zha taben zha, thibka ntsow zha kuu wen, nkedit zha, wli kuu ndediz zha.

¹⁸Kona lee re zha kuu ntsow wen kwin re men, zhaʼa nak taxal thib zha nzhann mbiz wen, par thop zha yalgonn, kuu nak nali ban men.